Dual PanelTUHAN ngenca Dibata
1Nina TUHAN, "Begikenlah, o Israel, suruh-suruhenKu kesusuren Jakup, bangsa pilihenKu.
2Aku kap TUHAN si nepa kam; si njadiken kam i bas bertin nari ras si nampati kam. Ula kam mbiar sabap kam kap suruh-suruhenKu, bangsa si Kupilih, kekelengenKu.
3Kempak taneh si muas, Kuamburken me lau, kempak taneh si kerah, Kubahan lau maler. Kukuseken me KesahKu man anak-anakndu, ras pasu-pasungKu man kesusurenndu.
4Emaka mehuli perturahna, desken dukut i tepi lau, desken batang dalu-dalu i tepi lau maler.
5Tupung si e, bangsa si deban ngatakenca nina, 'Aku sikerajangen TUHAN.' Lit ka pe si ngatakenca ia kesusuren Jakup. Sekalak-sekalak ia nuratken gelar TUHAN i bas tanna, ikatakenna maka ia pe bangsa Dibata."
6Bagenda me kata TUHAN si Mada Kuasa, TUHAN si ngerajai Israel ras si ngkawalisa, "Aku kap si pemena ras di perpudina, seakatan Aku la lit Dibata.
7Ise kin ngasup ngelebihi Aku? Suruh ia ngerana, ngakukenca i lebe-lebengKu. Ise kin lit nuriken kerna si nandangi jadi, bena-benana nari seh ku pendungi paksa-paksa?
8Ula kam mbiar, o bangsangKu; ietehndu maka nai-nai nari seh genduari nggo leben Kuturiken kai si nandangi jadi. Janah kerna si e kam kap saksi-saksingKu. Lit kin dibata-dibata si deban lain Aku? La lit; janah la pernah lit Kubegi."
Nembah man gana-gana, tuhu-tuhu man pertawa-tawan
9Kerina tukang gana-gana tuhu la lit ergana, janah barang-barang si meherga akapna e, la lit sitik pe gunana. Kerina kalak si nembah man berhala-berhala, tuhu-tuhu pentang dingen motu, janah erkiteken si e ugapa pe ia juru janah mela akapna.
10Labo lit ertina erbahan gana-gana besi janah nembahsa desken dibata.
11Kasa kai kalak si nembah man gana-gana ugapa pe mela me akapna. Kalak si erbahan gana-gana e manusia kap. Suruhlah ngadap maka iadili; ugapa pe mbiar ia janah mela akapna.
12Tukang besi muat besi; lako nepasa emaka tutungna ku bas api. Tanna si megegeh ngawatken perpalu lako nepasa. Sanga erdahin, melihe dingen muas ia, latih pe akapna.
13Tukang kayu nibari kayu. Ibahanna i je gambar gana-gana alu kapur, jenari iukirna alu perkakasna; iganana gambar manusia si mejile tempasna guna itamaken i bas rumahna.
14Banci jadi kayu si ipakena kayu asis si itabahna i bas kerangen nari; tah banci ka pe isuanna kayu eru, jenari itimaina udan peturahsa.
15Sada bagin i bas batang kayu e ibahanna jadi ranting. Alu si sada bagin ndai ipegarana api man inganna cudu ras nasakken roti. Bagin si debanna ibahanna jadi gana-gana man sembah-sembahen.
16Deba ka ranting ndai ipegarana guna manggang daging, ipanna seh besur. Cudu ia i je maka ula akapna mbergeh, janah nina, "Ntabeh kal, dingen lanai mbergeh! Seh kal ulina api e!"
17Iba-iba kayu ndai ibahanna jadi gana-gana, janah kenca bage erjimpuh mungkuk ia, isembahna gana-gana e. Ertoto ia kempak gana-gana e nina, "Kam kap dibatangku, kelinilah aku!"
18Kalak si bage seh kal motuna. Itutupna matana ras perukurenna seh maka kai pe la iangkana.
19Tukang gana-gana e la lit pengertinna, janah la seh ukurna nungkun i bas pusuhna, "Deba kayu e kuciluk kap. I babo rarana kutasakken roti janah kupanggang daging, jenari ku pan. Iba-iba kayu e kubahan jadi gana-gana. Ma la kin patut aku erjimpuh nembah i lebe-lebe sengkeret kayu?"
20Perbahanen si bage desken man abu kap! Perukuren si bodoh e nggo mabai ia papak seh maka lanai ia tersampati. La ia nggit ngakuisa man dirina maka gana-gana si ijemakna e situhuna penipu.
TUHAN kap si Nepa si nasa lit janah Ia pe Penebus
21Nina TUHAN, "O Israel, ingetlah katangKu man bandu; ingetlah maka kam kap suruh-suruhenKu. Kam Kutepa jadi suruh-suruhenKu emaka ula ilupakenndu Aku.
22Desken remang erpagi-pagi, dosandu nggo Kulesapken, janah salahndu pe nggo Kusasap desken embun. Emaka mulihlah kempak Aku, sabap Aku kap Penebusndu."
23Rendelah meriah, o langit, Sabap TUHAN nggo ngelakoken si e kerina. Ersuraklah, o ingan si mbages i teruh taneh! Ersuraklah meriah o deleng-deleng ras kayu kerangen. TUHAN nggo ncidahken KemulianNa alu engkelini BangsaNa Israel.
24"Aku kap TUHAN, Penebusndu. Si nepa kam i bas bertin nandendu. Aku kap TUHAN, si njadiken si nasa lit Aku ngenca si ngkimbangken langit. Janah tupung Aku nepa doni enda, la lit ise pe si nampatisa.
25Guru si beluh ertendung Kupebodoh-bodohken nubuat guru perkatika Kusia-siaken. Perkatan kalak pentar Kupersilahangken, janah Kucidahken maka kepentarenna tuhu-tuhu kebodohen.
26Tapi adi suruh-suruhenKu nuriken kai si nandangi jadi, adi Kusuruh perberita petangkas rencanangKu, Kubahan maka nubuat ras rencana e tuhu-tuhu jadi. Kukataken maka Jerusalem iiani mulihi, janah kota-kota Juda ipajekken ka pagi. Kerina kota-kota e Kupekeke denggo mulihi i bas runtuhenna nari.
27Kuperentahken man lawit si mbages, 'Kerahlah! Kubahan maka lau belinndu jadi kerah.'
28Kempak Raja Kores Kukataken, 'Kam merentah guna Aku, lako ndalanken sura-surangKu. Kam merentahkenca maka Jerusalem ipanteki mulihi, janah palas Rumah Pertoton ipajekken ka pagi.'"