Alkitab Mobile SABDA
[VER] : [KARO]     [PL]  [PB] 
 <<  Yohanes 13 >> 

Jesus murihi nahe ajar-AjarNa

1Sada wari ope Wari Raya Paskah, nggo ieteh Jesus maka seh PaksaNa ItadingkenNa doni enda janah mulih Ia ku BapaNa. Keleng kal AteNa teman-TemanNa i doni enda janah seh ku kedungenna tetap AteNa keleng.

2Jesus ras ajar-AjarNa sangana man berngi. Iblis nggo erdahin i bas ukur Judas anak Simon Iskariot guna ndayaken Jesus.

3Ieteh Jesus maka nggo ibereken Dibata kuasa kai pe man BaNa. Ieteh Jesus pe maka Ia reh i bas Dibata nari janah nandangi mulih ku Dibata.

4Emaka tedis Jesus, itangtangina JubahNa, jenari IbentingkenNa uis.

5ItamakenNa lau ku bas sambung, jenari IburihiNa nahe ajar-AjarNa janah IelapNa alu uis si IbentingkenNa.

6Asum seh giliren Simon Petrus nina Simon Petrus man Jesus, "O Tuhan, Kam kin arusna si murihi nahengku?"

7Erjabap Jesus man Simon Petrus, "Si Kubahan genduari e, la iangkandu, tapi pagin tangkas kap man bandu."

8Ngaloi ka Petrus, "Asa ndigan pe la kubere IburihiNdu nahengku!" Tapi nina Jesus man bana, "Adi la Kuburihi nahendu lanai kam ajar-ajarKu."

9Ngaloi Simon Petrus, "O Tuhan, adi bage kin ola nahengku saja burihi! Tapi burihilah tanku ras takalku pe!"

10Nina Jesus, "Kalak si nggo ridi nggo kap bersih kerina kulana, emaka lanai bo perlu ia ridi; nahena saja ngenca perlu iburihi."

11Kam nggo bersih kerina, sekalak ngenca lang. (Nggo ieteh Jesus ise si nandangi ndayaken Ia; perbahan si e me maka nina, "Kam nggo bersih kerina, sekalak ngenca lang.")

12Kenca dung iburihi Jesus kerina nahe ajar-AjarNa e, IpakeNa ka mulihi JubahNa ndai, jenari kundul Ia ku InganNa. Kenca bage nungkun Jesus nina, "Iangkandu kin kai tujunna si Kubahan man bandu enda ndai?

13Ikatakenndu Aku Guru bage pe Tuhan. Payo kap si ikatakenndu e; sabap tuhu me Aku Guru dingen Tuhan.

14Dage adi Aku, Guru dingen Tuhanndu nggo murihi nahendu, patut pe maka kam siburih-burihen nahe.

15Nggo Kubahan si man usihenndu gelah banci ibahanndu bagi si nggo Kubahan man bandu e.

16Kukataken man bandu: Situhuna la lit budak belinen asangken tuanna. Labo lit suruh-suruhen belinen asangken si nuruh ia.

17Genduari nggo ietehndu kerna si enda; malem tuhu-tuhu atendu adi idalankenndu i bas geluhndu.

18Aku ngerana enda labo kerna kam kerina. Kueteh nge ise nggo Kupilihi. Tapi kai si tersurat i bas Pustaka Si Badia arus seh. I bas Pustaka Si Badia lit tersurat, 'Kalak si man ras Aku, ia me si ngelawan Aku.'

19Si enda Kukataken man bandu ope denga jadi, gelah kenca jadi, tek kam maka 'Aku me Aku.'

20Kukataken pe man bandu: Kalak si ngaloken persuruhenKu, ialokenna pe Aku, janah kalak si ngaloken Aku, ialokenna pe Dibata si nuruh Aku."

Ituduhken Jesus si ndayaken Ia (Mat 26:20-25; Mrk 14:17-21; Luk 22:21-23)

21Kenca ikataken Jesus si e, megogo kal AteNa. Emaka ngerana Ia alu terus terang nina, "Kukataken man bandu, si tuhuna sekalak i bas kam nandangi ndayaken Aku."

22Tumpat kal ukur ajar-ajar, emaka sinihenen ia sapih-sapih ia, sabap la ietehna ise kata Jesus e.

23Sekalak ajar-ajar si lebih ikelengi Jesus kundul rembak ras Ia.

24Emaka ikuit Simon Petrus ia, jenari nina, "Sungkun ise kin KataNa e?"

25Emaka ajar-ajar si kundul rembak ras Jesus ndai ngerembaki Jesus tole jenari nina nungkun, "O Tuhan, ise kin KataNdu e?"

26Erjabap Jesus, "Kucalehken me roti enda ku bas mangkuk jenari man ise kari kubereken, ia me katangKu." Kenca IcalehkenNa roti e, IberekenNa man Judas anak Simon Iskariot.

27Asum ialoken Judas roti e minter ibengketi Iblis ia. Jenari nina Jesus man bana, "Kai si nggo irencanakenndu e, minterlah bahan!"

28Sekalak pe ajar-ajar la ngangkasa kai si ikataken Jesus e.

29Piga-piga ajar-ajar erpengakap maka Judas isuruh Jesus nukur keperlun guna perayan Paskah; ntah isuruh Jesus ia mereken penampat man kalak musil, sabap Judas me si njemak duit.

30Kenca ialoken Judas roti e, minter ia lawes ndarat; paksa si e wari nggo gelap.

Pedah si mbaru

31Kenca Judas lawes nina Jesus, "Genduari ipetangkas me kemulian Anak Manusia si isuruh Dibata janah kemulian Dibata pe ipetangkas arah Ia.

32Adi kemulian Dibata ipetangkas arah Ia maka Dibata pe mpetangkas kemulian Anak Manusia e i bas DiriNa, janah minter me IbahanNa.

33O anakku, kentisik nari ngenca Aku ras kam. Idaramindu me pagi Aku. Tapi genduari Kukataken man bandu bagi si nggo Kukataken man kalak Jahudi e, 'Kam labo banci lawes ku inganKu e.'

34Kubereken man bandu pedah si mbaru, e me: Sikeleng-kelengenlah kam. Bagi Aku nggo engkelengi kam, kam pe min arus sikeleng-kelengen.

35Adi sikeleng-kelengen kam, kerina kalak meteh maka kam ajar-ajarKu."

Ituriken Jesus maka ipersoken si Petrus me Ia (Mat 26:31-35; Mrk 14:27-31; Luk 22:31-34)

36Jenari nungkun Simon Petrus man Jesus nina, "O Tuhan, ku ja kin AteNdu lawes?" Erjabap Jesus, "Genduari labo banci Aku ikutkenndu ku inganKu lawes e, tapi denggo ikutkenndu nge Aku."

37Emaka nungkun ka Petrus nina, "O Tuhan ngkai maka la banci Kam kuikutken genduari? Aku pang mate man GunaNdu."

38Ngaloi Jesus, "Tuhu-tuhu kin kam nggo pang mate man gunangKu?" Kukataken man bandu, "Si tuhuna ope denga tekuak manuk nggo ipersokenndu pagi Aku telu kali."


  Share Facebook  |  Share Twitter

 <<  Yohanes 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran