Dual Panel1Kenca bage kubegi tempa-tempa sora megang i bas perpulungen jelma si nterem si lit i Surga e nari nina, "Pujilah Dibata! Ia kap empuna keselamaten, ras kuasa.
2Ukumen si IberekenNa bujur dingen adil kap. Nggo IukumNa diberu perlua-lua si mbelin, si mabai doni enda papak alu lagu langkahna si perlua-lua e. Nggo iukum Dibata diberu e perbahan ibunuh diberu e suruh-suruhen Dibata."
3Tole nina sora e, "Pujilah Dibata! Cimber api si rehna i bas kuta e nari la erkeri-kerin nangkih."
4Pertua-pertua si dua pulu empat ras rubia-rubia si empat e, erjimpuh nembah man Dibata si kundul i bas kursi kinirajan e nina, "Amin! Haleluya!"
Kerja erdemu bayu Anak Biri-biri
5Kenca bage terbegi sora i bas kursi kinirajan e nari nina, "O kerina juak-JuakNa, subuk si mbelin bage pe si kitik, si erkemalangen man BaNa, pujilah Dibata!"
6Jenari kubegi bagi sora sada perpulungen si mbelin, bagi sora air sampuren si mbelin nina, "Pujilah Dibata! Sabap Tuhan Dibatanta si Mada Kuasa e, nggo kap jadi Raja!
7Ersuraklah kita janah meriahlah siakap. Sipujilah Ia! Sabap nggo seh paksana kerja erdemu bayu Anak Biri-biri e, janah Pengantin si Diberu nggo dung ersikap guna kerja e.
8Pengantin si Diberu e nggo make uis mbentar si erkilat-kilat." (Uis mbentar e, eme perbahanen si mehuli si ilakoken anak-anak Dibata.)
9Kenca bage nina man bangku, "Suratkenlah enda, 'Malem me ate kalak si nggo iundang ku kerja erdemu bayu Anak Biri-biri e.'" Tole nina man bangku, "Kata-kata enda tuhu-tuhu i bas Dibata nari."
10Erjimpuh aku i lebe-lebe NaheNa, ateku nembah man bana, tapi nina man bangku, "Ola sembah aku, sabap aku pe suruh-suruhen nge, bali ras kam, bage pe bali ras senina-seninandu, e me kalak si tetap ncikep kebenaren si ipetangkas Jesus. Sembahlah Dibata!" Sabap si mpegegehi ukur nabi-nabi eme kebenaren si ipetangkas Jesus.
Si ngersak kuda mbentar
11Jenari kuidah langit talang, janah i je lit sada kuda mbentar. Si ngersak kuda e GelarNa si Setia dingen Bujur. Ia ngadili alu bujur ras erperang pe alu bujur.
12MataNa bagi gara api, janah i bas TakalNa melala mahkota. I bas Ia lit tersurat sada gelar, tapi ise pe la ngangkasa seakatan Ia.
13Jubah si IpakeNa icelup alu dareh. Gelar si igelarken man BaNa eme Kata Dibata.
14Tentera-tentera Surga ngikutken Ia alu ngersak kuda mbentar, dingen make baju mbentar si bersih.
15I bas BabahNa nari ndarat sada pedang si ntelap janah alu e pagi ItalukenNa bangsa-bangsa. IperentahNa me bangsa-bangsa alu ciken besi. IerikNa me anggur i bas ingan ngerik anggur pernembeh ate Dibata si Mada Kuasa.
16I bas JubahNa bage pe i bas NaheNa isuratken gelar, "Raja i babo kerina raja, dingen Tuan i babo kerina tuan."
17Jenari kuidah sekalak malekat tedis i babo matawari. Alu sora si megang ngerana ia man kerina perik-perik si sangana kabang i tengah awang-awang nina, "Marilah ras-ras pulung guna kerja man-man si mbelin si ibahan Dibata!
18Marilah man daging raja-raja, puanglima-puanglima ras prajurit-prajurit bage pe daging kuda ras si ngersaksa dingen daging kerina manusia, subuk juak-juak, bage pe la juak-juak, si mbelin bage pe si kitik!"
19Jenari kuidah rubia-rubia e, ras raja-raja doni bage pe tentera-tenterana pulung guna ngelawan si ngersak-kuda ndai ras tentera-tenterana.
20Tapi rubia-rubia e ipenjaraken ras nabi perguak si nggo erbahan tanda-tanda sengget i lebe-lebe rubia-rubia e. (Alu tanda-tanda sengget eme itipu rubia-rubia e kerina kalak si lit i bas ia cap rubia-rubia dingen kerina kalak si nembah patung rubia-rubia e.) Rubia-rubia ras nabina si perguak e, duana iambekken geluh-geluhen ku bas lawit api si gara ras kertah.
21Tentera-tenterana ibunuh alu pedang si ndarat i bas babah si ngersak kuda e nari; jenari kerina perik-perik e mangani dagingna asa besurna.