Dual PanelJosua itipu Kalak Gibeon
1Kemenangen Israel nggo tereteh man kerina raja-raja si arah Barat Jordan, i uruk-uruk, i berneh, ras kerina i gedang-gedang kendit tepi Lawit Tengah, seh ku Libanon i Utara. Si enda kerina eme kap raja-raja kalak Heti, Amori, Kanaan, Peris, Hewi ras Jebusi.
2Pulung ia kerina jenari ipersadana gegehna merangi Josua ras bangsa Israel.
3Tapi nggo ibegi penduduk Gibeon, eme kap kalak Hewi, kai si nggo ibahan Josua man Jeriho ras Ai.
4Emaka irencanakenna nipu Josua. Ibuatna bekalna jenari itamakenna ku das kaledena tare guni si merigat-rigat ras kulit ingan lau anggur si nggo irangkap-rangkapi.
5Ipakena paken si merigat-rigat ras sepatu buruk si nggo itempel-tempel. Roti si ibabana nggo kerah-kerah janah dawanen.
6Jenari lawes ia ku ingan bangsa Israel erkemah i Gilgal. Ikatakenna man Josua ras kalak Israel nina, "Nggo kami reh i bas negeri si ndauh nari. Ate kami gelah ibahanndu sada perpadanen ras kami."
7Tapi nina bangsa Israel man bana, "Ngkai ka maka kami erbahan perpadanen ras kam? Banci jadi inganndu tading deher-deher enda nge."
8Nina man Josua, "Suruh-suruhenndu kap kami." Isungkun Josua ia nina, "Ise kin kam? I ja nari kam?"
9Kenca bage ituriken kalak ndai me turi-turin enda man bana nina, "O bapa, kami reh i negeri si ndauh nari kal, sabap nggo ibegi kami kerna TUHAN Dibatandu. Nggo ibegi kami kerna kai si IbahanNa i Mesir.
10Janah kai si IbahanNa man raja kalak Amori duana arah Timur Jordan: Raja Sihon i Hesbon nari ras Raja Og i Basan nari, si ringan i Astarot.
11Peminpin kami ras kerina jelma si ringan i negeri kami nuruh gelah ibuat kami bekal guna perdalanen si ndauh njumpai kam. Kami isuruh gelah jadi suruh-suruhenndu ras mindo man bandu erbahan perpadanen ras kami.
12Nehenlah roti si ibaba kami. Asum kami berkat i rumah kami nari, asum ibenaken kami perdalanen kami njumpai kam, roti si ibaba kami e melas-melas denga. Tapi nehen lah! Genduari nggo kerah ras dawanen.
13Asum ingan lau anggur enda iisi kami, mbaru denga kal kerina, tapi nehenlah! Genduari nggo merigat! Uis kami ras sepatu kami nggo jadi male i bas perdalanen si ndauh e."
14Ialoken bangsa Israel pangan i bas ia nari, tapi la isungkunina TUHAN kerna si e.
15Ibahan Josua sada perpadanen tandana ia erteman ras kalak Gibeon janah ipelepasna ia nggeluh. Peminpin perpulungen Israel erpadan tuhu-tuhu maka perpadanen e itepatina.
16Telu wari kenca perpadanen e ibahan, nggo tereteh man kalak Israel maka kepeken kalak ndai ndeher kal nge inganna.
17Emaka berkat bangsa Israel janah kenca telu wari seh ia i kota ingan kalak ndai tading: Gibeon, Kepira, Beerot, ras Kiryat Jearim.
18Tapi la banci ibunuh kalak Israel ia, sabap peminpin nggo erbahan sumpah ras ia i bas gelar TUHAN, Dibata Israel. Kerina bangsa e jungut-jungut man peminpin e kerna si enda,
19tapi nina ngaloi, "Nggo kami ersumpah ras ia i bas gelar TUHAN Dibata Israel. Emaka genduari la banci ugapa pe ia ibahan kami.
20La banci la ipelepas kami ia nggeluh erkite-kiteken perpadanen kami. Adi la bage ibahan kami, tentu iukum Dibata kita.
21Pelepaslah ia nggeluh, tapi arus ia erdahin, naka ranting ras ngelegi lau man banta." Enda me si iusulken peminpin-peminpin e.
22Iperentahken Josua gelah penduduk Gibeon ibaba man bana, jenari isungkunina ia nina, "Ngkai maka itipundu kami janah ikatakenndu man kami maka kam i bas ingan si ndauh nari, tapi i jenda nge kepe kam ringan?
23Erkite-kiteken ibahanndu si enda, kam nggo iukum Dibata. Bangsandu la banci la tetap jadi budak, naka ranting ras ngangkat lau guna rumah Dibatangku."
24Ngaloi ia nina, "Ibahan kami si e, Bapa, erkite-kiteken nggo tereteh man kami maka tuhu-tuhu nggo ipedahken TUHAN Dibatandu man Musa, suruh-SuruhenNa, guna mereken kerina taneh enda man bandu ras munuh kalak si ringan i je asum kam mengketisa. Ibahan kami si enda erkite-kiteken mbiar kami man bandu. Mbiar kami bene kesah kami.
25Genduari kami lit i bas kuasandu. Bahanlah man kami kai iakapndu payo."
26Emaka bagenda me ibahan Josua: ikawalina kalak ndai janah la iberena bangsa Israel munuhsa.
27Tapi ibahanna kalak ndai jadi budak, naka ranting ras ngangkat lau man bangsa Israel ras man batar-batar TUHAN. Seh wari si sendah dahin enda terus ilakokenna i bas ingan si nggo ipilih TUHAN lako ersembah man BaNa.