Dual Panel1Tetapi akoe soedah tantoeken dalem hatikoe, tra-maoe akoe dateng lagi mendapetken kamoe dengan soesah-hati.
2Karna kaloe akoe mendatengken soesah hati sama kamoe, siapatah bolih menjoekaken akoe, melainken orang jang soedah akoe soesahken hatinja djoega?
3Maka akoe soedah kirim ini soerat sama kamoe, sopaja djangan kapan akoe dateng akoe dapet soesah-hati dari orang, jang patoet akoe dapet soeka-hati dari dia; {2Ko 8:22; Gal 5:10} sebab harap akoe sama kamoe samowa, jang soeka-hatikoe itoe djadi soeka-hati kamoe samowa.
4Karna dengan bebrapa kasoesahan dan kasesekan hatikoe soedah akoe kirim itoe soerat sama kamoe, serta dengan bertjoetjoeran bebrapa ajer-mata; maka ija-itoe boekan sebab kamoe patoet bersoesah hati, melainken sopaja kamoe dapet taoe tjinta jang ada sama akoe dengan terlebih besarnja atas kamoe.
5Tetapi kaloe ada djoega orang jang mendatengken soesah-hati, ija-itoe boekan soesahken hatikoe sadja, melainken saparo (sopaja djangan akoe, membesarken) kamoe samowa.
6{1Ko 5:3} Tjoekoeplah bagi orang jang bagitoe ini siksa, jang soedah ditaroh orang banjak sama dia.
7Dari itoe, terlebih baik kamoe mengampoeni dan menghiboerken dia, asal djangan orang jang bagitoe ditelen olih kasoesahan hati jang terlaloe besar itoe.
8Maka sebab itoe permintaankoe sama kamoe, sopaja kamoe tetepken tjintamoe sama dia.
9Karna dari sebab ini djoega akoe soedah berkirim itoe soerat, sopaja akoe ketaoei tanda dari kamoe, kaloe-kaloe kamoe menoeroet dalem segala perkara.
10Maka sama barang-siapa jang kamoe ampoeni, akoe djoega ampoeni sama dia, karna barang jang akoe ampoeni itoe, akoe soedah ampoeni dari sebab kamoe dihadepan Kristoes, asal djangan setan bolih menang sama kita-orang;
11Karna boekan kita-orang bodoh dari perkara tipoe-dajanja.
12Dan lagi {Kis 16:8} koetika akoe soedah sampe dinegari Troas maoe kabarken indjil Kristoes, dan habis ada pintoe terboeka bagikoe olih Toehan, maka trada perhentian bagi djiwakoe, sebab tiada akoe dapet sama Titoes soedarakoe;
13Maka habis akoe kasih slamat tinggal sama dia-orang, lantas akoe berangkat pergi di Makedoni.
14Maka sakarang soekoer sama Allah, jang slamanja kasih sama kita kamenangan dengan berkat Kristoes, {Kol 1:27} serta jang menjataken haroem pengataoewannja lantaran kita dimana-mana tampat.
15Karna kita ini satoe baoe jang haroem dari Kristoes bagi Allah, baik dalem orang jang dapet slamat, baik dalem orang jang dapet tjilaka;
16{Luk 2:34} Maka sama satoe orang kita djadi baoe kamatian jang membawa sama kamatian; tetapi sama jang lain baoe slamat jang membawa sama slamat. Maka siapa jang tjakap sama perkara-perkara ini?
17Karna boekan kita saperti orang banjak, jang meroesakken firman Allah, melainken dengan toeloes hati, dan saperti dari Allah, dihadepan Allah kita mengataken dia dengan berkat Kristoes.