Dual PanelDua raga isin buah ara
1Icidahken TUHAN man bangku dua raga isin buah ara si iamparken i lebe-lebe Rumah Pertoton. (Si enda jadi kenca Nebukadnesar, raja Babilon nggo ngangkut Joyakin anak Joyakim raja Juda, jadi tabanen ku Babilon, rikut ras peminpin-peminpin, pande besi, bage pe kalak si beluh-beluh.)
2Raga si pemena isin buah ara si seh kal jilena, eme buah si tangtangna tasak. Raga si sada nari isina buah ara macik-macik dingen sitik pe la terpan.
3Nina TUHAN man bangku, "Kai si iidahndu, Jeremia?" Ningku ngaloisa, "Kuidah buah ara. Si mejile lanai tanggung jilena. Si macik seh kal macikna, maka sitik pe la terpan."
4Kenca bage nina TUHAN man bangku,
5"Aku kap TUHAN Dibata Israel, kalak si nggo iangkut ku Babilon Kupeseri ras buah ras si mejilena janah Kuperdiateken ia alu kiniulin.
6Kujagai ia janah Kubaba ia mulih ku negeri enda. Kupanteki me ia dingen la Kuruntuhken. Kusuan me ia, la Kuruah.
7Kupeturah i bas pusuhna maka merincuh ia nandai Aku, maka Aku kap TUHAN. Emaka ia kap jadi bangsangKu dingen Aku jadi Dibatana, sabap mulihken ia man bangKu alu bulat ukurna.
8Tapi bali ras buah ara si macik enda si sitik pe la terpan perbahan macikna, bage me perbahanenKu nandangi Sedekia raja Juda, rikut ras peminpin-peminpinna ras man kalak Jerusalem si debanna si tading i negeri enda entah pe si nggo miser ku Mesir.
9Kudabuhken man bana cilaka maka nggirgir kerina bangsa-bangsa babo doni enda. Kerina kalak nguru-ngurusa, kalak ngguro-guroken ia, nggombang-gombangi ia i bas ingan i ja ia nggo Kukerapken. Kerina bangsa-bangsa e make gelarna jadi sumpah.
10Kubereken man bana perang, kelihen, dingen penakit seh maka sada pe lanai lit tading i negeri enda si nggo Kubereken man bana ras man nini-ninina nai."