Dual PanelPertoton mindo pengalemi dosa
1O Dibata mekuah min ateNdu kempak aku, erkiteken LiasNdu, sasapkenlah dosangku, erkiteken perkuah AteNdu.
2Peridi kal min aku maka masap kejahatenku, urasi min aku maka masap dosangku.
3Salah lepakku kueteh nge, dosangku pe rusur kuinget.
4Man BaNdu, man BaNdu saja ngenca aku erdosa, kubahan me si jahat i bas PengakapNdu. Emaka patut nge aku IukumNdu, janah bujur nge KeputusenNdu.
5I bas kesalahen kap tubuhku ndube, sabap i bas bertin nari pe nggo aku ikuasai dosa.
6Ukur si pinter ras kebujuren nge si IpindoNdu, dage demilah pusuhku alu KepentarenNdu.
7Aguilah dosangku, maka aku bersih, peridi min aku maka bentaren aku asangken kapas.
8Pedengkehken min man bangku berita keriahen, maka ersurak ka pusuh si nggo IgetemkenNdu enda.
9Pitpitkenlah MataNdu maka ula IdahNdu dosangku, sasapken min kerina salah lepakku.
10Tepa min ukur si meciho i bas aku o Dibata, jenari pelimbarui min pusuhku jadi pusuh si patuh.
11Ula aku IbuangNdu i bas adep-AdepenNdu nari, dingen ula IbuatNdu KesahNdu si badia i bas aku nari.
12Bereken min bangku keriahen erkiteken aku nggo IkeliniNdu, dingen bahanlah maka meriah ukurku patuh man BaNdu.
13Kenca bage banci kuajarken perentah-PerentahNdu man si perdosa, gelah mulihken ia man BaNdu.
14Kelinilah kesahku, o Dibata keselamatenku, gelah alu meriah ukur kumomoken KebujurenNdu.
15Sampati aku ngerana, o TUHAN, gelah kupuji Kam.
16Persembahen gelehen la AteNdu bage, aminna pe kupersembahken, la pet Kam persembahen tutungen.
17Persembahen si ngena AteNdu o Dibata, eme pusuh si getem; ukur meteruk dingen jera eme si la ItulakNdu.
18O Dibata, cidahken min lias AteNdu man Sion, panteki min mulihi tembok-tembok Jerusalem.
19Kenca bage meriah me UkurNdu ngaloken persembahen si patut, eme persembahen tutungen si ipersembahken kami BaNdu, jenggi lembu ipersembahken me i datas batar-BatarNdu.