Dual PanelJeremia iaduken
1La ndekah kenca Joyakim anak Josia jadi raja Juda,
2nina TUHAN man bangku, "Tedis kam i kesain Rumah Pertoton jenari momokenlah kerina kata si Kuperentahken man kalak si reh i kota-kota Juda nari lako ersembah i je. Sengkebabah ranan pe ula lit tading.
3Banci jadi idengkehkenna jenari itadingkenna perbahanen si jahat. Kune bage perbahanenna, Kuobah ukurKu kerna sura-surangKu ngkernepken ia erkiteken kejahaten si ilakokenna."
4Isuruh TUHAN aku melasken RananNa man bangsa enda: "Aku kap TUHAN, si nggo ngatakenca maka la banci la kam patuh man bangKu alu ngikutken ajar si nggo Kuajarken man bandu.
5Arus iperdiatekenndu ranan suruh-suruhenKu, nabi-nabi si la erngadi-ngadi Kusuruh ku tengah-tengahndu. La pernah ikutkendu kai si ikatakenna.
6Adi tetap kam la megiken katangKu, Kulakoken me man Rumah Pertoton enda bagi si Kubahan man Silo, dingen kerina bangsa i babo doni enda make gelar kota enda jadi sumpah."
7Kerina kalak, nabi-nabi ras imam-imam si lit i bas Rumah Pertoton megisa kai si kukataken enda.
8Emaka kenca aku nggo dung melasken ranan si nggo iperentahken TUHAN, minter aku itangkapna iherna serko-serko nina, "Terpaksa kam ibunuh erkiteken kai si ibelaskenndu e!
9Ngkai maka ikatakenndu i bas gelar TUHAN, maka Rumah Pertoton enda jadi bali ras Silo, dingen kota enda ikernepken janah sekalak pe lanai lit nggeluh i je?" Kenca bage iulung jelma si nterem e aku.
10Kenca peminpin-peminpin Juda megi kai si nggo jadi, reh ia kiam i bas istana raja nari ku bas Rumah Pertoton e, dingen ibuatna ingan arah Pintu Gerbang si Mbaru.
11Nina imam-imam ras nabi-nabi e kempak bangsa e dingen kempak peminpin-peminpinna, "Kalak enda patut iukum rutang kesah erkiteken pengeranana ngelawan kotanta enda. Nggo ibegindu e alu cupingndu jine."
12Emaka ningku, "TUHAN kap si nuruh aku ngatakenca kerina si nibegindu kubelasken ngelawan Rumah Pertoton dingen kota enda.
13Arus maka iobahndu pergeluh dingen perbahanenndu jenari la banci la kam patuh man TUHAN Dibatandu. Adi bage perbahanenndu emaka IobahNa PerukurenNa kerna pengeradas si AteNa IdabuhkenNa man bandu.
14Tapi adi aku, lit kap i bas kuasandu! Lakokenlah kai si iakapndu payo ras bujur.
15Tapi si pasti eme: adi ibunuhndu aku, kam ras kalak si ringan i bas kota enda erdosa munuh kalak si la ersalah, sabap TUHAN nge sinuruh aku mereken persinget enda man bandu."
16Emaka nina peminpin-peminpin ras bangsa e kempak imam ras nabi-nabi e, "Kalak enda ngerana man banta i bas gelar TUHAN Dibata; la kap oratna ia ibunuh."
17Kenca bage piga-piga pertua bangsa e tedis jenari ikatakenna man kalak si pulung i je nina:
18"Tupung Hiskia jadi raja Juda Nabi Miha i Moreset nari ngerana man bangsa emaka TUHAN si Erdolat nggo melasken ranan enda nina, 'Sion itenggalai bali ras juma, Jerusalem jadi pinugun batu meruntuh, deleng Rumah Pertoton jadi kerangen.'
19Raja Hiskia ras kalak Juda la munuh Miha. Tapi Hiskia malang man TUHAN jenari ipindona perkuah AteNa. Emaka iobah TUHAN UkurNa kerna cilaka si AteNa IdabuhkenNa man bangsa e. Genduari nandangi ndabuh me cilaka e man banta jine."
20(Kalak si deban si ngerana i bas gelar TUHAN ngelawan kota ras bangsa e bali ras si ibahan Jeremia eme Uria anak si Semaya i Kiriat Jearim nari.
21Tupung Raja Joyakim ras tenterana dingen pegawai-pegawaina megi kai si ikataken Uria ibunuh raja atena ia. Tapi perbahan ibegi Uria sura-sura raja e, emaka mbiar kal ia, lompat ia ku Mesir.
22Tapi isuruh Raja Joyakim si Elnatan anak Ahbor ras piga-piga kalak si deban ngelegi Uria ku Mesir.
23Ibaba kalak ndai Uria mulih man Raja Joyakim. Ibunuhna Uria jenari ibenterkenna maitna ku kuburen rayat.)
24Tapi erkiteken aku isampati Ahikam anak si Sapan, aku la iendesken man jelma si nterem gelah ibunuh.