Dual PanelRut njumpai Boas i bas pengeriken
1La ndekahsa nari kenca si e nina Naomi man Rut, "Arus kudarami dilaki man perbulangenndu gelah meriah iakapndu.
2Tentu ingetndu maka kita erkade-kade ras Boas. Kari berngi ngerik ia, emaka bagendalah ban.
3Ridilah kam, minaki dagingndu salu minak wangi si merim, janah pakelah uisndu si mejilena. Kenca bage dahi ia ku inganna ngerik, tapi jaga maka ula itandaina kam, seh ia nggo elah man.
4Pepayo i ja ia medem, janah kenca ia tertunduh, talangi cabinna, jenari pedemken arah nahena. Emaka ia kari ngatakenca kai si man bahanen tole."
5Ngaloi Rut nina, "Uga nindu, bage kubahan bibi."
6Emaka berkat Rut ku ingan pengeriken ngelakoken kerina si nikataken bibina man bana.
7Kenca elah man, erlayas kal ukur Boas. Emaka medem ia deherken gandum si nggo ierik ndai. Manjar-anjar ideheri Rut ia, italangina cabin Boas, jenari medem ia arah nahena.
8I tengah berngi medak ia, janah sanga ia erkusur tersengget ia ngidah sekalak diberu medem i deherna.
9"Ise kam?" nina Boas. "Aku, Rut, kalak si la metunggung dat perkuah atendu," nina ngaloi. "Kam kap kade-kade kami si banci jadi penebus kami; emaka mekuah min atendu, ibuatndu min aku jadi ndeharandu."
10Nina Boas, "TUHAN si masu-masu kam." Belinen denga icidahkenndu kekelengenndu man kade-kadendu arah perbahanenndu si genduari enda asangken si nggo ibahanndu man bibindu. Si tuhuna banci nge kam tersereh man anak perana si bayak tah musil adi bage atendu, sabap kerina anak kuta enda metehsa maka kam sekalak diberu si mehuli. Emaka ula atendu aru, kerina si nikatakenndu banci kusehken.
11(Rut 3:10)
12Tuhu nge aku kade-kadendu si banci jadi penebusndu, tapi lit denga sekalak si terdeheren asa aku.
13Emaka sada berngi enda i jenda kam. Pagi erpagi-pagi kusungkun ia, nggit ntah lang ia nehken tanggung jawabna man bandu. Adi nggit ia merandal, adi lang, erpadan aku i adep-adepen TUHAN si nggeluh maka aku ertanggung jawab muat kam jadi ndeharangku. Genduari tunduhken sajalah.
14Jenari medem Rut deherken nahe Boas. Ope denga terang wari lawes Rut i jenari sabap la ate Boas ise pe metehsa maka ia nggo ijumpai Rut i bas ingan e.
15Muatna lawes nina Boas man Rut, "Baba gandum enda, timpus tare uisndu." Emaka ikuseken Boas gandum ndai ku uis Rut, menam dua ayan buena. Jenari isampatina ngangkatsa ku takal Rut. Mulih ia ku rumah, ibabana gandum ndai.
16Sehkenca i rumah isungkun bibina ia nina, "Uga nina, anakku?" Emaka ituriken Rut kerina perbahanen Boas man bana.
17Nina Rut tole, "La iberena aku ngambe-ngambe mulih, emaka iberekenna gandum enda."
18Nina Naomi man Rut, "Adi bage kin anakku, timai sajalah. Ugapa pe sendah labo ia ngadi seh idungina persoalen enda."