Dual PanelBatu peringet-ingeten ipajekken
1Kenca kerina bangsa e nggo ngepari Lau Jordan nina TUHAN man Josua,
2"Pilih sepulu dua kalak, sekalak i bas tep-tep suku nari.
3Jenari suruh ia muat batu sepulu dua i tengah-tengah Lau Jordan nari eme i bas ingan tedis imam-imam e. Suruh ia maba batu-batu e jenari tamaken i bas inganndu erberngi sendah."
4Emaka idilo Josua si sepulu dua kalak si nggo ipilihna e,
5jenari nina, "Lawes lah kam ku Jordan leben asa Peti Perpadanen TUHAN Dibatandu. Buat lah batu i je tersada kam, sada guna tep-tep suku Israel, jenari persan.
6Batu enda jadi sada peringet-ingeten man bangsa e kerna kai si nggo ibahan TUHAN. Denggo, adi isungkun anak-anakndu kai ertina batu enda man bandu,
7kataken man bana maka Lau Jordan ngadi maler asum Peti Perpadanen TUHAN ngepari lau e. Batu enda tentu rusur ngingetken bangsa Israel kerna kai si nggo jadi i jenda."
8Iikutken kalak ndai perentah Josua. Sue ras si nggo ipedahken TUHAN man Josua, ibuatna batu sepulu dua i tengah-tengah Jordan nari, sada man tep-tep suku Israel, ibabana ku ingan erkemah, jenari itamakenna i je.
9Josua pe ngamparken sepulu dua batu i tengah-tengah Jordan, i bas ingan tedis imam-imam si ngelanja Peti Perpadanen e. (Batu e lit denga i je.)
10Imam-imam tedis i tengah-tengah Jordan seh kerina nggo dung ilakoken kai si nggo isuruh TUHAN man Josua guna idalanken bangsa e. Enda me kai si nggo iperentahken Musa. Pedas-pedas bangsa e ngepar.
11Kenca ia nggo ngepar kerina, imam-imam erdalan leben asaken bangsa e maba Peti Perpadanen TUHAN.
12Dilaki i bas suku Ruben ras Gat bage pe setengah i bas suku Manase nari, si sikap erperang, leben ngepar asaken kalak si debanna e kerina bagi si nggo isuruh Musa man bana.
13I lebe-lebe TUHAN kira-kira empat puluh ribu dilaki si sikap erperang lawes ngepar ku kendit deherken Jeriho.
14Kai si ibahan TUHAN i bas wari e, erbahanca maka bangsa Israel malang ngenehen Josua. Ipehaga bangsa e ia kidekah geluhna, bali ras ipehagana Musa.
15Kenca bage ikataken TUHAN man Josua
16gelah isuruhna imam-imam si ngelanja Peti Perpadanen e ndarat Jordan nari.
17Emaka minter isuruh Josua imam-imam e ndarat.
18Janah kenca imam-imam e seh i darat mulai ka lau ndai maler bagi si gelgel, mulsak launa seh ku tepi.
19Ikepari bangsa e Lau Jordan i bas wari pesepuluhken bulan si pemena jenari ibahanna inganna erkemah i Gilgal, arah Timur Jeriho.
20I je isusun Josua batu si sepulu dua ndai si ibuat i bas Jordan nari.
21Ikatakenna man bangsa Israel nina, "Adi isungkun anak-anakndu kam denggo kai ertina batu enda,
22turiken man bana kerna kejadin tupung Israel ngepari Jordan arah taneh kerah.
23Turiken man bana maka TUHAN Dibatandu ngkerahi Lau Jordan guna kam seh kam ngepar, bali ras nggo IkerahiNa Lawit Merah man kami.
24Erkite-kiteken si enda kerina bangsa i doni enda meteh uga belinna kuasa TUHAN, janah ipehagandu TUHAN Dibatandu seh rasa lalap."