Dual PanelPertoton mindo gelah itegu-tegu dingen ikawali
1I bas Daud nari. Man BaNdu o TUHAN ertoto aku,
2man BaNdu ernalem aku o Dibatangku. Ula pelepas mela kuakap, ula pediat imbang-imbangku tawa-tawa kerna aku.
3Kalak si ngarap man BaNdu la mela akapna, tapi kalak si nadingken Kam la ersabap juru me iakapna.
4Ajari aku o TUHAN kerna PeratenNdu, petangkas kai si arus kulakoken.
5Ajari aku o TUHAN erdalan arah KebenarenNdu, sabap Kam kap Dibatangku. Kam kap si ngkelini aku, man BaNdu aku lalap ernalem.
6Ingetlah o TUHAN perkuah AteNdu ras keleng atendu si tetap, si nai-nai nari IcidahkenNdu.
7Alemi dosa ras kesalahenku, tupung aku nguda, inget min aku, sue ras KiniulinNdu dingen keleng AteNdu si tetap.
8Sabap TUHAN bujur dingen mehuli, kalak perdosa IajariNa gelah erdalan arah patutna.
9Iajarina kalak meteruk rukur, maka iikutkenna PeratenNa.
10Man kerina kalak si patuh kempak PerpadanNa dingen ngikutken PeratenNa, itegu-TeguNa alu tutus ras dem keleng ate.
11Erkiteken GelarNdu alemi min aku, sabap melala kal dosa-dosangku.
12Kalak si patuh iajarken TUHAN kap, dalan si arus idalanina.
13Geluhna tetap senang, kempu-kempuna ngaloken pusaka.
14Kalak si patuh teman TUHAN kap, PerpadanNa ras ia IpeteguhiNa pe.
15Aku tetap nare ku TUHAN nimai PenampatNa, IpulahiNa aku i bas cilaka nari.
16O TUHAN, nehen min aku, mekuah min AteNdu kempak aku sabap kalak si la megegeh dingen kelungunen me aku.
17Penahangi ukurku i bas kendelenku nari, pulahi min aku i bas kesusahenku.
18Perdiateken min kendelenku ras kiniseranku, dingen alemi min kerina dosangku.
19Nehenlah uga lalana musuhku, dingen uga nembehna atena kempak aku.
20Jagai min aku kelinilah aku maka ula aku italuken, man BaNdu aku reh mindo gelah aku ikawali.
21Kiniulin dingen kebujurenlah si ngkawali aku, sabap aku ernalem man BaNdu.
22O Dibata pulahi min Israel BangsaNdu, i bas kiniseranna nari.