Dual Panel1Enda me turi-turinna Nehemia anak Hakalia.
Nehemia megi berita kerna kota Jerusalem
I bas bulan Kislew, i bas tahun si pedua puluhken kenca Artaserses jadi raja Persia, aku, Nehemia, sangana i kota Susan ibukota kerajan Persia.
2Tupung e sekalak seninangku Hanani gelarna, reh i Jerusalem nari ras piga-piga kalak si debanna. Emaka kusungkuni ia kerna Jerusalem ras kerna senina-senina kami kalak Jahudi si nggo mulih i pembuangen Babilon nari.
3Iturikenna man bangku maka kalak si nggeluh denga dingen nggo mulih ku negeri kami sangana i bas kiniseran si mbelin janah bangsa-bangsa si deban si tading i sekelewetna megombang man bana. Iturikenna ka pe maka tembok kota Jerusalem nggo ka sontar janah pintu-pintu gerbangna langa ipekena kenca kin iciluk.
4Kenca kubegi kerina si enda, kundul aku janahku tangis. Piga-piga wari dekahna aku erceda ate janah erpuasa. Ertoto aku man Dibata, ningku,
5"O TUHAN, Dibata Surga. Kam kap Dibata si mbelin, si ihamati. Kam setia nehken PerjanjinNdu man kalak si ngkelengi Kam ras ngelakoken si IperentahkenNdu.
6Tataplah aku, TUHAN, janah dengkehkenlah pertotonku asum aku ertoto suari ras berngi guna kerina suruh-SuruhenNdu, bangsa Israel. Ngaku aku maka kami, bangsa Israel, nggo erdosa. Nini-niningku ras aku, nggo erdosa.
7Perbahanen kami man BaNdu tuhu-tuhu nggo jahat, janah la i lakoken kami kai si IperentahkenNdu. La ipake kami undang-undang si IberekenNdu arah Musa, suruh-SuruhenNdu e.
8Inget min kai si IkatakenNdu man Musa, NiNdu, 'Adi la kam setia man bangKu, Kukerapken kam ku tengah-tengah bangsa-bangsa si deban.
9Tapi adi erkusur kam mulihken kempak Aku janah ilakokenndu kai si nggo Kuperentahken, Kubaba kam mulih ku ingan si nggo Kupilih guna ingan ersembah man bangKu, aminna gia kam sangana merap seh ku tampuk doni.'
10Enda kap kerina suruh-SuruhenNdu, BangsaNdu. IpulahiNdu ia alu kuasa ras GegehNdu si mbelin.
11TUHAN, begikenlah pertotonku ras pertoton kerina suruh-SuruhenNdu si deban si mesikel nghamati Kam. Berelah maka seh si kusuraken sendah, janah bahanlah maka mekuah ate raja man bangku." I bas paksa si e aku me si ngidangi inemen raja.