Dual PanelCilaka man kalak Juda
1Kenca bage nina TUHAN man bangku, "Aminna pe Musa ras Samuel tedis mindo man bangKu, labo Kucidahken perkuah ateKu man bangsa enda. Suruh bangsa enda lawes. Pelawes ia i bas adep-adepenKu nari.
2Kune isungkunna kam ku ja lawes, kataken man bana katangKu enda: Kalak si mate erkiteken penakit, ku je me perlawesna! Kalak si mate i bas perang, ku je me perlawesna! Kalak si mate erkiteken kelihen, ku je me perlawesna! Si debanna kalak si iangkut jadi tabanen, ku je me perlawesna.
3Aku TUHAN nggo netapken ukumen si empat e man bangsa enda, eme: mate iban perang, maitna isaren-saren biang; perik-perik manganisa, si tadingna itelen rubia-rubia si meliar.
4Gentar Kubahan bangsa-bangsa doni enda ngenehen kalak enda, erkiteken kai si ibahan Manase anak Hiskia i Jerusalem tupung ia jadi raja Juda."
5Nina TUHAN, "O kalak Jerusalem, ise kin rate mekuah man bandu? Ise kin rate ceda kerna kam? Ise kin si reh singgah nungkun entah mejuah-juah kin kam?
6Kam nggo nulak Aku nggo itundalkenndu. Emaka Kudadaken tanKu, Kuripukken kam, sabap nggo latih Kuakap nahan-nahan rawangKu.
7I bas tep-tep kuta i negeri enda, Kupiari kam desken segal. O bangsangKu, Kukernepken kam, Kubunuhi anak-anakndu, erkiteken lalap kam la ngadi ndalanken si jahat.
8Diberu balu-balu i negeri enda teremen asangken kersik i tepi lawit. Anak perana Kubunuhi tupung paksana ia megegeh. Kubahan maka mesui ate nandena. Rempet ia Kupekpek alu ceda ate ras kebiaren.
9Pernanden si kebenen pitu anak nggo pingsan, mengkap-engkap kesahna. Warina si terang nggo salih jadi gelap, bene kemulian dingen mesui atena. Kalak si tading denga Kusuruh ibunuhi imbang-imbangna Aku TUHAN kap si melasken kata enda."
Jeremia jungut-jungut man TUHAN
10Andiko suina ateku! Ngkai maka aku ipupus nandengku aku? Aku terpaksa erjengil dingen ersual ras kerina kalak i bas negeri enda. La pernah ipinjam kalak duitku dingen ngeraih pe aku labo pernah, tapi kerina kalak numpahi aku.
11O TUHAN, jadilah bagi si isumpahkenna e, adi la tuhu kusembah Kam alu mehuli, adi la kin kutotoken sikerajangen imbang-imbangku tupung ia i bas kiniseran ras sangana itindih.
12(La lit kalak si ngasup menggelken besi, terlebih-lebih besi campur tembaga i Utara nari.)
13Nina TUHAN, "Kusuruh imbang-imbangndu ngerampas kebayaken ras simpanen bangsangKu, lako ngukum ia erkiteken dosa-dosa si ibahanna i belang-belang negeri e.
14Kubahan maka ia erdahin guna musuh-musuhna i bas negeri si la itandaina, sabap rawangKu gurlah bagi api dingen rasa lalap la nimpet-nimpet."
15Ningku, "O TUHAN, ItehNdu kap! Inget min aku, sampati aku. Erbalaslah man gunangku nandangi kalak singayak-ngayak aku. Ula sabari BaNdu nandangi kalak e gelah ula seh sura-surana munuh aku. Inget min maka erkiteken Kam nge maka aku iuru-uru kalak.
16Ngerana Kam kempak aku, megermet pemegikenku tep-tep kata. O TUHAN Dibata si Erdolat, SikerajangenNdu kap aku, dingen KataNdu kap si ndemi pusuhku salu keriahen ras kemalemen ate.
17La kubuang-buang waktungku ras kalak si deban, tawa-tawa ersenang-senang. Patuh aku nandangi AturenNdu, janah erkiteken si e kelungunen aku, dingen pusuhku dem alu nembeh ate.
18Ngkai maka lalap aku i bas kiniseran? Ngkai maka ugahku lalap la terpepalem? Ngkai maka la ia malem? Atendu kin erbahanca kitik ukurku, desken lau anak si kerah tupung paksa perlego?"
19Kerna si e ngaloi TUHAN nina, "Adi mulihken kam, Kualoken denga kam, dingen kam jadi suruh-suruhenKu mulihi. Adi lanai ibelaskenndu cakap si sia-sia, tapi erguna, jadi nabingKu ka kam mulihi. Reh me bangsa e mulihi ku kam, janah labo pada kam ndahi ia.
20Kubahan kam bali ras tembok tembaga nandangi ia. Iperangna kam tapi la tertalukenca. Aku kap ras kam, mulahi kam dingen engkawali kam.
21Kupulahi kam i bas kuasa kalak jahat si merawa man bandu. Aku kap TUHAN si melasken ranan enda."