Dual PanelKetetapen ukur si ibereken Dibata
1Nina Dibata, "Sinik kam, begiken Aku, o negeri-negeri si ndauh! Bahanlah pengadunndu, ibereken kesempaten ngerana man bandu. Mari dage kita runggu, guna nentuken ise si bujur tuhu.
2Ise kin reh i Timur nari sekalak si mbisa aminna ku japa pe ia lawes tetap menang ia? Ise mereken kemenangen man bana ngelawan bangsa-bangsa, seh maka kerina raja-raja banci ikuasaina? Raja-raja e bagi abu ibahanna alu pedangna, janah ikernepkenna bagi segal alu anak panahna.
3Ielis-elisna raja-raja e janah la lit si ngolangisa, taneh narus lanai idedehna perban pedasna pengelisna.
4Ise dage mahanca si e kerina jadi? Ise ngatursa kerina kejadin-kejadin i doni tangtangna nari? Aku, TUHAN si nggo lit i bas bena-benana nari, janah tetap lit seh ku bas pendungina pe pagi.
5Kalak si ringan i bas negeri si ndauh, nggo ngidahsa kai si nggo Kubahan. Emaka gentar dingen nggirgir ia kerina; jenari pulung ia lako arih-arih.
6Kerina ia sisampat-sampaten, nina sapih-sapih ia, 'Tetapkenlah ukurndu.'
7Tukang kayu mujiken tukang emas gelah reh tetapna ukurna. Bage ka pe tukang si erbahan lapis gana-gana gelah reh jilena, pegegehi ukur kalak si ngeleketkenca. Nina, 'Mejile tuhu bekasndu matri.' Kenca bage ipakuken kalak ndai gana-gana emaka ula mbulak.
8Tapi kam o Israel, suruh-suruhenKu, kam kap bangsa pilihenKu, kesusuren Abraham temanKu.
9Kubaba kam i bas ujung doni nari; Kudilo kam i bas tepi si ndauhna nari. Kukataken man bandu, 'Kam kap suruh-suruhenKu; nggo Kupilih kam, janah labo kam Kutulak.'
10Ula mbiar, sabap Aku kap ras kam! Aku kap Dibatandu, emaka ula atendu aru. Kusampati kam, janah Aku mahanca kam megegeh. Kukawali kam, janah Kukelini pe.
11Kalak si merawa man bandu, mela me akapna perban talu. Kalak si erbebe ngelawan kam, kernep me janah masap pe.
12Idaramindu me musuh-musuhndu, tapi la kam jumpa, sabap nggo lesap kerina.
13Aku kap TUHAN Dibatandu, si ncikep tanndu si kemuhun. Janah Kukataken man bandu, 'Ula kam mbiar, Aku nampati kam.'"
14Nina TUHAN, "Ula kam mbiar o Israel. Aminna pe kam kitik dingen la ergegeh bagi gaya. Sabap Aku kap si nampati kam; Aku, Dibata si Badia nu Israel, Aku si ngkelini kam;
15Kubahan kam desken sada perpalu pengeriken, papan si ergigi, mbaru dingen entelap. Igudam kam me deleng-deleng seh perper, janah uruk-uruk pe jadi getem bagi segal.
16Iangin kam ia, emaka mistak ia ibabaken angin; marpar merap ia kerina, iembusken angin kaba-kaba. Jenari ersurak-surak me kam i bas Aku, TUHANndu, ipujindu me Aku, Dibata si Badia nu Israel.
17Tupung bangsangKu si musil e ndarami lau, tupung kalah-kalahna kerah perban muasna, tapi i japa pe lau la idatna. Kenca bage Aku, TUHAN megiken pertotonna. Aku Dibata nu Israel, asa ndigan pe la Kutadingken bangsangKu.
18Arah datas uruk si kerah, Kubahan maler lau belin, janah sumbul lau, pultak i bas baluren-baluren. Gurun pasir Kusalihken jadi paya, janah taneh si kerah dem sumbul si erburak-burak.
19I bas gurun pasir Kupeturah kayu cemara, batang saitun, rambah mir, bage pe kayu akasia. I bas taneh si mesawang Kusuan kayu eru, rikut ras batang pengkih ras kayu cemara.
20Idah kalak me pagi si enda janah ietehna maka Aku TUHAN nggo ngelakoken si enda. Kenca iperdiatekenna ngerti me ia, maka Dibata si Badia nu Israel si njadikenca kerina."
Dibata-dibata palsu la erkuasa janah la erguna
21Bagenda nina TUHAN, raja nu Israel: "O dibata-dibata bangsa si deban kerina, mari turiken kebenarenndu; cidahken dage, adi payo kin lit kuasandu.
22Mari dage ku jenda, turiken maka ieteh kami kai si nandangi jadi i bas wari si pepagi. Turiken dage kejadin-kejadin si nggona, maka iantusi kami kai ertina.
23Turikenlah kai si nandangi jadi pagi, gelah ieteh kami maka tuhu-tuhu dibata. Bahanlah cilaka si mbelin tah pe si mehuli, maka kami mbiar dingen jengang ngidahsa.
24Kam ras perbahanenndu tuhu-tuhu labo kai kal pe, si nembah kam pe ciga kal ate!
25Nggo Kupilih sekalak dilaki si ringan i Timur; janah Kubaba ia gelah iserangna i Utara nari. Raja-raja iperjakina desken merjaki kubang, desken pande kudin merjaki taneh dah.
26Ise nai kam ernubuat kerna kejadin e, seh maka banci ikataken kami maka tuhu nge cakapndu e. Tapi la lit sekalak pe kam ngataken si e, la lit ise pe megisa kam melaskenca.
27Aku, TUHAN, Aku me si pemena nehken berita man Sion; Kusuruh sekalak suruh-suruhenku nehken berita si mehuli ku Jerusalem.
28Adi Kupepayo i bas kam dibata-dibata e kerina, la lit sada pe kam ngasup mereken ajarna. Adi Kubahan penungkunen man bandu la lit sada pe kam beluh mereken jabapndu.
29O kerina dibata-dibata, labo sada pe kam erguna; la bo lit kai pe si banci ibahanndu, sabap la kam ergegeh, janah la erkuasa pe."