Dual PanelRembak ras Dibata
1Erdandanken kita nggo rembak ras Dibata erkiteken kinitekenta, emaka kita nggeluh i bas perdamen ras Dibata arah Tuhanta Jesus Kristus.
2Jesus Kristus me si maba kita bengket ku bas lias ate Dibata erdandanken kinitekenta. Janah i bas lias ate Dibata eme kita nggeluh dingen ringan. Dage meriah ukurta sabap lit pengarapenta maka kita ikut dat bagin i bas kemulian Dibata.
3Janah labo terjeng je saja, tapi megah pe siakap i bas kiniseranta, sabap sieteh maka arah kiniseran turah saber ate.
4I bas saber ateta e teridah maka kita nggo menang i bas pengujin, janah erkiteken kita nggo menang i bas pengujin, lit pengarapenta.
5Pengarapenta enda labo erbahanca kita kecewa, sabap Dibata nggo ncurcurken KekelengenNa ku bas pusuhta arah Kesah Si Badia. Ia me pemere Dibata man banta.
6Sabap asum kita kote denga, mate Kristus i bas paksa si payo, man gunanta kalak si jahat.
7Labo sukah muatsa kalak si nggit mate guna kalak si bujur. Tapi adi guna kalak si mehuli banci jadi lit kalak si nggit mate.
8Tapi Kristus mate asum kita perdosa denga! Arah e Dibata nggo encidahken keleng AteNa man banta.
9Dage tangkas kal man banta maka kita nggo rembak ras Dibata erkiteken Jesus Kristus nggo engkorbanken DiriNa seh mate; tentu terlebih-lebih pe kita terkelin i bas pernembeh ate Dibata nari arah Ia.
10Gelgel nari kita imbang Dibata, tapi nggo iperiahken Dibata kita ras DiriNa arah kematen AnakNa. Tentu terlebih-lebih genduari adi kita nggo meriah ras Dibata la banci lang IkeliniNa me kita arah kegeluhen Kristus.
11Janah labo e saja, tapi meriah pe ukurta dingen sipuji Dibata erdandanken Tuhanta Jesus Kristus si nggo mperiahken kita ras Dibata.
Kerna Adam ras Kristus
12Dosa nggo ngkenai kerina manusia i bas doni enda arah sekalak manusia, janah dosana e maba kematen. Erkiteken si e kematen nggo ngelangketi kerina manusia, sabap tep-tep kalak nggo erdosa.
13Ope denga ibereken Dibata pe Undang-undang arah Musa, nggo me lit dosa i doni enda, tapi dosa e la iperkiraken erkiteken la lit undang-undang.
14Tapi kematen nggo erkuasa nandangi kerina manusia i bas paksa Adam nari seh ku bas paksa Musa, subuk pe kalak si la langsung ngelanggar perentah si rehna i bas Dibata nari bagi si Adam. Adam me gambaren Manusia si nandangi reh.
15Tapi pemere Manusia si nandangi reh e la terpeseri belinna ras dosa si ibahan Adam. Tuhu maka nterem jelma mate erdandanken dosa Adam, tapi ndauh beliden lias ate Dibata si IsehkenNa man manusia si bage teremna, dingen PemereNa erpalasken lias ate si Sekalak e, eme Jesus Kristus.
16Janah pemere Dibata e labo terpeseri belinna ras dosa si sekalak e. Kenca Adam erbahan sada dosa, ia iadili Dibata janah IkatakenNa ia salah. Tapi kenca mbue kal dosa ibahan manusia e, ibereken Dibata pemere si la metunggung manusia ngalokenca, eme ikataken Dibata man manusia e, "Kam ibenarken."
17Tuhu erdandanken dosa sekalak jelma, kematen nggo ngerajai kerina jelma, erkiteken si sekalak jelma e. Tapi kai si ibahan Jesus Kristus ndauh beliden asilna asangken kai si jadi erdandanken dosa si sekalak e! Kerina kalak si ngaloken lias ate Dibata si la erkeri-kerin ras PemereNa si ngerambakken manusia kempak DiriNa, kalak si bage erkuasa i bas geluhna desken sekalak raja arah Kristus.
18Bagi kerina manusia iukum erdandanken sada dosa, bage me pe kerina manusia ibebasken dingen ngaloken kegeluhen erdandanken sada perbahanen si benar.
19Janah bagi kerina manusia jadi kalak perdosa erdandanken kinilapatuhen si sekalak jelma e, bage me pe kerina manusia iperembak ras Dibata erdandanken kepatuhen sekalak jelma si deban, eme Jesus Kristus.
20Undang-undang reh gelah erbuena kesalahen; tapi i ja reh buena dosa, i je me pe ndauh reh belinna lias ate Dibata.
21Dage, bagi nai dosa erkuasa desken sekalak raja si maba manusia ku bas kematen, bage me pe lias ate Dibata genduari nggo erkuasa desken sekalak raja si ngerambakken manusia kempak Dibata, janah mabai kita ku bas kegeluhen si tuhu-tuhu si rasa lalap arah Jesus Kristus Tuhanta.