Dual PanelKerajan si dame
1Kesusuren Raja Daud bali ras batang kayu si nggo itabah. Tapi bagi tunas si turah i bas tongkehna nari, bage me pe i bas kesusuren Daud nari keke sekalak raja.
2Kesah TUHAN ringan i bas ia, mereken pemeteh ras kuasa merentah rayatna. Ietehna peraten TUHAN, mehamat ia kempaksa,
3janah keriahenna, eme matuhi TUHAN. La erpalasken si teridah saja ia ngadili, tah pe erpalasken kai si ibegina;
4tapi alu bujur irungguina perkara kalak musil, janah ibelana kalak si tertindas. Arah perentahna kalak si ersalah iukum, janah kalak jahat ikernepken.
5Iperentahna rayatna alu kebujuren ras kebenaren.
6Serigala ras biri-biri nggeluh ras-ras alu dame, arimo tultul medem-medem ras anak kambing. Anak lembu nggagat ras anak singa, danak-danak si mpermakanisa.
7Lembu ras beruang ngagat ras-ras, anak-anakna pe ras medem-medem. Singa, nggala gagatenna, bali ras lembu.
8Anak si kitik denga la kena kai pe, aminna erguro-guro pe ia deherken nipe si erbisa.
9I Sion, i Deleng si Badia nu Dibata, lanai lit si ncedai tah pe kejahaten. Doni enda dem alu pemeteh kerna TUHAN bali ras lawit dem alu lau.
Kalak si terbuang mulih pagi
10Reh me warina maka raja si mbaru i bas kesusuren Raja Daud nari desken panji-panji man bangsa-bangsa. Bangsa-bangsa e reh ndahi ia janah ingan raja e jadi ingan si mulia.
11Adi nggo pagi seh wari si e, ipake TUHAN ka KuasaNa sekali nari, jenari IbabaNa mulih kerina BangsaNa si tading denga i Assur ras i Mesir, i negeri-negeri Petros, Sudan, Elam, Babilon ras Hamat, bage pe i bas pulau-pulau i tengah lawit.
12Iangkat Tuhan me pagi sada panji-panji jadi tanda man kerina bangsa-bangsa, maka IpepulungNa me mulihi kalak Israel ras Juda si merap, janah IbabaNa mulih i belang-belang doni nari.
13Kerajan Israel lanai nciani kerajan Juda, janah Juda lanai perimbang ras Israel.
14Ras-ras pagi ia nerang kalak Pilisti si lit arah Barat janah ngerampasi bangsa-bangsa si lit arah Timur. Italukenna me kalak Edom ras Moap, janah kalak Amon patuh man bana.
15Ikerahi TUHAN Teluk Sues, janah IsuruhNa rembus angin si melas lako ngkerahi Lau Eprat. Pitu wari ngenca pagi ItadingkenNa lau anak, seh maka ise pe ngasup erdalan ngeparisa.
16Lit pagi pasar si mbelang i Assur nari jadi dalan mulih man kalak Israel si nggeluh denga i jah, bali ras dalan man nini-ninina nai asum ia nadingken Mesir.