Dual PanelJeremia nukur juma
1I bas tahun pesepuluteluken Sedekia jadi raja Juda, eme pesepuluh waluh tahunken Nebukadnesar jadi raja Babilon, ngerana TUHAN man bangku.
2I bas paksa si e tentera raja Babilon sangana nerang Jerusalem janah aku sangana itutup i bas kesain pengawal istana kerajan.
3Raja Sedekia nutup aku dingen nuduh aku kerna kata Dibata si nggo kubelasken, "Kupelepas me kota enda italuken raja Babilon.
4Janah Raja Sedekia pe la pulah. Iendesken me ia ku bas tan raja Babilon. Jumpa ia pedempak ayo dingen ngerana sebabah.
5Sedekia iangkut ku Babilon, dingen i jah me ia tading seh ngayak Aku mperdiateken ia. Aminna pe ilawanna bangsa Babilon tapi labo lit untungna man bana. Aku TUHAN kap si nggo melasken ranan enda."
6Nina TUHAN man bangku,
7"Seninandu Hanamel anak Salom senina bapandu, reh me mindo gelah itukurndu jumana si i Anatot i bas daerah Benyamin, sabap kam me kade-kadena si ndeherna dingen lit hakndu nukur taneh e man gunandu."
8Emaka sue ras kata TUHAN, reh Hanamel ndahi aku ku kesain e janah mindo gelah kutukur juma e. Arah e kuteh maka TUHAN tuhu-tuhu nggo ngerana man bangku.
9Kutukur taneh e i bas Hanamel nari jenari kutimbang duit man galarna. Ergana sepulu pitu duit pirak.
10Kuteken dingen kutama matere surat perjanjin e i adep-adepen saksi, jenari kutimbang duitna alu timbangen.
11Emaka kubuat duana surat jual beli e subuk si isegel si isina eme kerna kontrak ras kecibal juma e, bage pe si la isegel,
12jenari kubereken man Baruh anak si Neria kempu si Mashea. Kubereken e man bana e lebe-lebe Hanamel ras saksi-saksi si ikut neken surat perjanjin jual beli e dingen i lebe-lebe kalak si sangana kundul i kesain e.
13I lebe-lebena kerina, ningku kempak Baruh,
14"TUHAN si Mada Kuasa, Dibata nu Israel nggo nuruh kam muat surat-surat e, subuk surat si isegel bagepe si la isegel, jenari namakenca ku bas sada guci taneh dah, gelah banci isimpan guna tahun-tahun si reh.
15TUHAN si Mada Kuasa Dibata nu Israel nggo ngatakenca maka rumah, juma dingen peken anggur pe itukur ka i bas negeri enda."
Pertoton Jeremia
16Kenca nggo kubereken surat perjanjin jual beli ndai man Baruh ertoto aku ningku,
17"O TUHAN si Erdolat, Kam kap si nggo enjadiken langit ras doni alu gegeh dingen KuasaNdu. La kap lit si metahat man BaNdu.
18Nggo IcidahkenNdu keleng AteNdu si tetap man meribu-ribu kalak, tapi IukumNdu ka kalak erkiteken dosa orang tuana. Kam kap Dibata si mbelin dingen erkuasa; GelarNdu TUHAN si Mada Kuasa.
19IbahanNdu rencana-rencana si mbelin janah IlakokenNdu perkara-perkara si mbisa. IdahNdu kai pe si ilakoken kalak dingen erbalas Kam rikutken perbahanenna.
20Nai nggo IlakokenNdu tanda kuasa dingen tanda sengget i Mesir dingen IteruskenNdu ngelakokenca ngayak wari enda, subuk i Israel bage pe i tengah-tengah kerina bangsa-bangsa. Emaka i ja pe itandai kalak nge Kam.
21Alu erbahan tanda-tanda sengget si erbahanca gentar musuh kami, IpakeNdu gegeh KuasaNdu maba bangsa Israel ndarat i Mesir nari.
22IberekenNdu man bana taneh si mehuli dingen mehumur sue ras PerjanjinNdu man nini-ninina.
23Tapi tupung ia seh ku bas negeri e dingen nggo ibuatna e jadi sikerajangenna la ikutkenna perentahKu, ntah nggeluh sue ras AjarenNdu. Sada pe la ilakokenna kai si IsuruhNdu, emaka IdabuhkenNdu kecedan man bana.
24Kalak Babilon nggo erbahan benteng pengepungen kelewet guna ngerebut kota enda e janah iperangna. Perang, kelihen dingen penakit erbahanca kota e ndabuh ku bas kuasana. Banci kap InenNdu, maka kerina si nggo IkatakenNdu nggo tuhu jadi.
25Amin bage pe, O TUHAN si Erdolat, Kam kap si nggo nuruh aku nukur juma e i adep-adepen saksi, aminna pe IetehNdu maka kota e nandangi ikuasai kalak Babilon."
26Kenca bage nina TUHAN man bangku,
27"Aku kap TUHAN, Dibata kerina manusia. La kap lit si metahat i bas Aku.
28Kubereken ateKu kota enda man Nebukadnesar raja Babilon, ras man serdaduna. Ikuasaina me kota enda e,
29jenari icilukna. Itutungna kota e enda jadi abu bage pe rumah si nggo erbahanca nembeh ateKu, perbahan i tutungina kumenen man Baal i datas tarum rumah e, dingen icurcurkenna lau anggur jadi persembahen man dibata-dibata si deban.
30I bas bena-benana nari kin sejarah kalak Israel ras Juda nggo nembeh ateKu ibahanna dingen merawa ateKu erkiteken kai si ilakokenna.
31Kalak si tading i bas kota enda nggo nembeh ateKu ibahanna janah ipekekena rawangKu menaken kin i bas mantekisa nari. Nggo Kuputusken maka Kukernepken ateKu kota enda e.
32Erkiteken perbahanen si jahat si nggo ilakoken kalak Juda ras Jerusalem, radu ras raja-rajana, peminpin-peminpinna, imam-imam ras nabi-nabina.
33Ipudikenna Aku, aminna pe tetap ia Kuajari, la ia nggit erlajar dingen la ibegikenna.
34Itamakenna gana-gana si ciga ateKu i bas Rumah Pertoton si nggo ipajekken man inganKu isembah dingen iliamina ingan e.
35Ipajekkenna batar-batar man Baal i Baluren Hinnom, i je ipersembahkenna anakna dilaki ras diberu man Dewa Moloh. Labo ia Kusuruh ngelakoken si e dingen la pernah pe lit i bas ukurKu maka ilakokenna si bage jenari gelah erdosa kalak Juda."
Padan si mereken pengarapen
36Nina TUHAN Dibata nu Israel man bangku, "O Jeremia, ikataken bangsa emaka perang, kelihen dingen penakit si mahanca kuta e ndabuh ku bas kuasa raja Babilon. Genduari dengkehken tole kai si Kukataken.
37Kupepulung ateKu bangsa enda i negeri-negeri inganna nggo Kukerapken erkiteken nembeh ateKu dingen rawangKu si gara, jenari Kubaba ia mulih ku ingan enda dingen Kupelepas ia nggeluh i je alu dame.
38Emaka ia jadi bangsangKu dingen Aku jadi Dibatana.
39Kubereken man bana sada perayaken i bas geluhna eme: enghamati Aku i bas kerina paksa, guna kiniulinna dingen kiniulin sinursurna.
40Kubahan sada perjanjin si tetap ras ia. Lanai pernah Aku ngadi erbahan si mehuli man bana, dingen Kubahan maka erkemalangen ia man bangKu alu bulat ukurna. Alu bage lanai ndigan pe Aku itadingkenna.
41Senang Kuakap ngelakoken si mehuli man bana dingen Kutetapken maka tetap ia tading i bas negeri enda.
42Bali ras cilaka si nggo Kudabuhken ku bangsa enda, bage me ateKu mereken si mehuli man bana sue ras si nggo Kujanjiken.
43Ikataken bangsa emaka negeri enda bali me pagi ras gurun pasir si la iingani manusia entah pe rubia-rubia, janah nandangi ibereken me man kalak Babilon. Tapi itukuri ka me pagi mulihi juma i negeri enda.
44Itukur kalak juma e jenari itekenna surat perjanjinna, isegel, janah idilo saksi-saksi. Si enda jadi i daerah Benyamin, i bas kuta sekelewet Jerusalem, i bas kota-kota Juda ture-ture uruk negeri e, i berneh-berneh, dingen arah Selatan Juda. Kuulihken me bangsa enda ku negerina jine. Aku TUHAN kap si nggo melasken ranan enda."