Alkitab Mobile SABDA
[VER] : [KARO]     [PL]  [PB] 
 <<  Yeremia 46 >> 

Mesir italuken i Karkemis

1Enda me kata TUHAN man bangku kerna bangsa-bangsa,

2si pemena eme kerna Mesir. Enda me kata TUHAN kerna tentera Neko, raja Mesir, si italuken Nebukadnesar raja Babilon i Karkemis deher Lau Eprat i bas peempat tahunken Joyakim anak Josia jadi raja Juda:

3"Nina puanglima-puanglima Mesir, 'Sikapken ampang-ampangndu, ota kita ku peperangen!

4Pasanglah kudandu, ersaklah. Erbarislah, pakelah topi wajandu. Garut lembingndu Pake baju besindu!'"

5Nungkun TUHAN nina, "Kai si ibahanndu? Alu nggirgir mulihken ia. Tentera surut kerina si mbisana gentar, ngerbul kerina asa gegehna lanai itulihkenna pe ku pudi.

6Si kiam e lanai ngasup kiam, tenterana lanai banci pulah. I Utara, i tepi Lau Eprat, tertuktuk dingen guling kap ia.

7Ise kin ah si keke desken Lau Nil, desken lau belin si nggo mulsak launa?

8Kalak Mesir kap ah, si keke bai Lau Nil bagi lau belin si nggo mulsak launa. Nina Mesir, 'Keke aku nutupi doni enda. Kulemba kerina kota ras kalak si enggeluh i je.

9Suruh maka lawes kerina kuda suruhlah maka erdalan gereta perangna. Suruhlah kerina serdadu kalak Sudan, kalak Libia maba ampang-ampang bage pe kalak si beluh manah i Lidia nari.'"

10Enda wari TUHAN si Mada Kuasa si Erdolat. Erbalas AteNa sendah, sendah iukumna AteNa imbang-ImbangNa. PedangNa mangani seh besur, ngincep dareh seh puas. Sendah TUHAN erbahan persembahen gelehen, i Utara i tepi Lau Eprat.

11O kalak Mesir laweslah ku Gileat darami i jah tambar! Sia-sia nge kerina tambarndu! Sada pe la ngasup mereken kejuah-juahen man bandu.

12Nggo tereteh man bangsa-bangsa maka mela kal iakapndu. Kerina kalak nggo megi perserkondu. Tep-tep tentera terantuk kempak tentera si deban, dingen duana ia guling ku taneh.

Kerehen Nebukadnesar

13Tupung Nebukadnesar raja Babilon reh nerang Mesir seh kata TUHAN man bangku nina,

14"Momokenlah i bas kota-kota Mesir, i Migdol, Mempis, Tahpanhes: 'Ersikaplah, pertahankenlah, kerina kelewetndu nggo ilemba perang!

15Ngkai maka guling Apis dibatandu si medolat? Perban igudam TUHAN!'

16Kerina tenterandu tertuktuk emaka guling. Sekalak ngerana man si debanna nina: 'Pedasken! Ota kita mulih ku bangsanta, maka ula kita ipan pedang imbangta!'

17Bahanlah gelar si mbaru man raja Mesir, 'Si meganjang ngerana si bene kesempatenna.'

18Aku TUHAN si Mada Kuasa, Aku kap Raja. Aku kap Dibata si enggeluh, ningKu: Bagi Deleng Tabor ganjangen asangken deleng si deban, bagi Deleng Karmel tedis i babo lawit, bage me gegehna kalak si reh ngelawan kam.

19O kalak Mesir ersikaplah kam guna iangkut tertaban! Mempis jadi me bagi gurun pasir, jadi radas me, lanai sekalak pe si nginganisa.

20Mesir bali kap ras lembu nguda si mbur, iserang sada untung-untung i Utara nari.

21Tentera-tentera si upahina pe bali ras anak lembu mbur si la ergegeh. Lanai terbanca tedis, lanai terbanca erperang, kerina ia milih jenari ngerbul. Nggo seh wari cilaka man bana eme paksa kebenenna.

22Perkiam kalak Mesir, erdeso bagi sora nipe tupung reh deherna tentera musuhna. Imbangna reh maba kapak bali ras kalak si nabah batang kayu

23si ngeradasken kerangen tua. Teremna la terbeligai tenterana teremen asangken labang.

24Juru kal iakap bangsa Mesir ia italuken bangsa si reh i Utara nari, Aku TUHAN kap si nggo melasken ranan enda."

25Nina TUHAN si Mada Kuasa, Dibata nu Israel, "Kuukum me Amon, gana-gana Tebes, rikut ras Mesir, dibata-dibatana, ras raja-rajana. Kulegi me raja Mesir ras kerina kalak si ernalem man bana,

26jenari ngendeskenca kempak kalak si ersura-sura munuh ia, eme Nebukadnesar raja Babilon ras tenterana. Kenca si e lit kang kalak si tading i Mesir bagi si nggona. Aku TUHAN kap si nggo melasken ranan enda."

TUHAN mulahi BangsaNa

27"O bangsangKu, ula kam mbiar, o Israel ula kam gentar. I bas negeri si ndauh e: Kupulahi me kam, i bas negeri inganndu tertaban nari. Mulih me kam ku negerindu dingen alu dame enggeluh kam i je. Kam aman dingen la lit si erbanca kam mbiar.

28Reh me Aku ngkelini kam. Kukernepken me bangsa-bangsa, inganndu genduari kuerapken tapi kam, la kukernepken. Labo kam la Kuukum, tapi Kuukum kam, bujur kap pengukumKu. Aku TUHAN kap si nggo melasken ranan enda."


  Share Facebook  |  Share Twitter

 <<  Yeremia 46 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel