Dual PanelKITAP SI PEEMPATKEN MASMUR 90-106 Dibata kap ingan manusia cicio
1Pertoton Musa, suruh-suruhen Dibata. O TUHAN Kam kap ingan kami cicio, nai-nai nari ersundut-sundut.
2Ope denga IjadikenNdu deleng-deleng, ope denga IjadikenNdu doni enda Kam kap Dibata si rasa lalap.
3Kam si nuruhsa manusia mulih ku asalna, IsalihkenNdu jadi abu taneh, asalna ndube.
4Seribu tahun seri nge IakapNdu ras sada wari, desken wari si nderbih si nggo lepas tah pe bagi pertukaren jaga malam saja.
5IombakkenNdu kami; kami desken nipi, desken dukut si ertunas;
6erpagi-pagi turah dingen terlak me ia, tapi kenca ben wari melus me.
7Sengget kami erkiteken RawaNdu, meripuk getem ibahan gara AteNdu.
8Dosa-dosa kami ItamakenNdu i adep-AdepenNdu, dosa-dosa kami si terbuni pe tangkas man BaNdu.
9Gendek umur kami erkiteken RawaNdu, desken sekali erkumesah saja ngenca.
10Dekahna kami nggeluh lit pitu puluh tahun, adi kami megegeh banci jadi seh waluh puluh tahun. Tapi kesusahen eme ayam-ayam geluh kami, pedas-pedas keri umur si gendek e, jenari lesap me kami.
11Ise metehsa uga sangatna RawaNdu? Ise metehsa uga jadina kune Kam merawa?
12Dage ajari kami ngertiken uga gendekna umur geluh kami, gelah kami jadi kalak pentar.
13O TUHAN, ndigan Kam ngadi merawa? Mekuah min AteNdu KemahanNdu.
14Useken min keleng AteNdu man kami tep-tep erpagi-pagi, gelah kami banci ermeriah ate dingen muji Kam kidekah umur geluh kami.
15Bereken min kami kemalemen ate seri dekahna ras tahun-tahun kiniseran si nggo inanami kami.
16Cidahken min PerbahanenNdu man suruh-SuruhenNdu, bere maka idah kesusuren kami kemulian KuasaNdu.
17O TUHAN Dibata, pasu-pasu min kami, gelah rulih kami i bas kasa kai si idahiken kami.