Alkitab Mobile SABDA
[VER] : [KARO]     [PL]  [PB] 
 <<  Yehezkiel 26 >> 

Nubuat kerna Tirus

1I bas wari si pemena, bulan si tertentu tahun sipesepuluhsadaken asum kami i bas pembuangen, seh kata TUHAN man bangku nina,

2"O manusia si ermasap-masap, enda me si erbahanca maka ersurak meriah kalak Tirus. Ersurak ia nina, 'Jerusalem nggo getem! Perbinaganna si meriah nggo mesuni. Emaka lanai ia banci ngimbangi kita i bas perbinagan.'"

3Erkiteken si bagenda nina TUHAN si Erdolat, "Aku kap musuhndu, o kota Tirus. Kusuruh melala bangsa nerang kam; ia reh desken galumbang lawit.

4Irontaskenna me tembok-tembokndu janah ibulakkenna menara-menarandu. Kenca bage, kasa taneh si lit i je Kusasap kerina seh maka sengkibul batu si melinang nari ngenca tading.

5Penjala nurung engkirahken jalana i babo batu ndai, batu si tading i bas lawit. Aku TUHAN si Erdolat nggo ngerana. Irampasi bangsa-bangsa me Tirus,

6janah alu pedangna ibunuhna kasa kalak si ringan i bas kota-kota i daraten Tirus. Kenca bage ieteh Tirus me maka Aku kap TUHAN."

7TUHAN si Erdolat ngerana nina, "O Tirus, Kubaba me raja Nebukadnesar i Babilon nari nerang kam. Raja si mbelin e reh i utara nari maba tentera si nterem, rikut ras kuda gereta perang, bage pe tentera erkuda.

8Penduduk si ringan i bas kuta-kuta i taneh daraten mate pagi i bas perang. Musuh engkali parik-parik, erbahan benteng-benteng, janah nusun ampang-ampang desken tembok lako ngimbangi kam.

9Tembok-tembokndu alu perkakas mecahken tembok, janah iruntuhkenna menara-menarandu alu balok-balok besi.

10Gebuk abu si nangkih erkiteken kudana si mbue namburi kam. Sora kudana si ngerintak gereta ras gereta perang, kumetter ibahanna tembokndu asum ia mentas arah pintu gerbang kota si nggo runtuh e.

11Kalak si ngersak kuda ngerattuh arah pasar-pasarndu, ibunuhina pendudukndu alu pedangna. Tugu-tugu batundu si paguh dingen meganjang ibulakkenna.

12Musuh-musuhndu e rate-ate muat kebayakenndu. Iradaskenna tembok-tembokndu janah rumahndu si mejile irontaskenna kerina. Ibuatna kerina batu, perkayunna, bage pe kerina perkakas rumah si nggo runtuh e, jenari igedapkenna ku lawit.

13Ku pengadi kerina ende-endenndu, janah Kupesinik sora kulcapindu.

14Batu si melinang, ingan penjala-jala engkerahken jalana, batu si sada e nari ngenca Kutadingken. Kota e lanai ndigan pe iumban. Aku, TUHAN si Erdolat, nggo melasken katangKu."

15Enda me kata TUHAN si Erdolat kempak kota Tirus, "Kerina penduduk si ringan i tepi lawit gentar tupung ibegina sora nderkuh erkiteken ketalunndu, bage pe sora serko kalak si ibunuhi musuhndu.

16Ngidah si e, raja-raja si erkuasa i daerah tepi lawit nusur i bas kursi kinirajanna nari. Itangtangina jubah kinirajanna ras bajuna si ersulam, jenari nggirgir ia kundul taneh. Perban bagi biarna ngidah kecedan si reh man bandu. La erngadi-ngadi ia nggirgir.

17Kenca bage iendekenna ende-enden penguburen enda man bandu: Nggo getem kal kota si terberita! I lawit pe nggo ilesapken kerina kapalna. Mbarenda lawit ikuasai pendudukna, janah kalak si ringan i tepi lawit gentar ibahanna.

18Genduari tupung paksana ia italuken musuhna, penduduk pulo-pulo nggirgir kerina. Sengget kal kap ia, ngidah kota e nggo seh getemna."

19Nina TUHAN si Erdolat, "Kubahan kam jadi kota si terulang, bali ras kota-kota si la lit pendudukna, Kutamburi kam alu lau lawit si mbages.

20Kusuruh kam lawes kempak doni kematen, maka ersada ras kalak si nggeluh i bas paksa si nai. Kubahan kam tetap ringan i bas doni kematen e, i tengah-tengah keruntuhen si rasa lalap, erteman ras kalak si nggo mate. Emaka ngasa ndigan pe tanehndu lanai iingani, janah kam lanai tama beligan i bas kalak si nggeluh.

21Kam nggo dung, janah ngidah perbahanenKu man bandu, gentar kalak kerina. Idarami kalak gia kam, tapi asa ndigan pe la ia jumpa." Bagenda me nina TUHAN si Erdolat.


  Share Facebook  |  Share Twitter

 <<  Yehezkiel 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel