Alkitab Mobile SABDA
[VER] : [KARO]     [PL]  [PB] 
 <<  Yohanes 7 >> 

Jesus ras senina-SeninaNa

1Kenca bage isiari Jesus daerah Galilea. I daerah Judea la Ia nggit niar-niar sabap kalak Jahudi si erkuasa i je ersura-sura munuh Ia.

2Paksa si e lanai ndekah Wari Raya Barung-barung.

3Perbahan si e nina senina-senina Jesus man BaNa, "Tadingken ingan enda, laweslah ku daerah Judea gelah idah ajar-AjarNdu dahin si IdahikenNdu.

4Labo lit kalak erbuni-buni erdahin adi atena kin mpetandaken bana man doni enda. Kam nggo melala dahin IdahikenNdu, bahanlah gelah kerina kalak i belang-belang doni metehsa."

5(Senina-senina Jesus e pe langa bo tek man Jesus.)

6Emaka nina Jesus man bana, "Langa seh paksangKu. Tapi kam katawari pe lit kesempatenndu.

7Kam labo segat ate doni enda, tapi Aku segat atena, sabap Kucidahken perbahanenna si jahat.

8To, kam lah ku kerja e. Aku labo reh ku je sabap langa seh paksangKu."

9Bage me nina Jesus man senina-SeninaNa, jenari tading Ia i Galilea.

Jesus i bas Wari Raya Kemah

10Kenca lawes senina-senina Jesus ku wari raya e, Jesus pe lawes ku je. La Ia terang-terangen lawes, tapi erbuni-buni.

11Kalak Jahudi si erkuasa ndarami Jesus i bas kerja e. Nungkun ia nina, "I ja ndia Ia?"

12Nterem kalak erkusik-kusik kerna Jesus. Lit si ngatakenca, "Ia kalak bujur kap." Tapi lit ka si ngatakenca, "Lang! Itokohina kap kalak si nterem!"

13Tapi sada pe la pang terang-terangen encakapken Jesus sabap mbiar ia kalak Jahudi si erkuasa.

14Kenca menam setengah acara perayan e erdalan, bengket Jesus ku Rumah Pertoton, jenari IbenakenNa ngajar.

15Mamang kal ate kalak Jahudi si erkuasa ngidah Ia ngajar e. Nina, "I ja nari nge PemetehNa e kerina adi Ia labo pernah sekolah?"

16Ngaloi Jesus, "Kai si Kuajarken e labo i bas Aku nari, tapi i bas Dibata si nuruh Aku nari nge.

17Kalak si ndalanken peraten Dibata alu ukur meriah, ietehna nge ntah i bas Dibata nari ntah i bas Aku nari rehna pengajarenKu enda.

18Kalak si ngajar rikutken pemetehna, iusahakenna nge gelah ia terpuji. Tapi kalak si ersura-sura gelah si nuruh ia terpuji, bujur kap, la lit si palsu i bas ia.

19Ma ibereken Musa Undang-undang man bandu? Tapi sada pe la kam ngikutken Undang-undang e. Ngkai maka ibunuhndu atendu Aku?"

20Ngaloi kalak si nterem, "Setanen Kam! Ise kin atena munuh Kam?"

21Nina Jesus man kalak si nterem e, "Sada perbahanen si mbelin nggo Kubahan, kerina kam kemamangen.

22Perbahan isuruh Musa kam nunatken anakndu, i bas wari Sabat pe isunatkenndu ia. (Situhuna labo i bas Musa nari Undang-undang sunat e, tapi i bas nini-ninindu nari nge.)

23Adi guna nehken Undang-undang si ibereken Musa banci kalak isunatkenndu i bas wari Sabat, ngkai maka kam merawa adi Kupepalem kalak si penakiten i bas wari Sabat?

24Ola kin salahindu kalak arah si teridah saja, tapi bahanlah pertimbangen si bujur."

Tuhu kin Jesus e Si Engkelini si ipadanken Dibata?

25Piga-piga anak kota Jerusalem ngerana kerna Jesus nina, "Ma Ia kin si nggo isura-suraken peminpin-peminpinta ibunuh?

26Nehenlah! Erate-ate Ia ngerana i lebe-lebe jelma si nterem janah ise pe la ngelawan Ia. Nggo kin tuhu-tuhu ieteh si erkuasa maka Ia me Raja Penampat si ipadanken Dibata?

27Aturna adi Raja Penampat si ipadanken Dibata e reh, la sekalak pe meteh i ja nari rehna. Tapi Ia, kerina kita meteh i ja nari rehna."

28Asum Jesus ngajar i bas Rumah Pertoton e, nungkun Ia alu sora si megang nina, "Tuhu-tuhu kin itandaindu Aku? Ietehndu kin i ja nari Aku? Labo erdandanken peratenKu Aku reh. Si nuruh Aku e bujur kap; janah la Ia itandaindu.

29Tapi Aku, Kutandai Ia, sabap Ia me si nuruh Aku, janah Aku reh i bas Ia nari."

30Perbahan si e ersura-sura kalak Jahudi si erkuasa nangkap Jesus, tapi sada pe la pang sabap langa seh paksana.

31Tapi i bas kalak si nterem e lit piga-piga kalak tek man Jesus. Nina, "Adi reh Raja Penampat si ipadanken Dibata e, ngasup kin Ia erbahan tanda-tanda sengget buen asa si ibahan Jesus enda?"

Sura-sura nangkap Jesus

32Kalak si nterem erkusik-kusik kerna Jesus. Si enda ibegi kalak Parisi, emaka arih-arih ia ras imam-imam si mbelin; jenari isuruhna piga-piga kalak si njaga Rumah Pertoton e nangkap Jesus.

33Tapi nina Jesus, "Kentisik nari ngenca Aku ras kam. Kenca bage mulih Aku ndahi si nuruh Aku.

34Idaramindu pagi Aku, tapi la idatndu, sabap labo kam banci ku ingan si Kudahi e."

35Emaka sisungkun-sungkunen kalak Jahudi si erkuasa e sapih-sapih ia nina, "Ku ja kin ndia Ia pagi lawes maka la Ia si dat? Ntah kin AteNa lawes ku kuta-kuta Junani si lit i je ringan kalak Jahudi guna ngajari kalak Junani?

36Kai nge maksudna maka nina, 'Idaramindu pagi Aku tapi la idatndu. Labo kam banci ku ingan si Kudahi e?'"

Ulu lau kegeluhen

37Wari pengkeri-kerin kerja e, e me si pentingna. I bas wari e tedis Jesus jenari ngerana Ia alu sora megang nina, "Ise muas rehlah ku Aku gelah ia minem.

38Bagi si tersurat i bas Pustaka Si Badia, 'Kalak si tek man bangKu, erburak i bas ia nari lau si mereken kegeluhen.'"

39Si ikataken Jesus enda, e me kerna Kesah Si Badia, si nandangi ialoken kalak si tek man BaNa. Paksa si e Kesah Si Badia langa reh sabap Jesus langa iangkat ku kemulian.

Rubat kalak si nterem kerna Jesus

40Megi kata Jesus, ngerana piga-piga i bas kalak si nterem e nina, "Tuhu-tuhu me Ia nabi si ipadanken Dibata e!"

41Deba nina, "Ia me Raja Penampat si ipadanken Dibata." Tapi nina ka deba, "Labo! Raja Penampat si ipadanken Dibata labo i Galilea nari rehna.

42Sabap i bas Pustaka Si Badia lit tersurat maka Raja Penampat si ipadanken Dibata e, reh i bas kesusuren Daud nari, tubuh i kuta Betlehem; Kota Daud nai."

43Emaka turah perubaten i tengah-tengah kalak si nterem kerna Jesus.

44Piga-piga kalak ersura-sura nangkap Jesus, tapi sada pe la pang ngkuit Jesus.

Kalak Jahudi si erkuasa la tek man Jesus

45Emaka mulihken kalak si njaga Rumah Pertoton ndai ndahi imam-imam si mbelin ras kalak Parisi. Nungkun imam-imam si mbelin ras kalak Parisi e nina, "Ngkai maka Ia la ibabandu?"

46Erjabap kalak e, "Ise pe langa pernah bagi Ia e ngerana!"

47Nina kalak Parisi e man bana, "Kam pe nggo ka kin IbabaiNa papak?

48Nehenlah! Lit kin idahndu sekalaklah gia peminpin-peminpinta ntah kalak Parisi tek man BaNa?

49Kalak si nterem enda la meteh Undang-undang Musa, emaka iukum Dibata me ia!"

50Sekalak i bas kalak Parisi ndai, e me Nikodemus, si pernah njumpai Jesus. Nina Nikodemus,

51"Rikutken Undang-undangta la banci kalak siukum ope denga sibegiken ia ngerana janah ope denga sieteh kai si nggo ibahanna."

52Ngaloi kalak ndai, "Ntah kam pe i Galilea nari nge! Pepayolah i bas Pustaka Si Badia. I je ietehndu me maka labo pernah lit nabi i Galilea nari."

53(Yoh 7:52)


  Share Facebook  |  Share Twitter

 <<  Yohanes 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran