Dual PanelJeremia ersoal ras TUHAN
1O TUHAN, adi ersoal ateku ras Kam kerna perkarangku, Kam nge tentu si benar. Amin bage pe ateku nungkun kerna keadilen man BaNdu. Ngkai maka bayak kalak jahat? Ngkai maka sangap kalak si la bujur?
2IpeturahNdu emaka rurat ia, turah janah erbuah ka. Tuhu mehuli nge cakapna kerna Kam, tapi si tuhuna labo Kam diatena.
3O TUHAN ItandaiNdu kap aku, IdahNdu kap perbahanenku, uga kelengna ateku Kam. Tegulah kalak jahat, desken biri-biri si itegu ku penggelehen. Jagailah ia, ngayak seh paksa penggelehen.
4Asa kai nari dekahna kerah negeri kami? Asa kai nari dekahna melus dukut-dukut i juma? Rubia-rubia ras perik-perik mate me, erkiteken bangsa kami jahat perbahanenna. Nina, "Labo idah Dibata perbahanenta."
5Nina TUHAN, "O Jeremia adi ras jelma pe talu kam erlumba, uga banci kam ngasup erlumba ras kuda? Adi i tengah mbal-mbal si teneng pe la kam ngasup tedis, kai banci IbahanNdu i kerangen Jordan?
6Sabap senina-seninandu, sima-simandu jine nggo nghianati kam. Ipersadana arihna lako ngelawan kam. Ula kam tek man bana, aminna mehuli pe rananna bandu."
Ceda ate TUHAN erkiteken BangsaNa
7Nina TUHAN, "Nggo Kutadingken Israel, nggo Kutulak bangsa pilihenKu, bangsa si Kukelengi nggo Kuendesken gelah ikuasai imbang-imbangna.
8Bangsa pilihenKu nggo nundalken Aku, desken singa i tengah kerangen, erdengum sorana kempak Aku, emaka nembeh ateKu ia.
9Bangsa pilihenKu desken perik kap, arah apai nari pe reh kuliki nangkisi ia. Dilo min kerina rubia-rubia si meliar, maka ia reh manganisa kerina.
10Nterem peminpin bangsa si deban nggo encedaken peken anggurKu. JumangKu iperjakina, tanehKu si mejile nggo jadi gurun pasir ibahanna.
11Negeri e ibahanna jadi taneh si mesawang, nggo terulang i adep-adepenKu. Kerina negeri nggo jadi gurun pasir, ise pe la lit si mperdiatekenca.
12Nggo reh kalak si ngerampukisa, deleng-deleng gurun pasir ibentasina. Nggo Kusuruh perang ngkernepken kerina negeri e sekalak pe i je la banci dame geluhna.
13BangsangKu nggo nuan gandum tapi rih nge si ipepulungna. Erdahin erbintuas ia, tapi la kap lit ulihna. Erkiteken rawangKu si gara, emaka la lit ulih jumana."
Padan TUHAN man negeri-negeri sekelewet Israel
14Nina TUHAN, "Lit ateKu si man cakapenken kerna negeri-negeri sekelewet Israel si nggo encedaken negeri si nai Kubereken man bangsangKu Israel. Kubuat kerina bangsa si jahat e i tengah-tengah negerina nari desken ngeruah sinuan-sinuan, jenari Kupulahi Juda i bas ia nari.
15Tapi kenca ia nggo Kuruah, Kucidahken me perkuah ateKu man bana. Kuulihken kerina bangsa-bangsa e ku bas taneh pusaka, ku bas negerina jine.
16Kune alu bulat ukurna ialokenna agama bangsangKu, dingen ersumpah ia nina asa TUHAN nggeluh, bagi pengajarina nai bangsangKu ersumpah i bas gelar Baal, emaka bangsa-bangsa e ikut jadi bangsangKu, dingen terberita.
17Tapi adi la ia patuh kempak Aku, emaka Kuruah ia seh keri, maka kernep. Aku kap TUHAN si nggo melasken kata enda."