Dual PanelPENGENEHENEN ESEKIEL SI PEMENA KERNA DIBATA 1:1-7:27 Kursi kinirajan Dibata
1I bas wari si pelimaken, bulan si peempatken, tahun si petelupuluhken, aku, Imam Esekiel, anak Busi, tading i tepi Lau Kebar i Babilon, ras kalak Jahudi si ibuang ku je. Talang langit, emaka kuidah sada pengenehenen kerna Dibata.
2(Tupung e tahun pelimaken Raja Joyakin nggo ibaba ku pembuangen.)
3Sanga aku i tepi Lau Kebar e, kubegi TUHAN ngerana man bangku, janah tuhu-tuhu kugejap KuasaNa.
4Asum kutare ku das, kuidah rembus angin si megegeh i Utara nari. Kilap pe erkinar i bas embun si galang nari, janah langit i sekelewetna ersinalsal. I ja kilap ndai erkinar, i je teridah erndilap-ndilap bagi tembaga.
5I tengah-tengah angin si megegeh e, kuidah empat rubia-rubia biakna bagi jelma,
6tapi tiap rubia lit empat ayona ras empat kabengna.
7Nahena pinter, janah cekilina bali ras cekili jenggi lembu, erndilap-ndilap bali ras tembaga si ipelas.
8Tambah ayona si empat ras kabengna si empat, lit ka pe tanna bali ras tan jelma, sada i teruh tep kabeng.
9Tep-tep rubia ndai, engkirbangken kabengna sepasang, janah ujungna si degesen ras kabeng si deban, seh maka jadi persegi kecibalna empatna. Asum erdalan, radu-radu ia empatna, alu la pada erkusur lebe.
10Tep-tep rubia-rubia ndai lit ka empat erbage tempas ayona: sada bagi ayo jelma arah lebe, bagi ayo singa arah kemuhen, bagi ayo jenggi lembu arah kawes, ras bagi ayo rajawali arah pudi.
11Tep-tep rubia-rubia e, sepasang kabengna iangkat ku das seh maka ujungna pedeges ras kabeng rubia-rubia si pedeher ras ia. Kabengna si dua nari itutupkenna kempak dagingna.
12Tep-tep rubia-rubia ngala empak empat dampar, seh maka kerina ia banci erdalan ku japa pe atena alu la pada lebe erkusur.
13I tengah rubia-rubia ndai lit teridah, tempa-tempa bagi obor gara, si la erngadi-ngadi erdalan ku jah ku je. Gurlah apina, janah mbincar kilap i jenari.
14Rubia-rubia ndai pe kerina kiam ku jah ku je bali pedasna ras kilap.
15Tupung kupernehen rubia-rubia si empat ndai, kuidah empat roda ndeges ras taneh, sada i duru tep-tep rubia-rubia.
16Roda e seri empatna, janah sada-sadai erkilat-kilat bagi batu permata. Tep-tep roda lit ka rodana i tengah, siku percibalna ras si pemena ndai.
17Erkiteken si e roda ndai banci erdalan kempak kerina dampar.
18Lengkar roda ndai dem alu mata.
19Adi erdalan rubia-rubia ndai, roda-roda ndai pe ikut erdalan rassa, janah adi rubia-rubia ndai nangkih ku das, roda ndai pe nangkih ka.
20Rubia-rubia ndai banci lawes ku japa pe atena, janah kai si ibahan rubia-rubia ndai, bage ka kal me perbahanen roda-roda ndai sabap rubia-rubia ndai nge si ngkuasaisa.
21Dage tep-tep kali rubia-rubia ndai erdalan, tah ngadi, tah nangkih ku awang-awang, bage ka me perbahanen roda-roda ndai.
22I babo takal rubia-rubia ndai lit i je si tempasna bagi langit-langit, ijadiken i bas kaca kristal si mesilo ngenenca.
23I teruh langit-langit eme rubia-rubia ndai tedis, sada-sadai engkirbangken sepasang kabengna kempak rubia-rubia si pedeher ras ia janah itutupna bana alu kabengna si sepasang nari.
24Kubegi sorana kabang, bali ras sora geruhguh lawit, bagi sora gejek tentera si nterem, bali ras sora si Mada Kuasa. Adi ngadi ia kabang ikepitkenna kabengna,
25tapi lit denga terbegi sora si reh i bas langit-langit si i babo takalna ndai nari.
26I babo langit-langit ndai lit i je sada si tempasna bagi kursi kinirajan, i bas batu sepir nari jadina, janah si kundul i kursi kinirajan e tempasna bagi manusia.
27Ia teridah ersinalsal bagi tembaga i tengah gara api. Sinalsalna harhar kal,
28janah rupana erbage-bage bali ras benteha. Enda me terang si mesilo nandaken TUHAN lit i je.