Dual PanelDibata ras BangsaNa
1Ende-enden Asap. O bangsangku begikenlah ajarku, begiken min cakapku.
2Kubelasken kuan-kuanen dingen perumpaman, rusia jaman si nuria ateku kuterangken.
3Perkara-perkara si nggo sibegi dingen sialoken, si ituriken nini-nininta.
4La ateta e sibuniken man anak-anakta, tapi situriken man kesusurenta, kerna kuasa TUHAN ras PerbahanenNa si mejin, bage pe tanda-tanda kuasa si IlakokenNa.
5Man bangsa Israel IberekenNa PedahNa, man kesusuren Jakup IberekenNa PerentahNa. IsuruhNa nini-nininta, ngajarken man anak-anakna.
6Gelah sundut si arah pudi pe metehsa, janah anak-anak si langa tubuh pe nurikenca ka man anak-anakna.
7Alu bage, ia pe kerina Dibata ka penalemenna, la ilupakenna perbahanen Dibata, tapi lalap ia patuh man perentah-PerentahNa.
8Gelah ula ia seri ras nini-ninina, bangsa pemberontak dingen la patuh si la tetap kinitekenna man Dibata, si la patuh man BaNa.
9Suku Eperaim, ersenjataken panah, lompat i bas pertempuren nari.
10Ilanggarna perpadanna ras Dibata, dingen la ia patuh man undang-UndangNa.
11Lupa ia nandangi kai si nggo IbahanNa, tanda kuasa si nggo IcidahkenNa.
12I lebe-lebe nini kalak enda, ilakoken Dibata tanda kuasa, i negeri Mesir, i taneh kendit Soan.
13IbelahNa lawit, jenari IkeparkenNa kalak enda, bali ras lingling lau ItombengNa.
14Tupung suari ibabaina kalak enda alu embun, sanga berngi alu terang api.
15IbekakenNa batu i gurun pasir, i jenari maler lau mbelin tempa-tempa rehna i bas ingan si mbages nari, janah IpepinemNa kalak ndai asa puasna.
16Uruk-uruk batu IsuruhNa pedarat lau, bali ras lau belin permalerna.
17Tapi iteruskenna nge lalap erdosa man Dibata, i gurun pasir berontak ia man si Mada Kuasa,
18Alu sengaja icubaina Dibata, alu mindo pangan kai ia merincuh.
19Ilawanna Dibata alu ranan nina, "Ngasup kin Dibata mere kita man i gurun pasir enda?
20Tuhu IpekpekNa deleng batu si piher, emaka maler lau anak i jenari. Tapi ngasup kin Ia nikapken roti, dingen mereken daging i jenda man BangsaNa?"
21Kenca IbegiNa si e, emaka merawa TUHAN man BangsaNa, IserangNa bangsa alu api, janah tambah-tambah AteNa nembeh.
22Sabap bangsa e la tek man BaNa, dingen la ia ernalem nandangi KuasaNa si ngkelini e.
23Amin bage pe IperentahkenNa langit, gelah italangina pintun-pintunna.
24IpesusurNa nakan i Surga nari, eme manna jadi pangan kalak enda.
25IberekenNa man kalak enda pangan Surga, emaka man me ia asa besurna.
26IsuruhNa angin Timur rembus, alu KuasaNa erpiu-piu IbahanNa angin i Selatan nari.
27Man bangsa IpesusurNa leto, bali buena ras kersik i tepi lawit.
28Leto IdabuhkenNa i tengah-tengah perkemahen, i sekelewet inganna tading.
29Emaka man me kalak enda ngayak besur, sabap nggo ibereken Dibata rikutken pemindonna.
30Tapi kerincuhen kalak enda la erpuas-puas, emaka tupung kalak enda man denga,
31keke rawa Dibata jenari IserangNa kalak enda, IbunuhNa dilaki si merawa ras si mbisa Israel.
32Amin bage pe, tetap ka nge BangsaNa erdosa, tanda-tanda kuasa labo erbahanca tek ia.
33Emaka ipeltepken Dibata kesah kalak enda, bagi sekali erkumesah lesap ia kerina.
34Tupung IbunuhNa piga-piga kalak i bas kalak enda nari, si debanna jera jenari tuhu-tuhu mulihken man BaNa.
35Ingetna maka Dibata kap sekawalna, dingen si Meganjangna kap si ngkelini ia.
36Tapi ranan kalak enda terjeng biber ngenca, la lit kata tuhu si ibelaskenna.
37La kalak enda tutus man BaNa, dingen la itepatina perpadanna.
38Tapi icidahken Dibata perkuah AteNa man BangsaNa, IalemiNa dosa-dosana, janah la IkernepkenNa la IpulahiNa NembehNa.
39IngetNa maka kalak enda manusia si ermasap-masap kepe, seri ras angin si rembus dingen mentas saja, janah lanai mulihken.
40Lanai kurang katepna kalak enda berontak man BaNa, nakiti UkurNa i gurun pasir.
41Iulih-ulihina encubai Dibata, nuhsahi Dibata Israel, Dibata si Badia.
42Lupa kalak enda KuasaNa si mbelin, lupa ia tupung ipulahi Dibata ia i bas imbang-imbangna nari.
43Tupung IlakokenNa perbahanen si mejin i Mesir, dingen tanda-tanda kuasa i Kendit Soan.
44Lupa ia kerna lau belin si iobah Dibata jadi dareh, seh maka launa lanai terinem.
45Isiksana kalak Mesir alu laneng, ipelepasna negerina ikernepken katak.
46IberekenNa labang, lako ngkeriken peranin ras encedai juma.
47IcedakenNa kebun anggur kalak enda alu baho, dingen batang-batang ara IcedakenNa alu embun.
48Lembuna IbunuhNa alu baho, dingen asuh-asuhenna idumpang perkas.
49PernembehNa si gara IberekenNa man kalak enda runtus rawa kepiceten desken pasuken malekat reh maba cilaka.
50Ipediat Dibata maka gara PernembehNa, la IkeliniNa geluh kalak enda IkernepkenNa kalak e alu penakit laya-laya.
51I bas kerina keluarga kalak Mesir, ibunuh Dibata kasa kai anak sintua.
52Emaka IbabaiNa BangsaNa desken biri-biri, ItaruhkenNa arah gurun pasir.
53I bas PenaruhkenNa, teneng dingen la mbiar BangsaNa tapi lawit reh ergalun namburi imbangna.
54Jenari ItaruhkenNa BangsaNa ku negeri si Badia, ku deleng si IrebutNa alu KuasaNa.
55I lebe-lebe BangsaNa, IpelawesNa penduduk negeri e, jenari ibagi-BagiNa negeri e, man kerina suku-suku Israel, seh maka banci pe ia ringan i bas rumah musuh-musuhna.
56Tapi BangsaNa berontak dingen iujina Dibata si Mada Kuasa, la IpatuhiNa perentah-PerentahNa.
57Bali ras nini-ninina ia pe imbang Dibata, desken anak panah si nggeduk la terteki ia.
58Ipekekena rawa Dibata alu erbahan ingan nembah man berhala, ipehirina ate Dibata alu erbahan gana-gana.
59Ngidah perbahanen BangsaNa e, merawa kal Dibata, keri kal ItulakNa bangsa e.
60InganNa tading i tengah manusia eme RumahNa si i Silo, ItadingkenNa.
61Tanda kuasa ras KemulianNa, IpelepasNa itaban, eme Peti Perpadanen e.
62ItembehiNa BangsaNa jine, emaka IpediatNa ibunuhi musuh-MusuhNa.
63Anak perana ipan api, emaka la lit si ngempoi singuda-nguda.
64Alu kejam ibunuhi kalak imam-imamna, dingen diberu-diberu si nggo mbalu e la ibere nangisi perbulangenna.
65Tapi dungna keke TUHAN desken kalak si mbaru medak, desken kalak mbisa kenca minem anggur.
66ItalukenNa musuh-MusuhNa, IbahanNa maka mela iakapna rasa lalap.
67Tapi kesusuren Jakup ItulakNa, suku Eperaim la IpilihNa.
68Suku Juda nge si IpilihNa, dingen deleng Sion kap si keleng AteNa.
69I je, IpantekiNa RumahNa, desken RumahNa si i Surga, teguhna bali IbahanNa ras doni, rasa lalap la mundu-undu.
70IpilihNa suruh-SuruhenNa Daud, i bas mbalmbal nari IdiloNa ia.
71Ia IdiloNa i bas inganna ermakan biri-biri, gelah ipermakanina BangsaNa Israel.
72Alu ate tutus ipinpinna bangsa e, alu kepentarenna ipermakanina kerina.