Alkitab Mobile SABDA
[VER] : [KARO]     [PL]  [PB] 
 <<  Yosua 1 >> 

Perentah Dibata man Josua lako naluken Kanaan

1Kenca mate Musa, suruh-suruhen TUHAN e, ngerana TUHAN man Josua anak Nun pembantu Musa.

2Nina, "Suruh-suruhenKu Musa nggo mate. Ersikap lah kam genduari ras kerina kalak Israel, jenari keparilah Lau Jordan lako mengketi negeri si Kubereken man bana.

3Bagi si nggo Kukataken man Musa, nggo Kubereken man bandu ras bangsangKu kerina taneh si idalanindu pagi.

4Baleng daerahndu e mulai i gurun pasir nari arah Selatan terus ku deleng-deleng Libanon i Utara; i Lau Eprat si mbelin nari arah Timur, arah tengah-tengah negeri Heti, terus ku Lawit Tengah i Barat.

5O, Josua, ise pe la ngasup naluken kam kidekah kam nggeluh. Aku ras kam bagi Aku nggo ras Musa. Aku tetap ras kam, la ndigan pe kam Kutadingken.

6Tetaplah ukurndu janah tek lah, sabap kam kap si minpin bangsa enda guna ndatken taneh si nggo Kupadanken man nini-ninina.

7Tetap lah ukurndu, tek lah. Janah inget! Ikutken kerina undang-undang si ibereken suruh-suruhenKu Musa man bandu. Sada bagin pe ula lupaken, maka ku japa pe kam lawes, jadi bagi sura-surandu.

8Bage pe ula kam lupa maka kitap undang-undang e arus tetap rusur iogeken i bas kebaktianndu. Pelajarilah e suari ras berngi, janah arus iperdiatekenndu maka kerina si tersurat i je ipatuhindu. Alu bage la banci la kam sangap janah seh sura-surandu.

9Inget maka nggo Kuperentahken man bandu gelah tetap ukurndu ras tek! Ula kam mbiar, ula aru atendu, sabap aku TUHAN Dibatandu, tetap ras kam ku japa pe kam lawes."

Perentah Josua man bangsa Israel

10Kenca bage isuruh Josua peminpin-peminpin bangsa e, gelah lawes

11niari ingan erkemah janah ngataken man bangsa e nina, "Sikapkenlah bekal, sabap telu wari nari ikeparindu Lau Jordan guna ngkuasai taneh si ibereken TUHAN Dibatandu man bandu."

12Ikataken Josua man suku Ruben ras Gat ras man setengah suku Manase nina,

13"Ingetlah uga Musa, suruh-suruhen TUHAN e, nggo ngataken man bandu maka TUHAN Dibatandu mereken taneh si arah Timur Lau Jordan enda man bandu jadi inganndu tading.

14Ndeharandu, anak-anakndu, ras lembundu tading i jenda. Tapi tenterandu ula maba senjata guna erperang, leben ngepar asa senina-seninana bangsa Israel guna nampatisa,

15seh ikuasaina taneh si arah Barat Lau Jordan si nggo ibereken TUHAN Dibatandu man bana. Kenca IberekenNa keamanen man kerina suku Israel, banci kam mulih janah tading i negerindu jine i jenda, eme arah Timur Jordan si ibereken Musa -- suruh-suruhen TUHAN e man bandu."

16Nina kalak enda ngaloi man Josua, "Asa kai si ikatakenndu man kami banci idalanken kami, janah nggit kami lawes ku japa pe kami isuruhndu.

17Nggit kami patuh man bandu, bali ras perpatuh kami man Musa. TUHAN Dibatandulah si nemani kam bali ras PenemaniNa Musa.

18Ise si la nggit ngakui kuasandu, ntah pe la patuh man perentahndu la banci la ibunuh. Tetap lah ukurndu janah tek lah!"


  Share Facebook  |  Share Twitter

 <<  Yosua 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran