Dual PanelBangsa Dibata (Kel 34:11-16)
1"TUHAN Dibatandu maba kam ku taneh si nandangi iinganindu. IpelawesNa nterem bangsa si deban i jenari. Adi kam ngasak, IpelawesNa pitu bangsa si belinen dingen gegehen asang kam, eme: bangsa Heti, bangsa Girgasi, bangsa Amori, bangsa Kanaan, bangsa Peris, bangsa Hewi, bangsa Jebusi.
2Sanga TUHAN Dibatandu ngendesken bangsa-bangsa e ku teruh kuasandu, janah italukenndu ia, arus maka ibunuhndu ia kerina. Ula bahan perpadanen rassa, ula cidahken perkuah atendu man bana.
3Ula erjabu rassa. Anakndu pe ula bere erjabu rassa
4gelah ula ibabaina anak-anakndu e nilah i bas TUHAN nari jenari nembah man dibata-dibata si deban. Adi bage nembeh TUHAN man bandu, janah minter kam IkernepkenNa.
5Dage, runtuhken lah batar-batar ingan persembahenna, pecahken tugu sembah-sembahenna, penggelken gambar-gambar Dewi Asera dibata-dibatana, ciluk gana-ganana.
6Lakokenlah e, erkiteken kam kap sikerajangen TUHAN Dibatandu. IpeserapNa kam i bas kerina bangsa-bangsa i doni enda nari jadi BangsaNa khusus.
7Ikelengi ras ipilih TUHAN kam labo erkiteken teremen kam asang bangsa-bangsa si deban; kam kap bangsa si kitikna i doni enda.
8Tapi TUHAN ngkelengi kam dingen IsehkenNa AteNa padan si IpadankenNa man nini-ninindu. Eme sabapna maka IselamatkenNa kam alu KuasaNa si mbelin, janah IbebaskenNa kam i bas perbudaken raja Mesir nari.
9Ingetlah, maka TUHAN Dibatandu e ngenca Dibata janah Ia setia kap. Tetap IcikepNa PadanNa, janah IcidahkenNa KekelengenNa si tetap man meribu-ribu kalak si ngkelengi Ia ras ngikutken undang-UndangNa.
10Tapi la ralang-alang Ia ngukum kalak si ernembeh ate man BaNa.
11Emaka genduari ikutlah kai si nggo iajarken man bandu; ikutken lah kerina undang-undang si nggo kubereken man bandu wari enda."
Dat pasu-pasu adi patuh (Ul 28:1-14)
12"Adi ibegikenndu kerina undang-undang enda, janah iikutkenndu alu tutus, TUHAN Dibatandu tetap ncikep PerpadanenNa man bandu, janah IcidahkenNa keleng AteNa si tetap, bagi si nggo ipadankenna man nini-ninindu.
13IkelengiNa ras ipasu-PasuNa kam, gelah erteremna kam, janah nterem pupusndu. Ipasu-pasuna jumandu gelah mbuah pagendu, anggurndu, minak saitundu. Ipasu-pasuna kam alu mereken mbue lembu ras biri-biri man bandu. Kerina pasu-pasu enda IsehkenNa man bandu ibas negeri si nggo IpadankenNa man nini-ninindu nai maka IberekenNa man bandu.
14La lit bangsa si deban i babo doni enda si seri buena ndat pasu-pasu ras kam. La lit sada pe i bas kam nari ntah i bas asuh-asuhenndu nari si la lit anakna.
15Ipedauh TUHAN kerina penakit i bas kam nari. La IbereNa kam kena penakit si mekelek bagi si idahndu sanga i Mesir mbarenda tapi ItamakenNa man musuh-musuhndu.
16Kernepken kerina bangsa-bangsa si iendesken TUHAN Dibatandu man bandu. Ula sitik pe cidahken atendu mekuah nandangi ia. Ula sembah dibata-dibatana, sabap e jadi siding man bandu.
17Ula iukurkenndu maka bangsa e belinen asang kam, ras la terpelawesndu.
18Ula mbiar man bana. Ingetlah uga perbahanen TUHAN Dibatandu man raja Mesir ras rayatna.
19Ingetlah mara kelesa si mejin, si iidahndu alu matandu jine, tanda-tanda kuasa, ras kejadin-kejadin si mejin, ras gegeh si mbelin si ipake TUHAN Dibatandu mbebasken kam; uga PerbahanenNa man bangsa Mesir bage ka me PerbahanenNa nandangi bangsa-bangsa si ibiarindu genduari e.
20IsuruhNa perkis laga ku tengah-tengah kalak e, seh maka kalak si sempat denga kiam ntah cebuni pe ikernepken nge kerina.
21E makana ula kam mbiar man bangsa-bangsa e. TUHAN Dibatandu si ngarak-ngarak kam; Ia kap Dibata si mbisa si arus ibiari.
22Sanga kam ngasak, sitik-sitik IpelawesNa bangsa e. Labo terkernepkenndu ia alu sekaligus, sabap adi sekaligus, maka ertambah-tambah beligan rubia-rubia si meliar, janah e kebiaren man bandu.
23TUHAN ngendeskenca musuh-musuhndu ku teruh kuasandu, janah IguntariNa musuh-musuhndu seh maka ia ikernepken.
24IendeskenNa raja-raja ku teruh kuasandu. Ibunuhndu ia, janah minter imasapkenndu gelarna i doni enda nari. Ise pe la ngasup ngambati kam; ikernepkenndu kerina kalak.
25Ciluk gana-ganana. Ula mengga atendu man pirak tah emas si lit i bas gana-gana e, janah ula buat bandu. Adi ibuatndu, kam nggo kena siding kematen, erkiteken nembeh kal ate TUHAN adi isembah dibata-dibata si deban.
26Ula baba sada pe gana-gana e ku bas rumahndu. Adi ibabandu, sumpah kebilangen si man bana e, e ka pe kena man bandu. Arus maka segat ras ciga atendu gana-ganana e, erkiteken ia nggo kena sumpah TUHAN."