Dual PanelDibata erpadan ngkelini BangsaNa
1O Israel, bagenda nina TUHAN si nepa kam, "Ula kam mbiar, sabap la banci lang Kukelini kam. Kudilo kam alu GelarNdu; Aku kap si njadiken kam, janah kam sikerajangenKu.
2Adi ikeparindu lau si mbages, Aku ras kam; la kam gedap i bas kesusahen si mesangat. Adi ibentasindu api si gurlah, la meseng kam; la kam talu i bas percuban si mberat.
3Sabap Aku kap TUHAN Dibatandu, Dibata si Badia nu Israel, si Engkelinindu. Mesir Kubereken jadi tebusndu, Sudan ras Seba jadi gancihndu.
4Perban meherga kal Kuakap kam; medolat, janah keleng ateKu kam, emaka Kubereken kalak si deban jadi gancihndu, janah bangsa-bangsa si deban jadi gancih kesahndu.
5Dage ula kam mbiar, sabap Aku kap ras kam. I Timur i Barat nari, kam ras kesusurenndu Kupepulungi.
6Kuperentahken man Utara ras Selatan, maka ipulahina kerina, ulanai itaban, gelah bangsangKu ipemulih i bas negeri si ndauh nari, i bas kerina tampuk doni nari.
7Sabap Israel eme kap bangsa si igelari alu gelarKu, si Kutepa ras Kujadiken guna kemulianKu."
Israel eme saksi TUHAN
8Nina TUHAN, "Suruh bangsangKu ngadap i bas pengadilen. Lit matana, tapi pentang ia; lit cupingna, tapi pasek ia.
9Suruh ngadap kerina bangsa-bangsa. Apai kin dibata-dibatana si ngasup nuriken si nandangi jadi? Kerna kejadin si genduari, lit kin nai pernah iturikenna? Pelepas dibata-dibatana e maba saksina, gelah iturikenna kebenarenna, gelah ibuktikenna kebenaren kata dibata-dibatana.
10O bangsa Israel, kam kap saksingKu; Kupilih kam gelah jadi suruh-suruhenKu, maka itandaindu janah tek kam man bangKu, gelah iertindu maka Aku ngenca Dibata si tuhu-tuhu. La lit Dibata seakatan Aku; nai nari seh rasa lalap la lit si deban Dibata.
11Aku ngenca TUHAN! La lit si deban si ngasup ngkelini kam.
12Nai nggo Kuturiken kai si nandangi jadi, janah kenca bage reh Aku ku kam engkelini. La lit pernah dibata-dibata si deban ngelakoken si bage, janah kam kap saksingKu kerna si e.
13Aku kap Dibata, janah rasa lalap nge Aku Dibata. La lit ise pe banci pulah i bas kuasangKu, la lit ise pe ngasup ngobah perbahanenKu."
Pulah i Babil nari
14Bagenda nina Dibata si Badia nu Israel, TUHAN si ngkelini kam: "Guna ngkelini kam Kusuruh pagi tentera nerang kota Babil, Kurontasken pagi kerabangen kota e, janah surak-surak si lit i je, kusalihken jadi tangis.
15Aku kap TUHAN, Dibatandu si Badia. Kutepa kam, o Israel, emaka Aku kap Rajandu."
16Nai ibahan TUHAN pasar arah tengah lawit, sada dalan arah lau si ergalumbang.
17IteguNa tentera si mbisa kempak kebenen gereta perang ras kudana si melala. Ampar ia kerina, lanai keke mulihi, bali ras sumbu lampu, si inimpeti.
18Amin bage gia nina TUHAN, "Ulanai inget-inget kai si nggo ndekah jadi, la padah ipegedang kerna kejadin si nai-nai.
19Nehenlah kejadin-kejadin si mbaru si nandangi Kubahan. Situhuna genduari pe nggo mulai jadi; la kin idahndu e? Kubahan pasar arah gurun pasir, janah lau belin maler i je.
20Emaka rubia-rubia si meliar pe ipehagana Aku; bage pe biang kerangen ras perik unta. Sabap Kupepaler lau i bas gurun pasir, gelah lit inemen man bangsa pilihenKu.
21Bangsa e jine nggo Kutepa man gunangKu, lako ngendeken puji-pujin man bangKu."
Dosa bangsa Israel
22Nina TUHAN, "Tapi leja kam nai man bangKu, o Israel; emaka lanai isembahndu Aku.
23Biri-biri persembahen tutungen la ibabandu bangKu; la ihamatindu Aku alu persembahenndu. Lako Kuberati kam alu mindo melala persembahen, labo Kulatihi kam alu mindo persembahen kumenen.
24La itukurndu kumenen man bangKu, la ibesurindu Aku alu taben-tabeh rubia-rubiandu. Tapi iberatindu Aku alu dosa-dosandu, ilatihindu Aku alu salah si ibahanndu.
25Amin bage gia, Aku kap Dibata si nasapken dosa-dosandu; janah si e Kulakoken erkiteken bage kin biakKu. Lanai Kupeinget-inget kerina dosa-dosandu.
26Ota kita ku Pengadilen, bahan pengadunndu! Adi payo kin kam benar, turiken rananndu!
27Ninindu si pemena nai erdosa; peminpin-peminpinndu pe erdosa man bangKu,
28peminpin-peminpin, ngeliami inganKu si Badia. Erkiteken si e Kubahan me kecedan man Israel; Kupelepas bangsangKu jine igombangi kalak."