Dual Panel1"O, langit ras doni, begikenlah perkatanku. Dengkehkenlah kai si kubelasken.
2Pengajarenku ndabuh bagi taktak udan sehkenca i bas taneh salih jadi embun. Perkatanku ndabuh bagi udan rintik-rintik ku babo sinuan-sinuan si nguda denga bagi udan remang ku babo dukut si ertunas.
3Ateku muji gelar TUHAN, janah BangsaNa nuriken KehaganNa.
4TUHAN kap pengawalndu si mbisa, serta Ia i bas kerina PerbahanenNa. Dibatandu setia dingen bujur; IlakokenNa kai si mehuli dingen patut.
5Tapi kam la setia, la metunggung pe jadi BangsaNa, sabap kam sada bangsa si perdosa dingen dem alu tipu.
6Bagenda kin arusna perbahanenndu man TUHAN, o kam, bangsa si bodoh dingen la rukur? Bapandu kap Ia, si nepa kam; IbahanNa kam jadi sada bangsa.
7Ukurilah paksa si nggo lepas, paksa si nuria nai; suruh lah bapandu nuriken kai si jadi nai, suruh lah kalak si nggo metua nuriken kerna paksa si nggo lepas.
8Si Meganjangna netapken negeri si jadi bagin bangsa-bangsa; ItentukenNa i ja bangsa-bangsa arus ringan. ItetapkenNa dibata si man sembahen tep-tep bangsa,
9tapi sinursur Jakup IpilihNa jadi SikerajangenNa.
10IdapetiNa bangsa e mampa-mampa arah gurun pasir, sada ingan si mesuni, taneh mesawang si ipaspasi angin meter. IkawaliNa ras iarak-ArakNa ia kerina, bali ras PengaliNa anak MataNa.
11Bagi rajawali ngajari anakna kabang, natang-natang anakna e i babo kabeng si ikirbangken, bage me TUHAN njagai Israel gelah ula guling.
12Sisada kap TUHAN mabai bangsana, la Ia perlu penampat dibata si deban.
13IbereNa bangsana ngkuasai uruk-uruk si meganjang, mangani buah sinuan-sinuan si turah i bas mbalmbal. Idatca tengguli i bas batu-batu; batang saitunna turah mehumur i bas taneh si erbatu-batu.
14Lembuna ras kambingna melala susuna; la lit si terulin asa biri-birina, kambingna, ras lembuna, la lit si terjilen asa gandumna ras lau anggurna.
15Bangsa TUHAN reh bayakna reh dekahna, tapi nggit ngelawan; mbur ia dingen mbestang iban pangan. Itadingkenna Dibata si nepa ia, itulakna si ngkelinisa si mbisa.
16Berhala-berhalana erbahanca mecimberu ate TUHAN perbahanenna si jahat erbahanca merawa AteNa.
17Ibahanna persembahen man dibata-dibata si la tuhu, dibata-dibata si mbaru si la penah itandai nini-ninina, dibata-dibata si la penah iikutken Israel.
18Ilupakenna Dibatana, si ngkelinisa si mbisa, Ia, si nggo mereken kegeluhen man bana.
19Sanga iidah TUHAN si enda, merawa Ia, emaka anak-AnakNa si dilaki ras si diberu e ItulakNa.
20'Lanai ateKu nampati ia,' nina, 'jenari Kunehen me kai si jadi bana, man bangsa si mekeng dingen la setia.
21Alu gana-ganana ipekekena rawangKu, alu gana-gana si palsu ipeturahna ateKu mecimberu. Emaka alu sada bangsa si deban pekulah-kulah Kupekeke ka me rawana; alu sada bangsa kalak motu Kupeturah atena mecimberu.
22RawangKu gurlah bagi api nciluk si nasa lit i doni. Gurlahna seh ku doni kalak mate erbahanca meseng palas deleng-deleng.
23Kutamaken mara si la erkeri-kerin man bana, janah Kupanahken kerina anak panahKu man bana.
24Mate me ia erkiteken kelihen ras sakit panas; mate me ia erkiteken penakit si mejin. Kusuruh rubia-rubia si merawa ngayak-ngayak ia, ras nipe si erbisa nagutisa.
25Erkiteken perang melala kalak mate ampar i pasar-pasar kebiaren ngerimrim i rumah-rumah. Anak perana ras singuda-nguda mate me; subuk anak kitik bage pe tua-tua la lit si pulah.
26Ulin kap min mbarenda Kukernepken ia, gelah ulanai ise pe nginget ia.
27Tapi la Aku ngasup ngidah musuh-musuhna ermegah ukur alu ngataken maka nggo italukenna bangsangKu, sedangken Aku nge situhuna ngeripukken bangsangKu.'
28Israel eme sada bangsa si la lit pengertinna; sitik pe la ia rukur.
29La iangkana ngkai maka ia italuken; la iertina kai si nggo jadi.
30Ngkai maka sekalak naluken seribu, dua kalak naluken sepuluh ribu? TUHAN Dibatana nggo nadingken ia, Dibatana si mbisa nggo ngendesken ia.
31Ieteh musuh-musuhna nge maka dibata-dibatana la ergegeh, la mbisa bagi Dibata Israel.
32Musuh-musuhna, seri macikna ras Sodom ras Gomora, bali kap ras batang anggur si erbuahken buah si pagit dingen lit racunna,
33bali ras lau anggur si ibahan i bas bisa nipe nari.
34Iinget TUHAN kai si nggo ibahan musuh-musuhna; ItimaiNa paksa si payo guna ngukum ia.
35TUHAN la banci la erbalas ras ngukum ia; paksana ia guling seh me; wari keruntuhenna nggo ndeher.
36Ipulahi TUHAN me BangsaNa kenca idahna nggo keri gegehna. Mekuah AteNa man kalak si nembah man BaNa, adi IdahNa maka lanai lit gegehna.
37Kenca bage isungkun TUHAN me BangsaNa, 'I ja dage dibata-dibata 'si mbisa' penalemenndu?
38Iberendu nakan ia alu tabeh-tabeh persembahenndu ras ipersembahkenndu lau anggur man inemenna. Suruh dage ia nampati kam genduari; suruh lah ia mulahi kam.
39Aku, janah Aku kal kap ngenca Dibata; dibata si deban palsu kerina. Aku nge si munuh, Aku ka nge si pegeluhken, Aku nge si ngelukai, Aku ka nge si pepalemken. Janah ise pe la ngasup ngelawan kai si Kulakoken.
40Kuangkat tanKu guna melasken sumpah alu bage tuhu Aku Dibata si nggeluh
41bage me pe Kugarut pedangKu si erndilap guna majekken keadilen. Erbalas Aku man musuh-musuhKu janah Kuukum kalak si ernembeh ate man bangKu.
42Kusuruh anak panahKu ngincep darehna, janah pedangKu mangani jukut kalak si ngelawan Aku. Ise si ngimbangi Aku, sekalak pe la kupulahi; subuk si luka bage pe kalak tabanen la banci la mate.'
43O, bangsa-bangsa, pujilah bangsa TUHAN sabap ise si munuhsa, IukumNa. Erbalas Ia man musuh-MusuhNa, tapi IalemiNa dosa-dosa BangsaNa."
44Musa ras Josua anak Nun melasken ende-enden enda alu megang, gelah banci ibegi kalak Israel.
Pendungi pedah Musa
45Kenca musa nggo dung mereken pengajaren Dibata man bangsa e,
46nina, "Jaga gelah iikutkenndu kerina perentah-perentah si nggo kubereken man bandu sendah. Ulih-ulihilah e nurikenca man anak-anakndu, gelah alu tutus iikutkenna kerina ajaren-ajaren Dibata.
47Kerina pengajaren enda labo si sea-sea, tapi kegeluhenndu kap e. Ikutkenlah emaka nggedang umurndu i negeri si i lepar Lau Jordan ah si nandangi iinganindu."
48I bas wari e ka pe nina TUHAN man Musa,
49"To ku Deleng Abarim, i negeri Moap, petala-tala ras kota Jeriho. Nangkihlah ku Deleng Nebo, jenari tatap lah negeri Kanaan si nandangi Kubereken man bangsa Israel.
50I das deleng eme kam mate, bagi seninandu Harun pe mate i das Deleng Hor,
51erkiteken duana kam la patuh man bangKu i lebe-lebe bangsa Israel. Tupung kam i ulu Lau Meriba, deher kuta Kades i taneh si mesawang Sin, la Aku ipehagandu i lebe-lebe bangsa e.
52Emaka kam terjeng natap negeri e saja ngenca i dauh-dauh nari, tapi labo ibengketindu negeri si nandangi Kubereken man bangsa Israel."