Dual PanelJeremia i bas rumah pande kudin taneh
1Nina TUHAN kempak aku,
2"To ku rumah pande kudin. I jah kari Kubelasken katangKu man bandu."
3Emaka lawes aku ku jah janah i je kuidah pande kudin sangana erdahin i papan penggeningen.
4Kune kudin taneh la mehuli jadina, emaka ibuatna taneh dah e jenari ibahanna ka kudin si deban.
5Kenca bage nina TUHAN man bangku,
6"O kalak Israel, la kin banci Kubahan man bandu bali ras perbahanen pande kudin nandangi taneh dah? I bas tanKu bali kap kam ras taneh dah i bas tan pande kudin.
7Kune i bas sada paksa Kukataken maka ateKu ngeruah, ngeruntuhken ntah ngkerapken sada bangsa entah kerajan,
8tapi adi bangsa e ngasup nadingken kejahatenna, la Kusahunken kai si nggo Kukataken e.
9Arah dampar si deban, kune Kukataken maka ateKu nuan entah manteki sada bangsa entah kerajan,
10tapi dungna bangsa e la patuh man bangKu dingen ilakokenna si jahat, erkusur perukurenKu maka la Kulakoken kai si nggo Kukataken e.
11Genduari dage, katakenlah man kalak Juda, ras man kalak Jerusalem maka nggo seh paksana Aku ersura-sura ngelawan ia, dingen nggo ersikap mereken ukumen man bana. Kataken man bana gelah ia jera. Kataken man bana maka iobahna perbahanen ras lagu langkahna.
12Bagenda me jabapna, 'Lang! Labo lit gunana e. Tetaplah kami mekeng janah jahat bagi ate-ate kami.'"
Bangsa e nulak TUHAN
13Nina TUHAN, "Sungkun bangsa-bangsa kerina, ope si enda pernah kin jadi bagenda? Kalak Israel nggo erbahan perbahanen si mejin!
14Pernah kin ancuk-ancuk deleng Libanon si erbatu-batu la lit saljuna? Pernah kin kerah lau mbergeh si maler i deleng e nari?
15Tapi bangsangKu nggo ngelupaken Aku, itutungna kumenen man gana-gana. Tertuk-tuk ia i bas dalan si idalanina; la ia erdalan i bas dalan si adi, tapi nggo nilah ku dalan si la kendit.
16Ibahanna maka nggo mejin negeri enda, rasa lalap lanai lit ergana. Kerina kalak si mentas arah e ngeri ia ngidahsa, dingen ngupir ia.
17Kukencahken me bangsangKu i adep-adepen musuh-musuhna, desken abu si iembusken angin Timur, Kutundalken me ia, lanai ia Kusampati tupung reh kiniseran."
Pertakin munuh Jeremia
18Kenca bage nina bangsa e, "Ota erpekat kita ngelawan Jeremia! Lit nge pagi lalap imam si ngaturken kita, kalak pentar ngajarken kita, dingen nabi si nehken kata Dibata. Ota sidarami salahna gelah silawan ia, jenari ulanai sibegiken kai si ikatakenna."
19Emaka ertoto aku ningku, "O TUHAN dengkehken pertotonku, begiken kai si ikataken imbang-imbangku kerna aku.
20Ibalas kin kebujuren alu kejahaten? Amin bage pe, lubang nggo ikalina gelah aku ndabuh ku bas. Ingetndu tupung aku reh mindo man BaNdu simehuli guna ia, maka ula keke RawaNdu man bana.
21Tapi genduari O TUHAN, bahan maka mate lumben anak-anakna. Bahan maka mate ia i bas perang. Pelepas diberu-diberu kebenen perbulangen ras anak-anakna. Pelepas parang mbelin mate ibahan penakit, dingen anak perana mate i bas perang.
22Suruh gerombolen ngerampuki rumahna. Ula lumbaken leben. Bahan maka serko ia i bas kebiaren. Nggo ikalina lubang maka aku gedap ku bas, nggo itogengna siding lako nangkap aku.
23Tapi, O TUHAN, ItehNdu kap kerina pertakinna lako munuh aku. Ula masapken kesalahenna, ula alemi dosana. Bahan maka ia guling iadep-AdepenNdu, lakokenlah man bana tupung paksana Kam merawa."