Alkitab Mobile SABDA
[VER] : [KARO]     [PL]  [PB] 
 <<  Wahyu 13 >> 

Kerna rubia-rubia si dua

1Kenca bage kuidah sada rubia-rubia mulgap i bas lawit nari. Tandukna sepuluh janah takalna pitu. Pituna takalna ermahkota, janah i bas kerina takalna e lit tersurat gelar si enghina Dibata.

2Rubia-rubia si kuidah e tempa-tempa bagi arimo tultul, nahena bagi nahe beruang, janah babahna bagi babah singa. Man rubia-rubia e ibereken naga ndai gegeh si lit i bas ia, kursi kinirajanna, ras kuasana si mbelin.

3Sada takal rubia-rubia ndai tempa-tempa nggo luka mekelek si maba kematen, tapi luka si mekelek e nggo malem. Belang-belang doni kemamangen janah ikutkenna rubia-rubia e.

4Kerina manusia nembah man naga ndai sabap nggo iberekenna kuasana man rubia-rubia e. Rubia-rubia e pe isembahna nina, "Ise kin seri ras rubia-rubia e? Ise kin ngasup ngelawan ia?"

5Rubia-rubia e ipelepas melasken kerna si jahat kal, ia ipelepas erkuasa empat pulu dua bulan dekahna.

6Mulai me ia ngerana enghina Dibata, gelar Dibata ras ingan Dibata bage pe kerina kalak si ringan i Surga.

7Ipelepas ia ngelawan anak-anak Dibata dingen nalukenca. Man bana ibereken kuasa nandangi kerina suku, negara, cakap ras bangsa.

8Kerina manusia si nggeluh i doni nembah me man bana: e me kerina kalak si langa isuratken i bas Kitap Kegeluhen. Gelar-gelar si lit i bas Kitap e nggo isuratken ope denga tembe doni enda, janah Kitap e Anak Biri-biri si nggo igeleh empuna.

9Adi lit kin cupingndu begikenlah!

10Kalak si nggo itetapken guna itaban, tentu itaban me. Janah kalak si nggo itetapken guna ibunuh alu pedang, tentu ibunuh me alu pedang. Erdandanken si enda me maka anak-anak Dibata arus megenggeng dingen tetap tek man Dibata.

11Jenari kuidah sada rubia-rubia si deban mulgap i doni nari. Rubia-rubia e lit dua tandukna bagi tanduk anak biri-biri, janah pengeranana bagi naga.

12I lebe-lebe rubia-rubia si pemena e ipakena kuasa si mbelin si lit i bas rubia-rubia si pemena e. Ipaksana doni ras kerina si ringan i doni guna nembah man rubia-rubia si pemena, si lukana nggo malem ndai.

13Rubia-rubia si peduaken erbahan e tanda-tanda sengget si mbelin. I lebe-lebe kerina manusia ipesusurna ku doni api i langit nari.

14Itipuna kerina manusia si nggeluh i doni alu tanda-tanda sengget si ipelepas ibahanna i lebe-lebe rubia-rubia si pemena e. Isuruhna kerina manusia i doni enda erbahan sada gana-gana mpehaga rubia-rubia si la mate amin pe nggo ilukai alu pedang.

15Man rubia-rubia e ibere kengasupen ngembusken kesah ku bas gana-gana rubia-rubia si pemena, seh maka gana-gana e banci ngerana, bage pe munuhi kerina kalak si la nggit nembah man bana.

16Ipaksaken rubia-rubia e kerina manusia, subuk si kitik bage pe si mbelin, subuk si bayak bage pe si musil, subuk juak-juak bage pe si la juak-juak, gelah itamaken sada cap i bas tanna si kemuhen ntah i bas perdempakenna.

17Cap enda e me kap gelar rubia-rubia e ntah nomor gancih gelarna. Ise pe la banci erbinaga ntah nukur adi la lit i bas ia cap enda.

18I bas si enda perlu kepentaren! Kalak si beluh ngasup ia ngangkasa nomor rubia-rubia e, sabap nomor e, e me kap sekalak manusia. Nomorna e, e me 666.


  Share Facebook  |  Share Twitter

 <<  Wahyu 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel