Alkitab Mobile SABDA
[VER] : [KARO]     [PL]  [PB] 
 <<  Wahyu 12 >> 

Sekalak diberu ras naga

1Jenari lit teridah sada tanda si mbelin i langit, eme sekalak diberu si ruisken matawari; lit bulan i teruh nahena, janah i bas takalna lit mahkota, eme sepulu dua bintang.

2Diberu e sanga mehuli kula, janah erkiteken nggo ndeher paksa mupus, serko-serko ia perban suina.

3Jenari teridah ka sada tanda si deban i langit, eme sada naga si galang, megara rupana. Naga e pitu takalna janah sepuluh tandukna. Pituna takalna ermahkota.

4Alu ikurna isarenna sepertelu bintang-bintang i langit jenari isampetkenna ku doni. Naga e tedis i lebe-lebe diberu e, gelah kenca tubuh anak e minter isarutina.

5Emaka ipupus diberu e sada anak dilaki, si pagin mpermakani kerina bangsa alu ciken besi. Tapi anak e irebut i bas diberu e nari, jenari ibaba ku Dibata dingen ku kursi KinirajanNa.

6Diberu e kiam ku taneh si melungun, ku ingan si nggo isikapken Dibata man bana, i ja ia ikepkep pagin seribu dua ratus enem puluh wari dekahna.

7Kenca bage jadi perang i Surga. Mikael ras malekat-malekatna erperang ngelawan naga e. Janah naga e ras malekat-malekatna ngelawan Mikael,

8tapi talu naga e. Naga e ras malekat-malekatna lanai ipelepas ringan i Surga.

9Naga si galang e isampetken ndarat! Enda me nipe si nuria si igelari Iblis ntah Setan, si nipu i belang-belang doni enda. Isampetken ia ku doni ras kerina malekat-malekatna.

10Jenari kubegi sora megang i Surga nina, "Genduari me paksana Dibata nelamatken BangsaNa! Genduari nggo icidahken Dibata KuasaNa selaku Raja! Genduari Raja Penampat si ipadanken Dibata e pe ncidahken KuasaNa! Sabap si nalahken senina-seninanta, eme si ngaduken ia i lebe-lebe Dibata suari ras berngi nggo isampetken i Surga nari.

11Senina-seninanta nggo menang ngelawan ia alu dareh Anak Biri-biri e, dingen alu Kata Dibata si isaksikenna; janah senina-seninanta e la ngkelengi kesahna seh mate pe.

12Emaka ersuraklah o Surga, bage pe kerina kam si ringan i bas! Tapi andiko, cilaka me doni enda ras lawit, sabap Iblis nggo nusur ku kam, janah merawa ia sabap ietehna maka kentisik nari ngenca kesempaten lit i bas ia."

13Kenca ieteh naga e ia nggo isampetken ku doni, iayakina diberu si nggo mupus anak dilaki ndai.

14Tapi man diberu e ibereken dua kabeng rajawali si galang, gelah banci ia kabang ku inganna i taneh si melungun, i ja ia ikepkep dekahna sada paksa, dua paksa ras setengah paksa ndauh i bas nipe e nari.

15Jenari isemburken nipe e lau mbelin i bas babahna nari kempak diberu e, atena ngombakkenca.

16Tapi isampati doni diberu e. Talang babah doni enda, jenari itelenna lau si ndarat i bas babah naga e nari.

17Merawa kal ate naga e kempak diberu ndai, emaka lawes naga e merangi kesusuren diberu si deban, eme kerina kalak si ngikutken perentah Dibata dingen patuh ndalanken si ngena ate Dibata sue ras si ipetangkas Jesus. (12-18) Janah naga e tedis i babo kersik i tepi lawit.


  Share Facebook  |  Share Twitter

 <<  Wahyu 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel