Dual PanelDaerah si itetapken man suku Eperaim ras Manase
1Baleng Selatan taneh si itetapken man sikerajangen kesusuren Jusup mulai i Jordan nari deherken Jeriho, i bas sada ingan arah Timur ulu lau kota Jeriho, jenari terus ku gurun pasir. I kota Jeriho nari nangkeng ku deleng-deleng seh ku Betel,
2i Betel nari terus ku Lus, mentasi terus ku Atarot Adar, i je ringan kalak Arki.
3Kenca bage terus ku Barat ku daerah kalak Japlet, kempak daerah Bet-Horon si arah berneh. I jenari terus ku Geser seh ku Lawit Tengah.
4Kesusuren Jusup, suku Eperaim ras Manase Barat ngaloken taneh enda jadi sikerajangenna.
Eperaim
5Enda me daerah keluarga kalak Eperaim: Balengna mulai Atarot Adar nari terus kempak Timur ku Bet-Horon si arah gugung janah
6i jenari baginna si arah Utara eme kap Mikmetat. Balengna e mbelok kempak Taanat Silo jenari terus erdalan mentasi ingan e arah Timur ku Janoa.
7Kenca bage i Janoa nari ngincuah ku Atarot ras ku Naara, seh ku Jeriho ngadi-ngadi i Jordan.
8Balengna e mulai i Tapua nari ngikuti Lau Kana seh ku Lawit Tengah. Enda me taneh si ibereken man keluarga suku Eperaim jadi sikerajangenna,
9rikut pe ras piga-piga kuta ras dusun si lit i bas baleng-baleng daerah Manase, tapi ibereken man kalak Eperaim.
10Tapi la ipelawesna kalak Kanaan si ringan i Geser, emaka kalak Kanaan ringan i tengah-tengah kalak Eperaim seh sendah, tapi ia nggo ipaksa erdahin jadi budak.