Alkitab Mobile SABDA
[VER] : [KARO]     [PL]  [PB] 
 <<  Yehezkiel 7 >> 

Lanai ndekahsa Israel ikernepken me

1Kata TUHAN seh man bangku nina,

2"O manusia si ermasap-masap, Aku TUHAN si Erdolat, janah enda me katangKu nandangi negeri Israel: Enda me kedungen man kerina negeri e!

3O Israel, kam nggo dung. Inanamindu me pernembeh ateKu, perban Kuukum kam kerna kai si nggo ibahanndu. Kubalas man bandu kerina lagu langkahndu si melket.

4La Kupelepas kam pulah janah la ateKu mekuah man bandu. Kuukum me kam erkiteken kerina perbahanenndu si melket e, gelah itehndu maka Aku kap TUHAN."

5Tole bagenda nina TUHAN si Erdolat, "Tambah tindih mara reh ndumpang kam.

6Nggo kam dung. Bene me kam. Nggo seh paksandu.

7Bene me kam, o kam kerina kalak si ringan i negeri e. Paksana nggo seh i ja lanai lit pesta-pesta i bas batar-batar si i das deleng. Keguluten nari ngenca kerina.

8Genduari pedas me inanamindu uga sangatna rawangKu man bandu. Kuadili kam sue ras kai si nggo ilakokenndu, janah Kubalas man bandu kerina lagu langkahndu si melket.

9La kam Kupulahi, la ateKu mekuah man bandu. Kuukum me kam erkiteken perbahanenndu si melket, gelah ietehndu maka Aku kap TUHAN, janah Aku me si ngukum kam."

10Wari cilaka nggo reh ku Israel. I jah i je nterem kalak si bunuh-bunuhen. Ukur meganjang nggo seh ku tampuk si meganjangna.

11Erkiteken perbahanen si kejam, nggo turah melala kejahaten. Kai pe lanai pagi lit tading i bas ia, subuk kebayaken bage pe kehagan ras kemulianna.

12Paksana nggo seh. Warina nggo ndeher i ja si erbinaga ras si nukur lanai lit ertina, erkiteken ukumen Dibata ndabuh man kerina kalak, apai pe la erndobah.

13La lit perbinaga si sempat ndatken kai si nggo idayakenna, sabap pernembeh ate Dibata engkenai kerina jelma. Kalak jahat la banci terkelin.

14Terompet ersora, kerina kalak ersikap. Tapi la lit ise pe si lawes erperang, sabap pernembeh ate Dibata ngkenai kerina kalak, apai pe la erndobah.

Ukumen erkiteken dosa-dosa Israel

15I pasar-pasar rubati kalak, janah i bas rumah lit penakit ras kelihen. Kasa kalak si lit i bas juma mate erkiteken rubat, janah kalak si lit i kota mate erkiteken penakit ras kelihen.

16Deba lompat ku deleng-deleng desken ndukur si sengget i bas baluren. Kerina ndehereng erkiteken dosa-dosana.

17Tan kalak jadi kote, janah tiwenna nggirgir.

18Ipakena uis guni, dagingna pe nggirgir kerina. Takalna melinang erkiteken icukur janah kerina kalak ipeme-melaken.

19Emas ras pirakna ibenterkenna ku pasar-pasar desken menterken sampah-sampah, erkiteken subuk emas bage pe pirak la ngasup ngkelini ia tupung TUHAN nehken pernembeh AteNa. Sabap si e lanai terpake guna nehken sura-surana, la banci mesuri beltekna. Emas ras pirak nggo mabai ia kempak dosa.

20Mbarenda megah kal akapna kerna batu-batu permatana si mejile. Tapi erkiteken ipakena si e guna mahan gana-gana si ciga ate ngenenca, emaka ibahan TUHAN ertana e jadi sampah-sampah.

21Nina TUHAN, "Kupekendit dalan bangsa si deban ngerampok kam. Penjahat-penjahat muati kebayaken, jenari iliamina.

22Tupung RumahKu si meherga iliami, tupung perampok-perampok bengket ku bas jenari icemarkenna, sinik saja Aku.

23Kerinana serbut dingen rontang, negeri e dem alu pemunuh-pemunuh, janah i bas kota e melala kal si bunuh-bunuhen.

24Kusuruh ku jenda bangsa-bangsa si ganasna kal janah Kupediat iinganina rumahndu. Kalak si megegehna i bas kam bene ukurna tupung Kupelepas bangsa-bangsa e ngeliami ingan-inganndu ersembah.

25Reh me aru ate. Idaramindu kedamen, tapi ndigan pe la datndu.

26Mata itutupi mara si deban, janah berita-berita si la mehuli la erngadi-ngadi reh man bandu. Meseksek pemindonndu man nabi-nabi gelah ernubuat, tapi la ia ngasup. Imam-imam pe la lit si man ajarenkenna man bangsa e, janah pertua-pertua la lit pedah si man berenkenna.

27Raja erceda ate, anak raja peltep pengarapenna, janah bangsa e kerina nggirgir perban biarna. Kuukum kam erkiteken kai si nggo ilakokenndu, janah Kusalahken kam bagi kam nggo nalahi kalak. Arah e teridah man bandu maka Aku kap TUHAN."


  Share Facebook  |  Share Twitter

 <<  Yehezkiel 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran