Alkitab Mobile SABDA
[VER] : [KARO]     [PL]  [PB] 
 <<  Yohanes 17 >> 

Jesus ertoto kerna ajar-AjarNa

1Kenca Jesus dung ngerana, ItareNa ku langit nina, "O Bapa genduari nggo seh paksana. Pemuliakenlah AnakNdu gelah AnakNdu pe mpermuliaken Kam.

2Nggo IberekenNdu man BaNa kuasa nandangi kerina manusia, gelah IberekenNa kegeluhen si tuhu-tuhu si la erkeri-kerin man kalak si IendeskenNdu man BaNa.

3Kegeluhen si tuhu-tuhu si la erkeri-kerin e: Itandai kalak Kam ngenca Dibata si tuhu-tuhu, dingen itandaina Jesus Kristus si IsuruhNdu.

4Nggo Kucidahken KemulianNdu i doni enda, nggo Kudungi dahin si IberekenNdu man bangKu.

5O Bapa, muliakenlah Aku genduari i bas adep-AdepenNdu bagi Aku ermulia nai ras Kam ope denga lit doni enda.

6Kam nggo Kupetandaken man kalak si nggo IendeskenNdu man bangKu, si nggo IpilihNdu i bas doni enda nari. SikerajangenNdu kap ia, janah nggo IendeskenNdu man bangKu. Nggo ikutkenna KataNdu,

7janah genduari ietehna kerina si IberekenNdu man bangKu rehna i bas Kam nari.

8Nggo Kupeseh Kata si IberekenNdu man bangKu, janah nggo ialokenna. Ngaku pe ia maka Aku reh i bas Kam nari janah tek pe ia maka Kam si nuruh Aku.

9Ertoto Aku man BaNdu kerna ia. Labo Aku ertoto kerna doni enda, tapi ertoto kerna kalak si nggo IendeskenNdu man bangKu, sabap SikerajangenNdu kap ia.

10Kerina si lit i bas Aku SikerajangenNdu kap, bage pe kerina si lit i bas Kam sikerajangenKu; janah kemulianKu teridah arah ia kerina.

11Genduari reh Aku ndahi Kam; lanai ndekah Aku i doni enda, tapi ia i doni enda denga. O Bapa si Badia, kepkep ia alu KuasaNdu, Kuasa si IberekenNdu man bangKu, gelah ersada ia bagi Kam ersada ras Aku.

12Sanga Aku ras ia denga Kukepkep ia alu KuasaNdu, Kuasa si IberekenNdu man bangKu. Nggo Kukawali ia, janah la lit sekalak pe bene; kalak si arusna bene e nge ngenca bene gelah seh si tersurat i bas Pustaka Si Badia.

13Genduari reh Aku ndahi Kam, janah kerna si enda Kukataken i doni enda gelah banci igejapkenna keriahenKu si tuhu-tuhu.

14KataNdu nggo Kupeseh man bana, tapi nembeh ate doni enda man bana sabap la ia sikerajangen doni enda bagi Aku la sikerajangen doni enda.

15Labo Kupindo gelah ipedarat ia i bas doni enda nari, tapi Kupindoken man BaNdu gelah IkawaliNdu ia i bas si jahat nari.

16Bagi Aku labo sikerajangen doni enda, bage pe ia labo sikerajangen doni.

17Serapken ia man GunaNdu arah kebenaren; KataNdu kap kebenaren.

18Nggo Kusuruh ia ku doni enda bali ras Aku nggo IsuruhNdu ku doni enda.

19Kuendesken diringKu Bandu guna ia, gelah ia pe IserapkenNdu man GunaNdu arah kebenaren.

20Aku ertoto labo saja kerna ia, tapi pe kerna kerina kalak si tek man bangKu erdandanken berita si ipesehna.

21O Bapa, ertoto Aku man BaNdu gelah ersada min ia kerina. Ersadalah min ia ras Kita, bagi Kam ersada ras Aku janah Aku ersada ras Kam. Ersadalah min ia gelah tek doni enda maka Kam me si nuruh Aku.

22Kemulian si IberekenNdu man bangKu, nggo Kubereken man bana, gelah ia ersada bagi Kam ersada ras Aku.

23Aku ersada ras ia, janah Kam ersada ras Aku, gelah ia pe min tuhu-tuhu ersada. Alu bage tek doni enda maka Kam si Nuruh Aku, janah idah doni enda maka keleng AteNdu ia bagi keleng AteNdu Aku.

24O Bapa, ateKu min gelah kalak si nggo IendeskenNdu man bangKu, ersada ras Aku i bas inganKu, gelah banci idahna kemulian si IberekenNdu man bangKu; sabap kam engkelengi Aku ope denga pe doni enda ijadiken.

25O Bapa si bujur, doni enda la nandai Kam, tapi Aku nandai Kam kap, janah kalak si nggo IendeskenNdu man bangKu pe meteh maka Kam me si nuruh Aku.

26Kam nggo Kupetandaken man bana janah Kuterusken me bage gelah keleng AteNdu si IberekenNdu man bangKu seh pe man bana, bage pe gelah ersada Aku ras ia."


  Share Facebook  |  Share Twitter

 <<  Yohanes 17 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran