Dual PanelKota-kota benteng keterkelinen
1Kenca bage TUHAN nuruh Josua
2gelah ikatakenna man bangsa Israel bagenda, "Tetapkenlah kota benteng ingan terkelin sue ras si nggo Kuperentahken man bandu arah Musa.
3Kalak si munuh alu la sengaja banci lompat ku je nilahken kalak si erbalas atena.
4Banci ia kiam ku salah sada kota enda, jenari lawes ku ingan runggu i bas dalan bengket ku bas kota e, guna nuriken man peminpin-peminpin i bas kota e, kai si nggo jadi. Kenca bage banci iberena ia bengket ku bas kota e janah iberekenna man bana inganna tading, gelah banci ia ringan i je.
5Adi kalak si erbalas atena ndai ndarami ia ku je, penduduk kota e la banci ngendeskenca man bana; la banci la ikawalina ia, sabap ia munuh labo alu sengaja janah labo erkite-kiteken nembeh atena.
6Banci ia ringan i bas kota e seh ia iadili i tengah-tengah jelma si nterem janah seh kematen Imam si Mbelin tupung e. Kenca bage banci ia mulihken ku kutana, i ja nari ia nggo lompat mbarenda."
7Emaka, arah Barat Jordan itetapken me kota Kades i Galilea, i taneh deleng-deleng Naptali; Sikem, i taneh deleng-deleng Eperaim; ras Hebron, i taneh deleng-deleng daerah Juda.
8Arah Timur Jordan, i bas gurun pasir si kendit si arah Timur Jeriho, itetapkenna kota Beser i bas daerah Ruben; kota Ramot i Gileat, i bas daerah Gat, ras kota Golan i Basan, i bas daerah Manase.
9Enda me kota benteng ingan terkelin itetapken man kerina bangsa Israel ras man kalak pertandang si ringan i tengah-tengahna. Tep-tep kalak si munuh alu la sengaja banci ndatken perlindungen i je gelah ula ia sempat ibunuh kalak si erbalas atena, ope dengan ia iadili i tengah-tengah jelma si nterem.