Dual PanelJeremia ras terpuk Rehab
1Tupung Joyakim anak Josia jadi raja Juda, ngerana TUHAN man bangku nina,
2"To dahi terpuk Rehab dingen ngerana rassa. Kenca bage baba ia ku sada bilik i bas Rumah Pertoton jenari bereken ia minem anggur."
3Emaka kubaba terpuk Rehab ku bas Rumah Pertoton -- gelarna eme Jaasama anak Jeremia si deban, eme anak Habasinia, dingen kerina anak-anak ras senina-seninana.
4Jenari kubaba ia bengket ku bas Rumah Pertoton. Kubaba ia kempak bilik ajar-ajar Nabi Hanan anak Igdalia. Bilik e inganna i datas ruangen Maaseya anak Salum, sekalak si penting i bas Rumah Pertoton janah ndeher ras bilik pegawai-pegawai si deban.
5Kenca bage kuampeken calung-calung ras guci-guci si dem lau anggur i lebe-lebe kalak Rehab, jenari ningku, "Inemlah anggur enda."
6Tapi nina njabapsa, "Kami la minem anggur. Nini-nini kami Jonadap anak Rehab ngataken man kami, maka kami ras kesusuren kami asa lalap la banci minem anggur.
7Ikatakenna maka kami la banci majekken rumah pe, la banci erjuma i bas negeri enda dingen labo banci nuan entah nukur kebun anggur. Iperentahkenna maka tetap kami nggeluh i bas kemah-kemah, gelah kami banci nggeluh ndekah i bas negeri enda desken kalak pertandang.
8Kerina perentah Jonadap nggo ikutken kami. Kami la pernah minem anggur, subuk ndehara kami, bagepe anak-anak kami si dilaki entah si diberu.
9La ipajekken kami rumah man ingan kami tading -- kami nggeluh i bas kemah-kemah -- la lit peken anggur kami, la lit juma kami, la lit gandum kami. Kerina si iperentahken nini-nini kami Jonadap ipatuhi.
10(Yer 35:9)
11Tapi tupung Raja Nebukadnesar nerang negeri enda, iputusken kami lawes ku Jerusalem, lompat i bas kalak Babilon dingen kalak Siria nari. Eme sabapna maka kami tading i Jerusalem enda."
12Kenca bage TUHAN si Mada Kuasa Dibata nu Israel nuruh aku lawes ngatakenca man kalak Juda ras Jerusalem, "Aku TUHAN nungkun man bandu. Ngkai maka la kam nggit megiken Aku janah patuh man perentahKu?
13(Yer 35:12)
14Kesusuren Jonadap, nggo patuh nandangi kai si iperentahken, gelah ula ia minem anggur, dingen seh kal ku bas wari enda la inemna. Tapi la erngadi-ngadi Kusehken katangKu man bandu, tapi la ikutkenndu.
15La erngadi-ngadi Kusuruh, suruh-suruhenKu ku tengah-tengahndu janah nggo ikatakenna man bandu gelah itadingkenndu dalan geluhndu si jahat jenari gelah ilakoken kai si bujur. Nggo ipersingetina kam gelah ula nembah ras ngelai dibata-dibata si deban, gelah kam banci tetap enggeluh i bas negeri si nggo Kubereken man bandu ras man nini-ninindu. Tapi la ibegikenndu, dingen diatendu pe Aku lang.
16Kesusuren Jonadap matuhi perentah nini-nininta, tapi kam la patuh kempak Aku.
17Emaka genduari Aku TUHAN si Mada Kuasa, Dibata nu Israel, Kudabuhken me ku babo Juda ras Jerusalem kerina cilaka si nggo Kujanjiken. Si e Kubahan erkiteken la ibegikenndu rananKu la kam ngaloi tupung Kulebuh."
18Kenca bage kukataken man terpuk Rehab kai si nggo ikataken TUHAN si Mada Kuasa Dibata nu Israel, "Nggo ikutkenndu perentah si ibereken nini-ninindu Jonadap man bandu, nggo ikutkenndu kerina perentahna, dingen nggo ilakokenndu kerina si iperentahken man bandu.
19Emaka Aku TUHAN si Mada Kuasa Dibata nu Israel erjanji maka tetap lit anak-anak Jonadap si dilaki si ngelai Aku."