Alkitab Mobile SABDA
[VER] : [KARO]     [PL]  [PB] 
 <<  Wahyu 2 >> 

Tenah man perpulungen Epesus

1"Man malekat perpulungen i Epesus suratkenlah bagenda: Enda me berita i bas Ia nari, Ia si njemak bintang si pitu i bas TanNa si kemuhen, si erdalan i tengah-tengah nahe lampu emas si pitu.

2Kueteh kai si nggo idahikenndu; Kueteh kuga latihna iakapndu erdahin, janah Kueteh kerna saber atendu. Kueteh maka la atendu bage ngenehen kalak jahat. Kueteh maka nggo iujindu kalak si ngakuken dirina rasul tapi si tuhuna labo ia rasul, janah ietehndu maka perbual nge ia.

3Kam megenggeng, nggo inanamindu kiniseran erdandanken Aku, tapi la kam surut.

4Tapi pandangenKu nandangi kam, e me genduari lanai atendu keleng Aku bagi tangtangna nai.

5Emaka ingetlah uga dauhna kam nggo ndabuh! Jeralah kam! Bahanlah bagi si ilakokenndu tangtangna nai. Adi la kam jera Kudahi me kam janah Kubuat nahe lampundu i bas inganna nari.

6Tapi kiniulinndu pe Kueteh nge, maka la atendu ngena perbahanen kalak Nikola, si Aku pe la ateKu ngena.

7Adi lit kin cupingndu, begikenlah kai si ikataken Kesah Dibata man perpulungen-perpulungen! Man kalak si nggo menang, Kupelepas ipanna buah batang kayu kegeluhen si turah i bas Pardis."

Berita man perpulungen Semirna

8"Man malekat perpulungen i Semirna, suratken bagenda: Berita enda i bas Ia nari, Ia si perlebe dingen si perpudina, si nggo mate tapi nggo nggeluh mulihken.

9Kueteh nge kiniseranndu; Kueteh maka musil kam tapi si tuhuna bayak kap kam! Kueteh nge maka jahat ranan kalak kerna kam, e me kalak si ngaku bana kalak Jahudi, tapi si tuhuna labo ia kalak Jahudi; kalak enda anggota perpulungen Iblis kap!

10Ula kam mbiar kerna kiniseran si nandangi inanamindu. Nehenlah! Iuji Iblis me kam. Piga-piga i bas kam ibuangkenna ku penjara. Sepuluh wari pagi dekahna kerina kam ngenanami kiniseran. Tapi tetaplah kinitekenndu man bangKu seh mate pe, gelah Kubereken man bandu rudang-rudang kegeluhen tanda kemenangenndu.

11Adi lit kin cupingndu begikenlah kai si ikataken Kesah Dibata man perpulungen-perpulungen! Kalak si menang lanai pagi isakiti kematen si peduaken."

Berita man perpulungen Pergamon

12"Man malekat perpulungen i Pergamon, suratken bagenda: Berita enda i bas Aku nari, Ia si lit PedangNa ntelap, dua bobahua.

13Kueteh i ja kam ringan genduari, e me i kursi kinirajan Iblis. Kam patuh man bangKu, janah tetap kam tek man bangKu, subuk pe i bas paksa Antipas, saksingKu si tutus, si ibunuh i bas ingan Iblis.

14Tapi pandangenKu nandangi kam e me kap: Lit piga-piga i bas kam si ngikutken pengajaren Bileam. Bileam nai ngajari Raja Bala. Mbabai kalak Israel erdosa alu man pangan si ipersembahken man berhala-berhala dingen erlua-lua.

15Bage pe lit piga-piga i bas kam si ngikutken pengajaren kalak Nikola.

16Emaka jeralah! Adi lang minter me kam Kudahi janah Kulawan me kalak si la nggit jera e alu pedang si ndarat i bas babahKu nari.

17Adi lit kin cupingndu begikenlah kai si ikataken Kesah Dibata man perpulungen-perpulungen! Man kalak si nggo menang Kubereken sada bagin i bas manna si terbuni nari. Bage pe Kubereken man sekalak-sekalak sada batu rintik mbentar, si nggo isurati alu gelar si mbaru, si labo ise pe metehsa, seakatan si ngaloken batu e."

Berita man perpulungen Tiatira

18"Man malekat perpulungen i Tiatira suratkenlah bagenda: Enda me berita i bas Anak Dibata nari, si MataNa erkinar-kinar bagi api, janah NaheNa erkilat bagi tembaga si nggo isepuh.

19Kueteh kai si idahikenndu. Kueteh nge kerna keleng atendu, kerna tutus atendu, kerna penampatindu, bage pe kerna saber atendu. Kueteh maka buen si idahikenndu genduari asangken si tangtangna nai.

20Tapi pandangenKu nandangi kam e me kap: Ipelepasndu si Isebel, diberu e, ngakuken dirina nabi Dibata. Ngajar ia, janah ibabaina persuruhenKu papak erlagu la mehuli, dingen man pangan si nggo ipersembahken man berhala-berhala.

21Nggo Kubereken kesempaten man bana gelah ia jera i bas dosa-dosana nari, tapi la ia nggit jera i bas erlagu la mehuli e nari.

22Nehenlah, genduari Kusampetken me ia ku bas ingan medem kiniseran, janah temanna erlua-lua e ngenanami kiniseran si mberat, pala jera kin ia i bas perbahanen Isebel e nari.

23Ajar-ajarna pe Kubunuh. Alu bage kerina perpulungen metehsa maka Aku me si meteh ukur ras sura-sura manusia. Kubalas me man bandu sekalak-sekalak rikutken kai si nggo ibahanndu.

24Tapi temanndu si deban, si ringan i Tiatira la ngikutken pengajaren si jahat enda. La ipelajarindu kai si ikatakenna 'bagesna rahasia Iblis'. Kukataken man bandu maka labo Kutambahi babanndu.

25Tapi tetaplah dalanken pengajaren si nggo lit i bas kam genduari seh Aku reh pagi.

26Man kalak si menang, si tetap ndalanken si ngena ateKu seh ku kedungenna, Kubereken pagi bana kuasa bagi si Kualoken i bas BapangKu nari. Kubereken pagi man bana kuasa ngkuasai bangsa-bangsa alu ciken besi, dingen ngeripukkenca bagi kudin taneh. Kubereken pe man bana bintang si cahar.

27(Why 2:26)

28(Why 2:26)

29Adi lit cupingndu begikenlah kai si ikataken Kesah Dibata man perpulungen-perpulungen."


  Share Facebook  |  Share Twitter

 <<  Wahyu 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel