Dual PanelPertoton mindo penampat
1Pertoton Daud. O TUHAN, begiken min pertotonku, aloi min aku, sabap musil janah medanggel kal aku.
2Kawali min geluhku erkiteken keleng ateku man BaNdu, kelini min aku, sabap aku suruh-SuruhenNdu tek kap man BaNdu.
3Gedang-gedang wari aku ertoto man BaNdu, Kam kap Dibatangku, mekuah min AteNdu.
4O TUHAN, periah min ukur suruh-SuruhenNdu, man BaNdu kupenangkih pertotonku.
5Sabap mehuli kap Kam man kami dingen nggit ngalemi, kalak si erlebuh man BaNdu tetap IkelengiNdu.
6Perdiateken min pertotonku, o TUHAN, dengkehken min sorangku mindo penampat.
7Tupung aku i bas kesuhsahen, erlebuh aku man BaNdu, sabap IaloiNdu kap aku.
8O Tuhan, la lit dibata si bali ras Kam, la lit si ngasup erbahan bagi si IlakokenNdu.
9Kerina bangsa si nggo ItepaNdu, o TUHAN, reh nembah man BaNdu jenari ipujina GelarNdu.
10Sabap mbisa kal Kam dingen mejin KuasaNdu. Kam kap ngenca Dibata.
11Ajari aku nehken PeratenNdu, TUHAN, gelah kulakoken e alu tutus. Ajari aku ngendesken diri man BaNdu, alu bulat ukurku.
12Kukataken bujur man BaNdu, alu bulat ukurku. O Tuhan Dibatangku, kumuliaken GelarNdu si mbelin seh rasa lalap.
13La tanggung belinna keleng AteNdu bangku, nggo IkeliniNdu aku i bas lubang kubur nari.
14O Dibata, kalak si meganjang rukur nggo reh ngelawan aku, kalak gutul-gutul munuh aku atena; eme kalak si la mperdiateken Kam.
15Tapi Kam o TUHAN, Kam Dibata si perkuah ras melias. Kam lalap saber dingen tetap keleng AteNdu ras KesetianNdu.
16Perdiateken, dingen mekuah min AteNdu aku, bere gegeh dingen kelini min aku. Sabap bagi ulina nandengku ngidangi Kam, bage ka nge ulina perbahanenku man BaNdu.
17Cidahken min KiniulinNdu bangku, gelah mela iakap kalak si ernembeh ate bangku, tupung idahsa maka kam, TUHAN, nggo nampati dingen ngapuli aku.