Dual PanelDibata ndilo Jesaya jadi nabi
1I bas tahun kematen Raja Usia, kuidah TUHAN. Ia sanga kundul i kursi KemulianNa si meganjang, janah JubahNa ndemi kerina Rumah Pertoton.
2I SekelewetNa tedis malekat serafim si ernala-nala bagi api, tapi lit enem kabengna. Dua kabengna nutupi ayona, dua nari nutupi badanna, janah alu kabengna si dua nari kabang ia.
3Silebuh-lebuhen ia nina, "Badia, badia, badia! TUHAN si Mada Kuasa badia kap! Doni enda dem alu KemulianNa."
4Palas Rumah Pertoton e mugur-ugur ibahan sorana janah Rumah Pertoton dem alu cimber.
5Erkiteken si e ningku, "Cilaka aku, lanai lit arapen man bangku. Bene me aku sabap alu matangku nggo kuidah Raja, TUHAN si Mada Kuasa, adi tep-tep ranan si mentas arah biberku dosa kerina, janah aku pe ringan i tengah bangsa i ja tep-tep kata si ibelaskenna dem alu dosa."
6Kenca bage sada i bas malekat srafim ndai nari kabang ndahi aku. Ibabana rara si ibuatna i bas batar-batar persembahen nari alu jepit-jepit.
7Ikuitna biberku alu rara ndai, jenari nina, "Rara enda nggo ngkenai biberndu, emaka genduari salahndu nggo cimber janah dosandu nggo ialemi."
8Kenca bage kubegi Tuhan ngerana nina, "Ise ndia Kusuruh? Ise ndia nggit maba berita i bas Aku nari?" Emaka ningku ngaloi, "Aku, suruhlah aku!"
9Emaka IsuruhNa aku lawes nehken berita enda man bangsa e nina, "Rusur gia ibegindu, tapi labo ietehndu. Rusur gia idahndu, tapi labo ietehndu kai si jadi."
10Jenari IkatakenNa man bangku nina, "Bahan maka batu-batun ukur kalak enda, pepasek pinggelna, pepentang matana, sabap adi erpengidah ia, tah erpemegi janah erpengangka, tentu reh ia ndahi Aku, jenari malem ia."
11Emaka nungkun aku, "Seh ndigan bage TUHAN?" Jabap TUHAN, "Seh kerina kota e runtuh janah lume, seh kerina rumahna lanai i iani, seh negeri e melungen dingen terulang.
12Kupelawes pagi bangsa e ku ingan si ndauh, seh kerina negeri e mesuni.
13Janah adi lit denga gia sepersepuluhna si tading i bas negeri e, e pe iradasken nge, bali ras tongkeh kayu galang si nggo itabah." (Tongkeh kayu e banci iumpamaken ras pemenan si mbaru i bas bangsa Dibata.)