Dual PanelKata persinget man Kerajan Utara
1Cilaka me kerajan Israel; kinijilenna nggo melus desken mahkota rudang-rudang i bas takal peminpin-peminpin si sangana mabuk. Takalna merim erkiteken minak wangi, tapi ampar bagi kalak mate erkiteken mabuk.
2Nehenlah, isuruh TUHAN sekalak si mbisa merangi kalak e. Ia reh desken udan baho rikut ras angin si ersiu-siu, desken udan meder erdeso, desken banjir mbelin si ergalun ngombakken si nasa lit, janah namburi kerina negeri.
3Mahkota si imegahken peminpin-peminpin si pemabuk e iperjaki me.
4Rudang-rudang kemulianna si nggo melus e, nandangi lesap desken buah ara si pemena i bas musimna, minter iputikken jenari ipan kenca nggo tasak.
5Reh me warina maka TUHAN si Mada Kuasa desken mahkota rudang-rudang si mejile nandangi BangsaNa si tading denga.
6IberekenNa perukuren si bujur man kalak si dahinna ngerunggui, janah KinimbisanNa man kalak si ertugas engkawali pintu-pintu gerbang kota i bas serangen kalak nari.
Jesaya ras nabi-nabi Juda si pemabuk
7Subuk nabi-nabi bage pe imam-imam nggo mabuk kerina seh maka perdalanna pe mbewat-mbewat. Mbuesa minem anggur ras samsu emaka jurembat janah melimber iakapna. Erkiteken si e nabi-nabi lanai ngangka pengenehenen si ibereken Dibata man bana, janah imam-imam pe lanai ngasup erbahan keputusen kerna perkara-perkara si ipeseh man bana.
8Mejana nggo serser kena utahna, janah lanai lit sitik pe si la meluat.
9Jungut-jungut kalak e kerna aku nina, "Man ise kin akapna ia ngajar e? Ise kin merluken pengajarenna? Danak-danak si kitik si mbaru ngadi minem i bas nandena nge ngenca perlu pengajaren ah.
10Iajarina ka atena kita surat, kata ku kata, kalimat ku kalimat, bagi danak-danak si kitik."
11Adi la kam nggit megiken katangku, ugapa pe isuruh Dibata nge bangsa si deban ngajar kam alu cakap si asing man bandu.
12TUHAN erdilo, janah iberekenna AteNa pengadi-ngadin ras pengapul man bandu kerina, tapi la kam nggit megikenca.
13Em sabapna maka iajarken TUHAN AteNa man bandu surat, kata ku kata, kalimat ku kalimat. Jenari tertuktuk me kam, tep-tep kali kam njingkang. Terdareh me kam kena siding, jenari ibaba jadi tabanen.
Batu palas Sion
14Genduari begikenlah o penguasa-penguasa si megombang, si merentah bangsa enda i Jerusalem.
15Megah akapndu sabap nggo ibahanndu perdamen ras kematen janah nggo ibahanndu perpadanen ras doni kematen. Tek kal kam maka adi reh cilaka labo kam kena, sabap iakapndu tipu banci jadi penalemenndu janah pertakin si ibahanndu sekawalndu.
16Tapi enda me genduari kata i bas TUHAN si Erdolat nari nina, "Kutamaken i Sion sada batu palas si paguh dingen nteguh, sada batu suki si meherga i ja lit tersurat nina, 'Kiniteken si enteguh eme kap saber ate.'
17Si jadi tali timbangen i bas palas e, eme kap keadilen, janah tali sipatna eme kebujuren." Kata guak si jadi penalemenndu e keri me iombakken udan baho, janah ketenengenndu ikernepken lau belin.
18Perpadanen si ibahanndu ras kematen, isasapken janah persetujun si ibahanndu ras doni kematen ipeltepken. Erkiteken si e, adi reh cilaka ikenaina me kam.
19Rulih-ulih kam itendengna tep-tep erpagi-pagi, suari ras berngi. Tep-tep kali reh berita i bas Dibata nari, tep-tep kali ka reh kebiaren man bandu!
20Emaka kam pagi desken kalak medem si tersinget i bas kuan-kuan nina: Ipegesteng ate nahe, gendeksa ingan medem; icabini ate daging kitiksa uis man cabin.
21Sabap keke me TUHAN erperang bagi perbahanenna i das Deleng Perasim ras i Baluren Gibeon, guna nehken sura-SuraNa -- aminna gandil gia akap manusia PerbahanenNa e. IdungiNa me DahinNa, eme DahinNa si mbelin dingen mejin.
22Ula kam tawa nguru-nguru pertenget si kubahan enda. Adi mekarus kam, reh tahatna me akapndu pulah, sabap nggo kubegi keputusen TUHAN si Mada Kuasa guna ngkernepken negeri enda kerina.
Kepentaren Dibata
23Begikenlah katangku, perdiatekenlah kai si kuturiken man bandu.
24Labo lit perjuma si lalap nenggala ras ngeroka jumana.
25Tapi adi nggo mesai jumana, tentu iamburkenna benih sinuan-sinuan, umpamana jera ras lenga. Ierdangkenna gandum ras dawa erteran-teran janah arah duru isuanna jaung.
26Ietehna uga ndahiken dahinna, sabap nggo iajari Dibata ia.
27Labo pernah ipakena palu-palu si mberat lako muat buah jera ntah buah lenga si nggo iperani; tapi ipakena ciken si menahang bagi payona.
28Sanga ngerik gandum pe labo lalap igegehina ngeriksa seh getem buahna. Ietehna uga cara pedalan gereta arah babo gandum e gelah ula sempat ceda buahna.
29Kerina kepentaren enda rehna i bas TUHAN si Mada Kuasa nari. Kerina rencana Dibata dem alu kepentaren, emaka tetap nge seh RencanaNa e.