Alkitab Mobile SABDA
[VER] : [KARO]     [PL]  [PB] 
 <<  Wahyu 3 >> 

Tenah man perpulungen Sardis

1"Man malekat perpulungen i Sardis suratkenlah bagenda: Enda me berita i bas Ia nari, si lit i bas Ia pitu Kesah Dibata dingen bintang si pitu e. Kueteh kai si ibahanndu. Gelarna ngenca kam nggeluh tapi si tuhuna mate.

2Emaka kekekenlah, pegegehilah kai si lit denga i bas kam ope denga mate kerina. Sabap la lit Kuidah serta perbahanenndu i lebe-lebe DibatangKu.

3Dage ingetlah kuga nai kam iajari dingen kuga nai kam megikenca. Ikutkenlah kai si iajarken man bandu e, janah jeralah. Adi la kam keke, reh me Aku ndahi kam bagi pinangko, janah la ietehndu katawari Aku reh.

4Tapi lit piga-piga i tengah-tengahndu si i Sardis si tetap njaga pakenna bersih. Ras Aku pagi ia kerina erdalan make uis mbentar, sabap metunggung ia.

5Kalak si menang iuisi me alu uis mbentar si bagenda, janah asa ndigan pe la Kusasapken gelarna i bas Kitap Kegeluhen nari. I lebe-lebe BapangKu, bage pe i lebe-lebe malekat-MalekatNa terang-terangen Kuakui maka ia me sikerajangenKu.

6Adi lit cupingndu begikenlah kai si ikataken Kesah Dibata man perpulungen-perpulungen!"

Berita man perpulungen Piladelpia

7"Man perpulungen i Piladelpia suratkenlah bagenda: Enda me berita i bas Ia nari, Ia si Badia dingen Bujur, si njemak kunci Daud; adi ItalangiNa, ise pe la ngasup ngeruksa, janah adi IerukNa ise pe la ngasup nalangisa.

8Kueteh kai si ibahanndu. Kueteh maka labo asa kai gegehndu; nggo ikutkenndu katangKu janah la ipersokenndu gelarKu. Nehenlah nggo Kutalangi pintun i lebe-lebendu, si ise pe la ngasup ngeruksa.

9Nehenlah! Kalak si ngikutken peraten Iblis, kalak perbual si ngakuken dirina kalak Jahudi, kalak enda anggota perpulungen Iblis kap. Kubahan ia ngadap man bandu janah nembah erjimpuh i lebe-lebendu. Meteh me ia kerina maka keleng ateKu kam.

10Erkiteken ijagandu dirindu tetap ngikutken perentahKu guna saber, emaka kam pe Kujaga gelah selamat i bas paksa kesusahen, e me kesusahen si nandangi reh ku belang-belang doni enda, guna nguji kerina manusia.

11Pedas Aku reh! Jagalah kai si lit i bas kam, gelah ula lit kalak si ngerebuti hadiah kemenangenndu.

12Kalak si menang Kubahan jadi binangun i bas Rumah Pertoton DibatangKu, janah asa ndigan pe la ItadingkenNa ingan e. Kusuratken i bas ia gelar DibatangKu bage pe gelar Kota DibatangKu, Jerusalem si Mbaru si nandangi nusur i surga nari, i bas DibatangKu nari. Kusuratken pe i bas ia gelarKu si mbaru.

13Adi lit kin cupingndu, begikenlah kai si ikataken Kesah Si Badia man perpulungen-perpulungen!"

Tenah man perpulungen Laodikea

14"Man malekat perpulungen i Laodikea, suratkenlah bagenda: Enda me berita i bas si Amin nari, saksi si tutus dingen bujur, ulu kerina si nggo ijadiken Dibata.

15Kueteh kai si nggo ibahanndu. Kueteh maka mbergeh pe kam lang janah melas pe kam lang. Ulin min kam mbergeh ntah melas.

16Tapi perbahan kam mbernge, melas pe lang, mbergeh pe lang, Kuutahken kam i bas babahKu nari.

17Ikatakenndu, 'Bayak aku janah terus tambah kebayakenku, emaka labo aku kurang kai pe.' Tapi si tuhuna la ietehndu maka musil nge kam janah ceda kal ate kalak ngidah percibalndu. Kam musil, pentang dingen manjang-anjang.

18Emaka Kukataken man bandu, tukurlah emas i bas aku nari, emas tulen, gelah kam bayak. Tukur pe uis si mbentar man pakenndu, guna nutupi kulandu si manjang-anjang, si man kemelanken e. Bage pe tukurlah salap mata guna tambar matandu gelah kam erpengidah.

19Kalak si Kukelengi Kuligas ras Kuajarken. Emaka tutus janah jeralah.

20Nehenlah! Aku tedis i lebe-lebe pintun janah kutuktuk. Adi lit kalak megi sorangKu jenari italangina pintun, bengket me Aku ku bas rumahna jenari man Aku ras ia janah man ia ras Aku.

21Kalak si menang Kuatanken kundul ras Aku i kursi KinirajanKu, bagi genduari Aku nggo menang, kundul Aku ras BapangKu i kursi KinirajanNa.

22Adi lit kin cupingndu begiken kai si ikataken Kesah Dibata man perpulungen-perpulungen!"


  Share Facebook  |  Share Twitter

 <<  Wahyu 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel