Dual PanelMesir iumpamaken bagi batang cemara
1I bas wari si pemena, bulan sipeteluken, tahun si pesepuluh sadaken, sanga kami i bas pembuangen, kata TUHAN seh man bangku nina,
2"O manusia si ermasap-masap, kataken man raja Mesir ras rayatna bagenda: Mbelin kal tuhu kuasandu! Ras kai kin terpeseri kemulianndu?
3Kam bali kap ras cemara Libanon, dahan-dahanna mejile dingen merabun. Tuhu meganjang kal kepeken, pucukna seh ku embun.
4Perturahna mejile perban cukup launa, lau belin i teruh taneh mereken nakanna. Taneh inganna turah erlau ibahanna, maler pe i bas kerangen ku kayu-kayu si debanna.
5Erkiteken launa la kurang-kurang, batangna turah jadi meganjang. Ganjangen ia asa kayu si debanna, dahanna galang dingen seh gedangna.
6Perik-perik si melala erbagena, kerina rasar i bas dahan-dahanna. Rubia-rubia kerangen nubis i teruh batangna, bangsa-bangsa doni cilinggem i bas endemna.
7Andiko kayu e, seh kal tuhu jilena, batangna meganjang, dahanna pe gedang ka. Uratna mbages ku teruh, seh ku lau belin si lit i teruh taneh,
8La lit cemara i bas paken Dibata, terpeseri ras cemara si sada enda. La lit kayu si bage paguhna dahanna, la lit kayu i bas paken Dibata bage jilena.
9Aku kap mahanca ia mejile, rikut ras dahanna gedang dingen mbue. Kerina kayu si lit i bas paken Dibata kerina kayu i bas Eden iri ngidahsa,
10Dage, Aku TUHAN si Erdolat, genduari nuriken man bandu kai si nandangi jadi man kayu si pucukna seh ku embun e. Reh ganjangna ka ukurna.
11Erkiteken si e Kutulak ia dingen Kubereken man bangsa si deban. Sue ras kejahatenna, bage me perbahan bangsa si deban ndai man kayu e.
12Sada bangsa si la meteh ate mekuah reh nabah kayu e, jenari itadingkenna. Ranggasna ras dahanna si nggo penggel ndabuh ku kerina deleng ras baluren i belang-belang negeri e. Kerina bangsa-bangsa si gelgel nari ringan i teruhna, lawes me.
13Emaka rehen me perik-perik, jenari ningger i bas kayu si nggo mbulak e, janah rubia-rubia merjaki dahan-dahanna.
14Dage mulai genduari nari, lanai lit ndigan pe batang kayu turah bage ganjangna; ndigan pe lanai lit batang kayu si pucukna seh ku embun aminna uga gia buena lau si idatca. Kerinana la banci lang mate, bali ras manusia si ermasap-masap, jenari pulung ras kerina kalak si nggo nusur ku doni kematen."
15Enda me tole si ikataken TUHAN si Erdolat, "Tupung batang kayu e nusur ku doni kematen, Kusuruh lau si lit i teruh taneh namburisa, gelah e jadi tanda erceda ate. Lau belin la Kubere maler, janah Kupelepas lau si kitik-kitik malerken launa. Erkiteken batang kayu e nggo mate, Deleng Libanon Kubahan jadi gelap, dingen kerina batang kayu i bas kerangen e jadi melus.
16Tupung batang kayu e Kupesusur ku doni kalak mate, sorana mbulak erbahanca nggirgir bangsa-bangsa. Kerina batang kayu Eden, bage pe kerina kayu pilihen i Libanon si ndat lau cukup, si nggo lawes kempak doni si i teruh, ermeriah ukur erdandanken kayu e nggo mbulak.
17Radu ras me kerina berkat ku doni kematen gelah pulung ras si nggo leben mbulak. Janah kerina kalak si ringan i teruh endemna ikerapken ku tengah bangsa-bangsa.
18Batang kayu ndai nggambarken raja Mesir ras kerina rayatna. Batang kayu si turah i Eden pe la lit bage ganjangna ras jilena. Tapi genduari, nusur me ia ku doni kematen bali ras kayu-kayu Eden, jenari pulung ras kalak si la erdibata bage pe si mate i bas peperangen. Enda me katangKu," nina TUHAN si Erdolat.