Dual PanelDibata kap si mperdiateken Israel
1Reh kata TUHAN man bangku,
2gelah kumomoken berita enda man kerina kalak Jerusalem. "Kuinget uga kam nai tutusna tupung kam nguda denga. Keleng kal atendu Aku. Tupung tangtangna kam Kuempoi iikut-ikutndu Aku erdalan arah gurun pasir arah negeri si la turah kai pe.
3O Israel, Aku kap ngenca si mada kam; Kuserapken kam jadi sikerajangenKu. Man kerina kalak si ernembeh ate bandu Kubereken kiniseran ras cilaka; Aku TUHAN kap si ngerana."
Dosa nini-nini kalak Israel
4Dengkehken kata TUHAN, o kam kesusuren Jakup, o kam suku-suku Israel.
5Nina TUHAN, "Lit kin lepakKu man nini-ninindu maka itundalkenna Aku? Isembahna dibata-dibata si la erguna, emaka ia jine pe jadi sia-sia.
6La Aku diatena pe, aminna pe aku nge si mulahi ia i Mesir nari, si mabai ia arah taneh mesawang eme negeri taneh si mesawang dingen gurun pasir, negeri si kerah ras erlubang-lubang, la lit sekalak pe kalak nggeluh i je, dingen la lit ise pe erdalan arah e.
7Kutaruhken ia ku negeri si mehumur, ermeriah ukur ia kerna peraninna dingen ngenanami si mehuli i je. Amin bage pe iliamina kange negeri e, ciga ateKu ibahanna negeri si nggo Kubereken man bana.
8Imam-imam lanai nungkun, "I ja kin TUHAN?" Imam-imamKu jine lanai Aku tandaina. Pemerentah-pemerentah mberontak, ngelawan Aku; nabi-nabi ernubuat i bas gelar Baal, jenari isembahna dibata-dibata si la erguna."
TUHAN erpekara ras BangsaNa
9"Emaka tole ateKu erpekara ras bangsangKu, Kutuntut ateKu kesusurenna.
10To ngepar ku negeri Kiprus, janah suruh kalak ku Timur ku negeri Kedar. I je idahndu maka langa pernah lit kejadin si bagenda rupa.
11La lit bangsa-bangsa si deban si pernah isambarina dibatana aminna pe dibata e labo Dibata si tuhu-tuhu. Tapi bangsangKu nggo itukarkenna Aku, Dibata si mereken kemulian man bana, jenari nembah man dibata si la ngasup erbahan kai pe man bana.
12Kuperentahken maka mundu-undu dingen nggirgirlah o langit. Sengget dingen mamanglah atendu!
13Sabap bangsangKu nggo erbahan dosa dua erbage: nggo Aku itundalkenna, sumbul kegeluhenna jenari ikalina bak-bak si cires, si la banci nimpan lau.
Ulih kinilatutusen Israel
14Israel la budak. Ia ipetubuh labo guna iperbudak. Ngkai dage maka ipeburui musuh-musuhna ia?
15Imbang-imbangna desken singa si erngaum man bana, negerina ijadiken jadi gurun pasir dingen kota-kotana meripuk, tuhu-tuhu lanai lit kalak si ringan i je.
16Tuhu, kalak Mempis ras Tampanhes pe, nggo mecahken berku takalna.
17O Israel, kam jine kap erbahanca jadi si e man bandu Itadingkenndu Aku TUHAN Dibatandu tupung Kubabai kam erdalan.
18Dage genduari, kai untungndu lawes ku Mesir? Minem lau Nil atendu? Dingen kai untungndu lawes ku Assur? Nginem lau Eprat atendu?
19Kejahatenndu jine kap si ngukum kam, itundalkenndu Aku erbahanca atendu mesui. Itadingkenndu Aku TUHAN Dibatandu, la kam mbiar ngenehen Aku. Erkiteken si e kam jine ngenanami si pagit ras suina. Aku TUHAN si Erdolat si Mada Kuasa kap si melasken kata."
20Nina Dibata si Erdolat, "O Israel, nai nari itulakndu kuasangKu, la iikutkenndu Aku, la kam nembah man bangKu. Datas ancuk-ancuk deleng iteruh batang kayu galang erlua-lua kam alu nembah kam man dibata-dibata.
21Kusuan kam desken sinuan-sinuan si Kupilih, i bas batang anggur si mejilena nari kal. Tapi genduari nehenlah uga jadina, kam nggo bali ras si macik-macik desken anggur si lanai terpake.
22Aminna pe kam icuci alu sabun si melalana ugupna tapi teridah maka kam lalap melket ibahan dosandu.
23Uga banci nindu labo kam si ngeliami dirindu jine, maka la kam pernah nembah man Baal? Nehenlah uga kam erbahan dosa i berneh-berneh, nehenlah uga lagu langkahndu. Kam desken leto pingki beru-beru i bas kerincuhen. Kiam ku jah ku je la ertentun,
24terus kempak taneh si mesawang. Tupung i bas kerincuhen, ise ngasup njagai ia? La mesera akap buganna njumpaisa; katawari saja pe banci jumpa rassa.
25O Israel, ula pelepas luka nahendu, ula pelepas kerah kalah-kalahndu, tarun kam ngayak-ngayak dibata-dibata si deban. Tapi nindu, 'Aku lang! La ateku mulihken! Aku erngena ate man dibata-dibata si deban, janah kuikutken ateku ia.'"
26Nina TUHAN, "Desken pinangko terdat nangko mela kal iakapna, bage me kerina kam bangsa Israel mela kal iakapndu -- subuk raja-rajandu, pegawaindu, bage pe imam-imamndu dingen nabi-nabindu.
27Juru me iakapndu -- ikatakenndu maka batang kayu kap bapandu dingen batu kap si mupus kam. Si enda jadi erkiteken labo Aku itulihkenndu tapi itundalkenndu. Tapi tupung kam i bas kiniseran, reh kam ndahi Aku gelah Kukelini kam.
28I ja kin gana-gana si ibahanndu man dibatandu jine? Tupung kam i bas kiniseran pindo dage penampat man bana -- di banci kin! O Juda, seri kap lalana dibatandu ras kota-kotandu.
29Kai kin perkarandu? Ngkai maka erpekat ngelawan Aku?
30Kuukum kam, tapi la lit gunana. La kam nggit Kuajarken. Desken singa nguda bage me pemunuhindu nabi-nabindu.
31O kalak Israel dengkehken kai si Kukataken! Pernah kin Aku desken gurun pasir man bandu? Pernahkin Aku bali ras negeri kegelapen ras negeri cilaka? Dage ngkai ikatakenndu maka ibahanndu me bage atendu ngena, dingen ndigan pe lanai atendu mulihken man bangKu?
32Banci kin lupa singuda-nguda nandangi perhiasenna, entah penganten nandangi paken pengantenna? Tapi bangsangKu nggo ndekah kal ngelupaken Aku, lanai tertaktaki dekahna.
33Cerdik kal kam muat dalan ndarami atendu ngena, perban nggo semal kam ras kejahaten.
34I bas uisndu terdat dareh kalak musil si la ersalah labo dareh pinangko si mbongkar rumahndu.
35Aminna pe bage, nindu: Labo aku ersalah! Tentu lanai ate TUHAN nembeh man bangku? Tapi Aku TUHAN la banci la ngukum kam, erkiteken ipersokenndu dosa-dosa si nggo ibahanndu.
36Ipeterukndu man bandu alu nembah kempak dibata-dibata bangsa si deban. Erkiteken Mesir pe juru nge iakap kam bali ras sanga kam i Assur.
37La banci lang mulih ka nge kam i Mesir nari, mungkuk takalndu, dingen mela kal iakapndu, sabap Aku TUHAN, nggo nulak kerina si jadi penalemenndu; la lit untung kai-kai pe idatndu i bas si e nari."