Dual Panel1Kerina raja-raja kalak Amori si arah Barat Jordan ras kerina raja-raja kalak Kanaan si ringan i gedang-gedang Lawit Tengah megisa emaka mbiar ia kerina, janah bene ukurna erkite-kiteken bangsa Israel.
Bangsa Israel isunatken i Gilgal
2Kenca e ikataken TUHAN man Josua nina, "Bahanlah piga-piga piso i bas batu nari jenari sunatken kalak Israel."
3Emaka ibahan Josua me bagi si isuruh TUHAN, jenari isunatkenna bangsa Israel i bas sada ingan si igelari Uruk Ingan Sunat.
4Asum kidekah bangsa e ngepari gurun pasir empat puluh tahun dekahna, kerina dilaki si nggo cukup umurna jadi tentera asum nadingken Mesir, nggo mate sabap nggo isimbakna TUHAN. Sue ras kai si nggo IsumpahkenNa, kalak e la IbereNa ngidah taneh si mehuli dingen mehumur si nggo IpadankenNa man nini-ninina.
5(Yos 5:4)
6(Yos 5:4)
7Kerina anak kalak enda langa isunatken, janah kesusuren si enda me si isunatken Josua.
8Kenca nggo dung isunatken, kerina bangsa e tading i bas ingan erkemah seh nggo malem ugahna.
9Nina TUHAN man Josua, "Gelgel megombang kalak man bandu erkiteken nai kam jadi budak i Mesir. Tapi sendah nggo kuagui si e kerina i bas kam nari." Em sabapna maka ingan e igelari Gilgal seh asa genduari.
10Sanga bangsa Israel erkemah i Gilgal i bas (sada) kendit deherken Jeriho, irayakenna Paskah tupung berngi i bas wari si pesepuluh empatken i bas bulan e.
11Pepagina me si pemenana kal ipanna pangan si turah i taneh Kanaan, eme: buah gandum si isauk ras roti si la itama ragi.
12Mulai i jenari manna nggo ngadi ndabuh, janah lanai lit sitik pe i bas kalak Israel. Mulai i bas paksa e nari ipanna me pangan si turah i Kanaan.
Josua ras sekalak dilaki si erpedang
13Sanga Josua deher Jeriho, rempet idahna sekalak dilaki tedis i lebe-lebena. Idahi Josua ia jenari isungkunina nina, "Tentera pihak kami nge kam, ntah musuh kami?"
14"Si apai pe lang," nina dilaki ndai erjabap. "Aku reh ku jenda sekalak komendan tentera TUHAN." Minter mungkuk Josua nembah, ayona seh ku taneh janah nina, "Aku kap suruh-suruhenndu. Kai atendu kubahan?"
15Emaka ikataken komendan tentera TUHAN man bana nina, "Tangtangi sepatundu, kam sangana tedis i taneh si badia." Jenari ibahan Josua bagi si ikataken man bana.