Alkitab Mobile SABDA
[VER] : [KARO]     [PL]  [PB] 
 <<  Zakharia 9 >> 

Ukumen man bangsa-bangsa sekelewet Israel

1Enda kata i bas TUHAN nari: Nggo IbelaskenNa ukumen man negeri Hadrah ras man kota Damaskus. Labo suku-suku Israel saja ngenca sikerajangen TUHAN, tapi ibukota Siria pe Ia empuna.

2Hamat, si sebalengen ras Hadrah e pe sikerajangen TUHAN, bage pe kota Tirus ras Sidon, rikut ras kerina kepentarenna.

3Kota Tirus nggo ibahan bentengna janah nggo ipegun-gun i je emas ras pirak seh buena, maka nggo bali buena ras kubang.

4Tapi ibuat TUHAN me kai si lit i bas kota e. IbenterkenNa kebayakenna ku lawit, janah kota e iciluk seh radas kerina.

5Kota Askelon ngidah si enda pagi, emaka mbiar ia. Kota Gasa pe ngidahsa, emaka mesui kal akapna. Bage ka pe Ekron, emaka bene me pengarapenna. Gasa kebenen raja, dingen Askelon jadi terulang.

6Bangsa peranaken pagi ngiani Asdod. Nina TUHAN, "Kerina si iagahken bangsa Pilisti Kumasapken pagi.

7Lanai pagi ipanna daging si erdareh denga tah pe pangan si deban si pantang. Kerina kalak Pilisti si tading denga bengket pagi jadi bagin i bas bangsangKu janah bali ras sada terpuk i bas suku Juda. Ekron pe jadi sada bagin pagi i bas bangsangKu, bali ras kalak Jebusi nai.

8Kukawali negeringKu janah la Kupelepas tentera kalak mentas arah e. Lanai Kubere raja penindas nindih bangsangKu. Sabap nggo Kuidah uga kiniseran bangsangKu."

Raja si nandangi reh

9Ersuraklah, ersuraklah, o anak kota Sion! Ersuraklah meriah, o kalak Jerusalem! Nehenlah, rajandu reh ndahi kam! Ia dem kemulian, dem kemenangen. Tapi meteruk ukurna, Ia reh ngersak kalde; kalde si nguda denga eme anak indung kalde.

10Nina TUHAN man BangsaNa, "Kusasapken me gereta perang i Israel nari bage ka pe kerina kuda i Jerusalem nari; panah si ipake i bas perang, Kukernepken seh keri. Rajandu e mperdameken bangsa-bangsa; i lawit nari seh ku lawit iperentahna kerina, mulai i Lau Eprat nari, se ku tampuk doni enda."

Bangsa Dibata jore ka pagi mulihi

11Nina TUHAN, "Erdandanken perpadanenKu ras kam, si isahken alu dareh persembahen. Kupulahi kam si terbuang i bas lubang si mbages nari si la erlau.

12Mulihlah, o kam kalak buangen, si genduari nggo erpengarapen; mulihlah ku bentengndu si aman. Kukataken man bandu maka Kubereken me man bandu pasu-pasu dua kali lipat erkiteken kiniseran si nggo inanamindu,

13Kupake me Juda desken panah, dingen Israel anak panahna. Dilaki si i Sion Kupake desken sada pedang ngelawan kalak Junani."

14Teridah me TUHAN i babo BangsaNa; anak PanahNa kabang desken kilap. TUHAN si Mada Kuasa ngembus TerompetNa, dingen reh Ia i bas angin kaba-kaba i Selatan nari.

15Ikawali TUHAN si Mada Kuasa kap BangsaNa maka IkernepkenNa kerina musuh-musuhna. Ersurak ia i bas perang desken kalak mabuk erkiteken anggur; dareh musuh-musuhna iamburkenna, seh maler desken dareh persembahen si niamburken i bas mangkuk nari ku suki-suki batar-batar.

16I bas wari e pagi, ikelini TUHAN me BangsaNa bali ras permakan ngkelini rarasenna i bas bahaya nari. Bangsa e ersinalsal i bas negerina bali ras permata i bas mahkota.

17Nehen me uga ulina ras jilena pagi taneh e! Anak perana ras singuda-nguda mejuah-juah kerina erkiteken gandum ras anggur si mbaru.


  Share Facebook  |  Share Twitter

 <<  Zakharia 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel