Alkitab Mobile SABDA
[VER] : [KARO]     [PL]  [PB] 
 <<  Yohanes 16 >> 

1"Si enda Kukataken man bandu gelah ola monce-once kinitekenndu.

2Ipedaratna me kam i bas rumah persembahen nari. Reh me pagi paksana maka kalak si munuh kam erpengakap maka arah perbahanenna e isehkenna peraten Dibata.

3Bagenda perbahanenna man bandu erdandanken la itandaina BapangKu bage pe la itandaina Aku.

4Tapi si enda nggo Kukataken man bandu genduari gelah kenca seh pagi bage ingetndu maka nggo Kukataken man bandu kerna si e."

Pendahin Kesah Si Badia

"Si enda la Kukataken man bandu nai nari sabap ras kam denga Aku.

5Genduari lawes me Aku ndahi si Nuruh Aku, tapi sekalak pe la kam nungkun, 'Ku ja Kam lawes?'

6Genduari megogo atendu erdandanken nggo Kukataken si enda man bandu.

7Tapi Kukataken man bandu: Si tuhuna man bandu ulin kap Aku lawes. Sabap adi la Aku lawes, labo reh Penampat e. Tapi adi lawes Aku, Kusuruh me Ia ndahi kam.

8Kenca pagi reh Penampat e IpetangkasNa me man bangsa doni enda maka pengertin bangsa doni enda salah kerna dosa, kerna ise si benar bage pe kerna ukumen si reh i bas Dibata nari.

9IpetangkasNa maka bangsa doni enda salah pengertinna kerna dosa perbahan la ia tek man bangKu.

10Ipetangkas Penampat e me pagi man bangsa doni enda maka Aku nge benar alu encidahken maka adi lanai Aku idahndu i bas doni enda, e me tandana Aku nggo lawes ndahi Bapa.

11IpetangkasNa maka salah pengertin bangsa doni enda kerna ukumen si rehna i bas Dibata nari alu encidahken maka si Penguasa doni enda nggo iukum.

12Melala denga ateKu Kukataken man bandu, tapi genduari lenga kam ngasup ngalokenca.

13Tapi asum reh pagi Kesah si naksiken kebenaren kerna Dibata, IpetangkasNa me man bandu kebenaren kerna Dibata alu serta. Ia ngerana labo bagi ate-AteNa saja, tapi IkatakenNa me kai si IbegiNa dingen IturikenNa kai si nandangi jadi.

14IpermuliakenNa pagi Aku, sabap IberitakenNa me man bandu kai si IalokenNa i bas Aku nari.

15Kerina si lit i bas BapangKu sikerajangenKu pe. E me sabapna Kukataken man bandu maka ialoken Kesah e me kai si Kubereken man BaNa gelah IpesehNa man bandu."

Ceda ate salih jadi keriahen

16"Kentisik nari lanai Aku idahndu, jenari kentisik nari ka idahndu ka me Aku."

17Megi kata Jesus e, piga-piga ajar-AjarNa sisungkun-sungkunen sapih-sapih ia nina, "Kai nge MaksudNa maka nina, 'Kentisik nari lanai Aku idahndu; jenari kentisik nari ka idahndu ka me Aku?' IkatakenNa pe, 'Sabap lawes me Aku ndahi Bapa.'

18Kai nge MaksudNa, 'Kentisik nari' e? La kap siangka MaksudNa!"

19Ieteh Jesus maka nungkun ate ajar-ajar man BaNa, emaka nina, "Nggo Kukataken man bandu, 'Kentisik nari lanai Aku idahndu; jenari kentisik nari ka idahndu ka me Aku.' Kerna si enda kin maka kam sisungkun-sungkunen?

20Kukataken man bandu: Si tuhuna tangis-ngandung kam pagi, tapi bangsa doni enda ermeriah ukur. Ceda pagi atendu, tapi ceda atendu e salih jadi keriahen.

21Sekalak diberu si nandangi mupus aru atena, sabap nggo seh paksa kiniseranna. Tapi kenca tubuh anak e, lanai ingetna kiniseranna e, sabap meriah ukurna erdandanken nggo tubuh sada anak ku doni enda.

22Bage me pe kerna kam: Genduari ceda atendu, tapi kenca jumpa kita pagi mulihi tuhu-tuhu meriah kal ukurndu, janah ise pe la ngasup muat keriahen si lit i bas kam e.

23I bas wari e pagi lanai lit penungkunenndu man bangKu. Kukataken man bandu: Si tuhuna ntah kai gia ipindondu man Bapa i bas gelarKu, IberekenNa nge man bandu.

24Seh asa genduari langa pernah ipindondu kai pe i bas gelarKu. Pindolah, tentu ngalo me kam gelah tuhu-tuhu meriah kal ukurndu."

Jesus nggo naluken doni enda

25"Kerna si enda nggo Kukataken man bandu arah perumpaman. Tapi seh me paksana maka lanai Aku ngerana arah perumpaman man bandu, tapi alu tangkas Kukataken man bandu kerna Bapa e.

26I bas wari e pagi mindo me kam man BaNa i bas gelarKu; janah labo Kukataken maka Aku mindo man BaNa guna keperlunndu,

27sabap kam pe keleng nge ate Bapa e. Keleng ate Bapa e kam perbahan keleng atendu Aku janah tek kam maka Aku reh i bas Dibata nari.

28Tuhu Aku reh i bas Bapa nari, janah nggo reh ku doni enda. Tapi genduari Kutadingken me doni enda; mulihken Aku ndahi Bapa."

29Jenari nina ajar-ajar Jesus man Jesus, "Genduari alu tangkas IkatakenNdu man kami, la make perumpaman.

30Genduari nggo ieteh kami kai pe ietehndu nge; la kam perlu kalak nungkun man bandu. Erdandanken si tek kami maka kam reh i bas Dibata nari."

31Ngaloi Jesus, "Nggo kam tek genduari?

32Reh me paksana, janah nggo seh pe, maka merap me kam kerina, sekalak-sekalak kam lawes ku rumahndu janah itadingkenndu Aku sisada. Tapi amin bage gia labo Aku sisada, sabap Bapa ras Aku kap.

33Si enda Kukataken man bandu gelah malem atendu erkiteken kam ersada ras Aku. Jumpa kiniseran me kam ibahan doni enda. Tapi ola kam mbiar! Nggo kap Kutaluken doni enda!"


  Share Facebook  |  Share Twitter

 <<  Yohanes 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran