Dual PanelUndang-undang TUHAN itulis i babo batu
1Kenca bage, Musa ras peminpin-peminpin Israel ngerana man bangsa e, "Ikutkenlah kerina perentah-perentah si kubereken man bandu wari enda.
2Sanga kam ngepari Lau Jordan, bengket ku negeri si ibereken TUHAN Dibatandu man bandu, pajekkenlah piga-piga batu galang, lapisi alu pelester,
3kenca bage suratken i je undang-undang ras pengajaren enda. Adi kam nggo bengket ku bas negeri si mehumur dingen dem kebayaken si ipadanken TUHAN Dibata nu nini-ninindu man bandu,
4janah adi nggo ikeparindu Lau Jordan e, pajekken batu si bage i das Deleng Ebal, bagi si kuperentahken man bandu i bas wari enda, jenari lapisi alu pelester.
5Pajekken lah sada batar-batar batu, alu la make perkakas besi.
6Sabap kasa kai batar-batar si ipajekkenndu man TUHAN Dibatandu arus maka iban i bas batu si lenga ipahat. I je arus ipersembahkenndu persembahen tutungen,
7janah i je ka pe arus ipersembahkenndu ras ipanndu persembahen persadanndu, janah ermengkahlah atendu i adep-adepen TUHAN Dibatandu.
8I babo batu si ipelester ndai suratken lah terang-terang tep-tep perkatan undang-undang Dibata."
9Emaka Musa, ras imam-imam kalak Lewi, ngerana man kerina bangsa Israel, "Perdiateken ras begikenlah, o bangsa Israel. Sendah kam nggo jadi bangsa TUHAN Dibatandu.
10Emaka ikutken Ia, cikep kerina undang-UndangNa si kubereken man bandu i bas wari enda."
Sumpah man kalak si nimbak Dibata
11Ngerana Musa man bangsa Israel,
12"Kenca nggo kam ngepari Lau Jordan, tedislah suku Simeon, Lewi, Juda, Isakar, Jusup, ras suku Benyamin i datas Deleng Gerisim tupung pasu-pasu e ibelasken.
13Tapi suku Ruben, Gat, Aser, Sebulon, Dan ras suku Naptali tedis lah i datas Deleng Ebal tupung sumpah kebilangen e ibelasken.
14Ibelasken kalak Lewilah kata-kata enda alu sora megang,
15'Dibata numpahi kalak si erbahan berhala batu, kayu, ntah logam, janah si ersembah ku je erbuni-buni. Sabap nembeh ate TUHAN adi nembah man berhala.' Emaka kerina bangsa e ngaloisa, 'Amin!'
16'Dibata numpahi tep-tep kalak si la mehamat man nande ras bapana.' Emaka kerina bangsa e ngaloisa, 'Amin!'
17'Dibata numpahi kalak si ngasak juma temanna si balengen.' Emaka kerina bangsa e ngaloisa, 'Amin!'
18'Dibata numpahi kalak si erbanca papak kalak si pentang.' Emaka kerina bangsa e ngaloisa, 'Amin!'
19'Dibata numpahi kalak si ngerampas hak kalak pertandang, hak anak-anak melumang, ras hak diberu balu-balu.' Emaka kerina bangsa e ngaloisa, 'Amin!'
20'Dibata numpahi kalak si njuruken bapana alu ersada kula ras sekalak diberu bapana e.' Emaka kerina bangsa e ngaloisa, 'Amin!'
21'Dibata numpahi kalak si ersada kula ras rubia-rubia.' Emaka kerina bangsa e ngaloisa, 'Amin!'
22'Dibata numpahi kalak si ersada kula ras turangna sada nande sada bapa, ntah turangna sada nande pedauh bapa.' Emaka kerina bangsa e ngaloisa, 'Amin!'
23'Dibata numpahi kalak si ersada kula ras mamina.' Emaka kerina bangsa e ngaloisa, 'Amin!'
24'Dibata numpahi kalak si munuh erbuni-buni.' Emaka kerina bangsa e ngaloisa, 'Amin!'
25'Dibata numpahi kalak si ngaloken upah guna munuh kalak si la ersalah.' Emaka kerina bangsa e ngaloisa, 'Amin!'
26'Dibata numpahi kalak si la ngikutken kerina undang-undang ras pengajaren Dibata.' Emaka kerina bangsa e ngaloisa, 'Amin!'"