Dual PanelTenah man Sedekia
1Nina TUHAN man bangku tupung Raja Nebukadnesar ras tenterana i Babilon nari bage pe tenterana kerina, tentera bangsa-bangsa dingen bangsa-bangsa si nggo i teruh kuasana, sangana nerang Jerusalem ras kota-kota si ndeher rassa.
2TUHAN Dibata nu Israel ngataken man bangku maka aku lawes ngataken man Sedekia raja Juda, "Aku TUHAN, Kuendesken me kota enda man raja Babilon jenari icilukna me.
3Kam labo pulah. Kam itangkap jenari iendesken man bana. Jumpa kam pedempak ayo dingen ngerana sababah ras ia; emaka kam ibaba ku Babilon.
4O Sedekia, dengkehkenlah kai si Kukataken e. Labo kam mate i bas perang.
5Kam mate alu dame; bali ras kalak nutung kumenen man nini-ninindu eme raja-raja si arah lebendu, bage me pe kam, itutungna nge kumenen man bandu. Itangisina kam nina: 'Nggo mate rajanta' Aku TUHAN kap si nggo melasken ranan enda."
6Kenca bage kupeseh kata enda ndai man Raja Sedekia i Jerusalem.
7Tupung e tentera raja Babilon sangana nerang kota e. Lakis ras Aseka pe iserangna. Kota si dua e nari ngenca kota si tading erbenteng i Juda.
Penipun man budak-budak
8Raja Sedekia ras kalak Jerusalem nggo erbahan sada perjanjin mbebasken
9budak-budakna kalak Heber, subuk dilaki entah diberu gelah ulanai lit kalak Heber iperbudak seninana kalak Heber.
10Kerina bangsa e ras peminpin-peminpinna nggo ersada arihna mbebasken budakna, dingen lanai ndigan pe iperbudakna. Tuhu ibebaskenna budak-budak e,
11tapi dungna erkusur ka ukurna, ibuatna ka budak e jenari ipaksana gelah jadi budak ka.
12Kenca bage TUHAN,
13Dibata nu Israel nuruh aku ngataken kata enda man bangsa e, "Nggo Kubahan perjanjin ras nini-ninindu, tupung Kupulahi ia i Mesir nari dingen tupung Kubebasken ia i bas perbudaken nari. Kukataken man bana,
14maka tep-tep pitu tahun sekali arus ibebaskenna kerina budak Heber si nggo erdahin enem tahun man bana. Tapi nini-ninindu la diatena Aku, la ibegikenna katangKu.
15Piga-piga wari si nggo lepas nggo ikusurndu ukurndu jenari idahikenndu bagi si ngena ateKu. Kerina kam nggo ersada arihndu mbebasken seninandu bangsa Israel si jadi budak, ibahanndu pe perjanjin i adep-adepenKu i bas Rumah Pertoton ingan Aku isembah.
16Tapi dungna erkusur ka ukurndu janah ihinandu Aku. Ibuatndu ka mulihi budak-budak si nggo ibebaskenndu bagi sura-surana. Ipaksandu ka ia jadi budak mulihi.
17Emaka, Aku TUHAN ngatakenca maka kam la patuh man bangKu. La iberekenndu kebebasen man seninandu kalak Israel. Merandal. Genduari Kubereken man bandu kebebasen, eme: kebebasen lako mate i bas perang, penakit ras kelihen. Kubahan maka ngeri iakap kerina bangsa i doni enda ngidah si Kubahan man bandu.
18Pegawai-pegawai Juda ras Jerusalem radu ras pegawai istana, imam-imam dingen kerina peminpin-peminpinna nggo erbahan sada perjanjin ras Aku alu erdalan arah kelang-kelang dua ngkeret lembu si nggo ibelah duakenna. Tapi nggo icedakenna perjanjin e dingen la icikepna janjina. Emaka Kulakoken man bana bagi perbahanenna nandangi lembu e.
19(Yer 34:18)
20Kuendesken ia kempak musuh-musuhna si munuh ia atena, janah perik ras rubia-rubia si meliar mangani maitna.
21Sedekia raja Juda ras pegawaina pe kuendesken man kalak si atena munuhsa. Kuendesken ia man tentera Babilon si nggo ngadi nerang kam.
22Kuperentahken maka mulih ia ku kota enda e. Iperangna, ikuasaina jenari icilukna kota enda e. Kubahan maka kota-kota Juda bali ras gurun pasir seh maka la lit sekalak pe enggeluh i je. Aku TUHAN kap si nggo melasken ranan enda."