Dual Panel1Enda me ketangkasen si ibereken Dibata man Jesus Kristus guna ncidahken man persuruhen-persuruhen Dibata kai si nandangi pedas jadi. Si enda ipetangkas Kristus man PersuruhenNa Johanes alu nuruh MalekatNa ndahi Johanes.
2Emaka ituriken Johanes me kerina si nggo idahna e. Enda me si ipesehna kerna Kata Dibata dingen si ibenarken Jesus Kristus.
3Malem me ate kalak si ngogeken Kitap enda. Malem me ate kalak si megiken kata nubuat dingen ngikutken kai si tersurat i bas Kitap enda! Sabap nggo ndeher paksana jadi me kerina si tersurat enda.
Salam man perpulungen si pitu
4I bas Johanes nari, man perpulungen si pitu i Propinsi Asia. Lias ate ras kemalemen ate si rehna i bas Dibata nari, e me Dibata si nai nari lit seh asa genduari dingen si lit seh rasa lalap, bage pe si rehna i bas Kesah si pitu nari si ringan i lebe-lebe kursi kinirajan Dibata.
5Bage pe alokenlah perkuah ate ras kemalemen ate si rehna i bas Jesus Kristus nari, saksi si tutus, Anak sintua si nggo ipekeke Dibata i bas si mate nari, si erkuasa nandangi kerina raja-raja i doni enda. Keleng ate Jesus kita, janah arah KematenNa IpulahiNa kita i bas dosa-dosanta nari.
6Ia me si erbahanca kita jadi KinirajanNa, e me jadi imam-imam guna ndahiken dahin Dibata, BapaNa. Iakuilah kemulian ras KuasaNa seh rasa lalap. Amin.
7Nehenlah, ia reh ras embun! Kerina kalak ngidah Ia pagi, subuk kalak si nggo nebak ia pe. Kerina suku-suku bangsa i doni enda nangisi Ia. Payo, bage me jadina. Amin.
8"Aku kap si perlebe ras si pendungina," nina Tuhan, Dibata si Mada Kuasa, nai nari, genduari, seh rasa lalap.
Kristus teridah i bas sada pengenehenen
9Aku Johanes, seninandu, erkiteken persadanta i bas Jesus Kristus. Aku ikut ras kam ngenanami kiniseran ras i bas KinirajanNa bage pe ikut megenggeng nimai kerehen Jesus. Aku ibuang ku Pulau Patmos erkiteken kuberitaken Kata Dibata ras ersaksi kerna Jesus.
10I bas wari Tuhan ikuasai Kesah Dibata aku, jenari kubegi sora megang bagi sora terompet, ngerana i pudingku.
11Nina, "Suratkenlah kai si idahndu, jenari kirimken Kitap e man perpulungen si pitu eme Epesus, Semirna, Pergamon, Tiatira, Sardes, Piladelpia ras Laodikea."
12Kutulihken ku pudi guna ngenen ise si ngerana man bangku e. Kuidah pitu nahe lampu si ibahan i bas emas nari.
13I tengah-tengahna lit kuidah tedis bagi Anak Manusia. IpakeNa jubah si gedang seh ku NaheNa janah sada gendit emas ililetken i bas TentenNa.
14Bukna mbentar bagi kapas, bagi embun si mbentar, janah MataNa erndilap, bagi api;
15NaheNa erkilat-kilat bagi tembaga si nggo ilebur i bas pertukangen jenari isepuh. SoraNa bali ras sora sampuren si mbelin.
16TanNa si kemuhen njemak pitu bintang, i bas BabahNa nari ndarat sada pedang si ntelap, ermata dua. AyoNa ersinalsal bagi matawari tupung ciger.
17Asum kuidah Ia, nerunuk aku i lebe-lebe NaheNa bali ras kalak mate. Jenari ItamakenNa TanNa si kemuhen ku babongku, janah nina, "Ula mbiar! Aku kap si perlebena dingen si pendungina.
18Aku kap si nggeluh! Mbarenda mate Aku, tapi nehenlah, Aku nggeluh rasa lalap. Aku njemaksa kunci kematen ras doni kematen.
19Emaka suratkenlah kai si nggo idahndu, si jadi genduari, bage pe kai si nandangi jadi pagin.
20Enda me antusenna rahasia bintang si pitu si nggo idahndu i bas tanKu si kemuhen bage pe nahe lampu si pitu si ibahan i bas emas nari; bintang si pitu e, e me malekat-malekat perpulungen si pitu, janah nahe lampu si pitu e, e me perpulungen si pitu e."