Dual Panel1Enda me kata Dibata ras pengenehen Nahum kerna Niniwe. Nahum eme kalak Elkos.
Pernembeh ate TUHAN kempak Niniwe
2TUHAN Dibata mecimberu, IukumNa kasa kalak si ngelawan Ia; alu rawana erbalas Ia.
3TUHAN labo meter merawa, aminna pe Ia erkuasa. Kerina kalak si ersalah IukumNa. Ku ja TUHAN erdalan i je lit angin kalisungsung, embun bekas gebuk nahena erdalan!
4IperentahkenNa lawit, minter kerah. Ia kap si erbahanca kerah lau mbelin. Si erbahanca kerah mbal-mbal Basan ras Deleng Karmel, si erbahanca melus bunga-bunga Libanon.
5Deleng-deleng nggirgir i adep-adepen TUHAN, uruk-uruk melengas i lebe-LebeNa. Doni mundu-undu tupung TUHAN encidahken BaNa pertibi ras isina nggirgir kerina.
6Tupung Ia nembeh, ise kin tetap banci enggeluh? Ise ngasup nahanken PernembehNa si mbelin? IkusekenNa rawana si gara; lingling batu getem jadi abu i adep-AdepenNa.
7TUHAN mehuli kap, IkawaliNa BangsaNa i bas kiniseran, IpermakaniNa kalak si mulihken ndahi Ia.
8Desken banjir si mbelin iombakkenna kalak maka radas kal imbang-ImbangNa, kalak si ngelawan Ia igerana kempak kematen.
9Ngkai maka kam erpekat ngelawan TUHAN? IkernepkenNa me kam. La lit kalak ngasup dua kali ngimbangisa.
10Desken rambah duri si serbut dingen nggala si kerah iciluk me kam!
11O Niniwe, i bas kam nari rehna kalak si jahatna kal sura-surana, si erpekat ngelawan TUHAN.
12Enda me si ikataken TUHAN kempak kalak Israel, "Aminna pe kalak Assur megegeh janah nterem, ikernepken dingen ilesapken kang ia. O bangsangKu, Kubahan mesera iakapndu, tapi lanai Kuulihi erbahan bage.
13Genduari Kupengadi me kuasa Assur kempak kam jenari Kupeltepken me rante si ngiket kam."
14Enda me si iperentahken TUHAN kerna Assur, "Lanai lit kesusurenna si nerusken gelarna. Kukernepken gana-gana si i bas rumah dibatana. Aku engkuruk kuburen kalak Assur. Lanai ia patut nggeluh."
15Nehenlah! Ena reh persuruhen arah deleng-deleng nari, maba berita si mehuli! Ia reh meritaken berita kemenangen. O kalak Juda erpestalah! Jenari sehken padanndu man Dibata. Kalak jahat lanai ndigan pe nerang negerindu. Nggo keri kal ia ikernepken.